བོད་ཀྱི་ཆོས་བརྒྱུད་ཁག 5
02/09/2009 00:30ཡང་རྗེ་ཡབ་སྲས་ཀྱིས་མཉམ་བཞག་གི་སྔ་རོལ་གྱི་རིགས་ཤེས་རྗེས་དཔག་གི་རྒྱུན་གོམས་སྟོབས་ཀྱིས་འཕགས་པའི་
མཉམ་བཞག་གི་ངོར་འགྲོ་དགོས་པར་མ་ཟད། རིགས་ཤེས་དེ་དང་མཉམ་བཞག་ལ་གཉིས་སྣང་གི་སྤྲོས་པ་ལོག་མ་
ལོག་གི་ཁྱད་པར་ལས་འཛིན་སྟངས་ཀྱི་ཡུལ་ནི། བདེན་གྲུབ་ཁེགས་ཙམ་དེ་ཀ་རང་གཅིག་ཏུ་སོང་བས། རིགས་ཤེས་
དེས་ཆོས་ཉིད་དོན་སྤྱིའི་སྒོ་ནས་རྟོགས་ཞེས་གསུངས་པ་ཞིག་ཡིན་པས། དེ་ཙམ་གྱི་རྟོགས་ཚད་ནི་ལུགས་སྔ་མས་ཀྱང་
སོ་སྐྱེ་ལ་ཡོད་པར་བཞེད་དོ། དེས་ན་བདེན་གྲུབ་ཁེགས་ཙམ་གྱིས་ཆོས་ཉིད་རྟོགས་པར་དགོངས་པ་དང༌། མཐར་
གཉིས་སྣང་བྲལ་བ་དེའི་ཚེ་ཆོས་ཉིད་རྟོགས་ཞེས་རྩོད་ལན་འཛིན་མཚམས་མི་འདྲ་བ་ལས། དོན་གྱི་འབབ་ས་སོ་སོའི་
སྐྱེ་བོ་ལ་གཉིས་སྣང་གི་སྤྲོས་པ་ཡོད་མེད་དང་བདེན་གྲུབ་ཁེགས་པ་ཡོད་མེད་ཀྱི་ཁྱད་པར་ནི། ཐམས་ཅད་ཀྱི་ལུགས་
ལ་གཅིག་ཏུ་གྲུབ་བོ། འདི་ལ་དགོངས་ནས་རྗེ་བླ་མའི་ལྟ་བའི་ཤོག་དྲིལ་དུ། སོ་སྐྱེ་རྣམས་ཀྱིས་དེ་ཀོ་ན་ཉིད་ཀྱི་ལྟ་བ་ལ་
འཇུག་པ་ན་ཐོག་མ་ཉིད་ནས་རྣམ་གྲངས་མིན་པའི་དོན་དམ་སྤྲོས་བྲལ་ལ་འཇུག་མི་ནུས་པས། དེ་ལ་འཇུག་པའི་
ཐབས་སུ་ཆོས་རྣམས་རང་བཞིན་མེད་པའི་རྣམ་གྲངས་པའི་དོན་དམ་སྤྲོས་བཅས་ལ་ཞེན་ནས་དཔྱད་སྒོམ་གྱིས་ཞུགས་
པས་མཐར་རྣམ་གྲངས་མིན་པའི་དོན་དམ་མངོན་སུམ་དུ་ཐོབ་པར་གསུངས་པ་ཞིག་ཡོད་པས། དེ་ལྟར་ན་རྣམ་གྲངས་
མིན་པའི་དོན་དམ་མཉམ་གཞག་གི་གཟིགས་ཚུལ་སོགས་དོན་གང་ལ་སྦྱར་ཀྱང་མཐར་གནད་གཅིག་ཏུ་གྲུབ་སྙམ།
སྐབས་འདིར་གལ་ཆེའི་དོགས་པ་སློང་བར། ལུགས་དེ་དག་གི་དགག་བྱ་ལ་ཁྱད་པར་མེད་ན་སྣང་ཙམ་འགོག་མི་འགོག་
དང༌། བུམ་པ་ལྟ་བུའི་སྟེང་དུ་རང་སྟོང་འཆད་སྐབས། གཅིག་གིས་རང་གི་ངོ་བོས་གྲུབ་པས་སྟོང་ཞེས་དགག་བྱའི་ཁྱད་
པར་སྦྱར་བ་དང༌། ཅིག་ཤོས་ཀྱིས་བུམ་པ་རང་ཉིད་རང་གིས་སྟོང་ཞེས་བུམ་པ་བུམ་པས་སྟོང་ཚུལ་གསུངས་པས་དགག་
བྱ་ལ་ཁྱད་པར་ཡོད་དགོས་སོ་སྙམ་པ་དང༌། ཡང་དེ་དག་གི་གནད་མཐར་ཐུག་ན་ལུགས་སོ་སོས་ཉོན་མོངས་སྐྱེ་ཚུལ་
འཆད་སྐབས། འགའ་ཞིག་གིས། དབུ་མ་རིན་ཕྲེང་བར། ཇི་སྲིད་ཕུང་པོ་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད།
།ཅེས་དང༌། སྤྱོད་འཇུག་ལས། ཚོར་བའི་རྐྱེན་གྱིས་སྲེད་པ་ཡིན། །ཚོར་བ་དེ་དག་ལ་ཡང་ཡོད། །
ཅེས་སོགས་ཀྱི་ཚིག་ཟིན་སྒྲ་ཇི་བཞིན་པར་ཁས་བླངས་ཏེ། ཕུང་པོ་དང་ང་ཙམ་འཛིན་པའི་འཛིན་པ་ལས་ཆགས་
སོགས་སྐྱེ་བར་བཟུང་ནས་ང་ཙམ་དང་སྣང་ཙམ་ཡང་དགག་དགོས་པར་གསུངས་པ་དང༌། རྗེ་ཡབ་སྲས་སོགས་གཞན་
གྱིས། སྤྱོད་འཇུག་ལས། ཇི་ལྟར་མཐོང་ཐོས་ཤེས་པ་དག །འདིར་ནི་དགག་པར་བྱ་མིན་ཏེ། །འདིར་ནི་སྡུག་བསྔལ་རྒྱུར་
གྱུར་པའི། །བདེན་པར་རྟོག་པ་བཟློག་བྱ་ཡིན། །ཅེས་སོགས་གསུངས་པ་སྒྲ་ཇི་བཞིན་དུ་དགོངས་ཏེ། བདེན་འཛིན་ལས་
ཆགས་སོགས་ཉོན་མོངས་འདྲེན་པ་ལས། སྣང་ཙམ་འཛིན་པའི་འཛིན་པ་ལས་དེ་དག་མི་བསྐྱེད་པར་གསུངས་པས། དེ་
དག་གི་དོན་གང་ཞེ་ན། འདི་ནི་ལྟ་བའི་གནད་ཆེས་དཀའ་ས་ཞིག་ཏུ་ངེས་པས། རྒྱ་བོད་ཀྱི་གཞུང་ཆེན་རྣམས་དང༌།
ལྷག་པར་རང་རྒྱུད་ཀྱི་ཉོན་མོངས་སྐྱེ་ཚུལ་སོགས་ཀྱི་མྱོང་བ་དང་བསྡུར་ནས་དཔྱད་དགོས་པ་མང་དུ་མཆིས་ཀྱང༌།
འདིར་ཡིག་ཚོགས་མངས་པར་འཇིགས་ཤིང་རང་གི་བློ་ངོར་ཡང་འཆར་དཀའ་བས། འདི་དག་གི་གནད་སངས་རྒྱས་
ཀྱི་སར་ཀུན་རྫོབ་མཁྱེན་པ་ཡོད་མེད་དང༌། ཐ་སྙད་ཚད་གྲུབ་ཁས་ལེན་མིན་སོགས་ལ་ཆེས་འབྲེལ་ཆེ་བས། གཤམ་དུ་
འཆད་འགྱུར་གྱི་དོགས་སློང་དང་ལན་འདེབས་ཀྱི་རིགས་པ་རྣམས་ལས་ཅུང་ཙམ་དཔག་ནུས་སུ་རེའོ། །
ཁ༽ གཞི་དེའི་སྟེང་དུ་དགག་བྱ་བདེན་གྲུབ་ཁེགས་པའི་ཚེ་གཞི་དེ་ཁེགས་དགོས་མིན་གྱི་ལུགས་གཉིས་དོན་ལ་གཅིག་
ཏུ་འབབ་ལུགས༌། འཇུ་མི་ཕམ་པ་ཆེན་པོ་སོགས་གཞི་དེ་ཁེགས་དགོས་པར་བཞེད་པ་རྣམས་ཀྱིས་ཐུགས་ཀྱི་གཏད་སོ་ནི།
མདོ་ལས། དོན་དམ་པའི་བདེན་པ་ནི་གང་ཞེ་ན། གང་ལ་སེམས་ཀྱི་རྒྱུ་བ་ཡང་མེད་ན་ཡི་གེ་རྣམས་ལྟ་སྨོས་ཀྱང་ཅི་དགོས།
ཞེས་སོགས་དང༌། གང་སྟོང་པ་ཉིད་ཀྱིས་ཆོས་རྣམས་སྟོང་པར་མི་བྱེད་དེ། ཆོས་རྣམས་ཉིད་སྟོང་པ་ཉིད། ཅེས་སོགས་ཁུངས་
སུ་མཛད་དེ། དྭགས་བརྒྱུད་གྲུབ་ཆེན་དུ། དེ་ལས་གཞན་དུ་སྣང་ཙམ་རིགས་པས་དགག་མི་དགོས་པ་དང༌། དགག་པར་ནུས་
པ་མ་ཡིན་ན་འདིར་འགྱུར་ཏེ། སྣང་ཙམ་དོན་དམ་པའི་བདེན་པར་ཡང་འགྱུར་བའི་ཕྱིར་ཏེ། དེ་རིགས་པས་མི་གནོད་པར་
དཔྱད་བཟོད་པའི་དོན་ཡིན་པར་འགྱུར་བའི་ཕྱིར། ཞེས་དང༌། ངེས་ཤེས་སྒྲོན་མེར། ཀ་བ་ཀ་བའི་བདེན་གྲུབ་གཉིས། །ཞེས་
སོགས་སྔར་དྲངས་པ་བཞིན་གཞི་དེ་བདེན་པར་གྲུབ་མིན་དཔྱོད་པའི་རིགས་པས་དཔྱད་ནས་མ་རྙེད་པ་ན་གཞི་དེ་ཁེགས་
དགོས་པ་ལས་གཞན་རིགས་པའི་དཔྱད་བཟོད་དུ་འགྱུུར་བར་དགོངས་སོ། རྗེ་ཡབ་སྲས་ཀྱིས་ནི། བཞི་བརྒྱ་པའི་འགྲེལ་བར།
ཁོ་བོ་ཅག་གི་རྣམ་པར་དཔྱོད་པ་ནི། རང་བཞིན་འཚོལ་བ་ལྷུར་བྱེད་པ་ཉིད་ཀྱི་ཕྱིར་རོ། ཁོ་བོ་ཅག་ནི་འདིར་དངོས་པོ་
རྣམས་རང་གི་ངོ་བོས་གྲུབ་པ་འགོག་གི་མིག་ལ་སོགས་པ་བྱས་ཤིང་རྟེན་ཅིང་འབྲེལ་བར་འབྱུང་བའི་ལས་ཀྱི་རྣམ་པར་སྨིན་
པ་ཉིད་ནི་མི་འགོག་གོ ཞེས་སོགས་དང༌། སྔར་དྲངས་པའི་རང་བཞིན་གྱིས་གྲུབ་པས་སྟོང་པར་གསུངས་པའི་མདོ་བསྟན་
བཅོས་དག་ཁུངས་སུ་མཛད་དེ། ཀུན་རྫོབ་སྣང་ཙམ་ཉིད་མི་འགོག་ཀྱང་དེ་ཙམ་གྱིས་རིགས་པའི་དཔྱད་བཟོད་དུ་མི་
འགྱུར་ཞེས། སྔར་དྲངས་པའི་ལྷག་མཐོང་ཆེན་མོར་དེ་ཁོ་ན་ཉིད་དང་ཐ་སྙད་དཔྱོད་པའི་ཚད་མ་གཉིས་མིག་ཤེས་དང་
རྣ་ཤེས་བཞིན་སོ་སོར་གསུངས་པ་དང༌། གཞན་ཡང་ལྷག་མཐོང་ཆེན་མོར། རིགས་པའི་དཔྱད་བཟོད་མི་བཟོད་ཀྱི་དོན་
ནི་དེ་ཁོ་ན་ཉིད་ལ་དཔྱོད་པའི་རིགས་པ་དེས་རྙེད་མ་རྙེད་ཡིན་ལ། ཞེས་སོགས་གསུངས་པ་བཞིན་གཞི་དེ་བདེན་གྲུབ་
དཔྱོད་པའི་རིགས་པས་གཞི་དེ་རྙེད་ན་རིགས་པའི་དཔྱད་བཟོད་དུ་འགྱུར་བ་ལས་རིགས་པ་དེས་མ་ཁེགས་པ་ཙམ་གྱིས་
དཔྱད་བཟོད་དུ་འགྱུར་བར་མི་འདོད། འོ་ན་ལུགས་དེ་གཉིས་མི་འགལ་ཚུལ་གང་ཞེ་ན། རྗེ་ཡབ་སྲས་ཀྱིས་གཞི་དེ་བདེན་
པར་གྲུབ་མིན་དཔྱོད་པའི་རིགས་པས་དཔྱད་ནས་གཞི་དེ་མ་རྙེད་པ་ཙམ་ལས་གཞི་དེ་མེད་པར་མ་རྙེད་ཅིང༌། དགག་བྱ་
བདེན་གྲུབ་མེད་པར་རྙེད་པས་དགག་བྱ་དེ་ཁེགས་ཀྱང་གཞི་དེ་མི་ཁེགས་པར་བཞེད། རྒྱུ་མཚན་དེ་དག་ལ་བརྟེན་གཞི་དེ་
དོན་དཔྱོད་རིགས་པས་དཔྱད་ནས་མ་རྙེད་པ་དེ་ལ་གཅིག་གིས་གཞི་དེ་ཁེགས་པར་བཞེད་པ་དང༌། ཅིག་ཤོས་ཀྱིས་མི་
ཁེགས་པར་བཞེད་པ་ལས་གཉིས་ཀའི་ལུགས་ལ་དོན་དཔྱོད་རིགས་པས་དཔྱད་ནས་རྙེད་པར་ཁས་མི་ལེན་པས་མཐར་ཐུག་
གི་དགོངས་པ་གཅིག་ཏུ་བབས་ཡོད། འདི་ལ་འགའ་ཞིག་གིས། དེ་ལྟར་ན་རྗེ་ཡབ་སྲས་ཀྱི་དོན་དཔྱོད་རིགས་པས་དཔྱད་
ནས་མཐར་བདེན་མེད་རྟོགས་པར་བཞེད་པས། དེ་ལྟའི་བདེན་མེད་དེ་རིགས་པའི་དཔྱད་བཟོད་དུ་འགྱུར་རོ་ཞེ་ན། དེ་མི་
འགྱུར་ཏེ། རིགས་པའི་དཔྱད་བཟོད་དུ་གྲུབ་ན་ནི། སྔར་བཤད་པ་བཞིན་གཞི་བུམ་པ་ལྟ་བུ་དེ་བདེན་པར་གྲུབ་མིན་དཔྱོད་
པའི་རིགས་པས་དཔྱད་ནས་མཐར་གཞི་བུམ་བ་དེ་ཀ་རང་རྙེད་པ་ཞིག་དགོས་ལ། རིགས་ཤེས་རྗེས་དཔག་གིས་རྟོགས་པའི་
བདེན་མེད་དེ་གཞི་བུམ་པ་དེ་མ་ཡིན་ཅིང༌། བདེན་མེད་དེ་ཡང་གཞི་ཆོས་ཅན་དུ་བཟུང་ནས་བདེན་པར་གྲུབ་མིན་དཔྱོད་
པའི་ཚེ། རིགས་པ་དེས་སྟོང་གཞི་བདེན་མེད་དེ་ནམ་ཡང་མི་རྙེད་པས། དེ་ལྟར་ན་བདེན་མེད་དེ་རིགས་པའི་དཔྱད་བཟོད་
དུ་འགྱུར་བའི་སྐྱོན་མེད་ཅེས་ལན་མཛད་དོ།
འོ་ན་སྟོང་གཞི་དེ་ཁེགས་དགོས་མིན་གྱི་ཁས་ལེན་ལ་ཁྱད་པར་ཤོར་བ་ཅི་ཞེ་ན། དེ་ནི་ལུགས་སྔ་མ་རྣམས་ཀྱི་དོན་དཔྱོད་
རིགས་པའི་ངོར་ཁེགས་པའི་རྒྱུ་མཚན་གྱིས་རིགས་པ་དེས་ཁེགས་ཞེས་གསུངས་ལ། རྗེ་ཡབ་སྲས་ཀྱིས་རིགས་ངོ་དེར་ཁེགས་
ཀྱང་རིགས་པ་དེས་མི་ཁེགས་ཏེ། ཡོད་ན་རིགས་པས་དགག་ཏུ་མི་ནུས་པའི་ཕྱིར་ཞེས། མདོར་ན་མིང་འདྲ་མིན་གང་ལྟར་
ཡང་ཐ་སྙད་ཚད་གྲུབ་དང༌། སྣང་ཙམ་མྱོང་ཙམ་གྱི་བདག་ཉིད་དང༌། གཞན་ངོར་ཡོད་པ་གང་རུང་ཞིག་གི་རྣམ་གཞག་
འཇོག་དགོས་པས། དེ་ལྟར་ན་དོན་དཔྱོད་རིགས་པས་དེ་དག་མི་ཁེགས་ཞེས་ལན་འདེབས་ཚུལ་གྱི་ཁྱད་པར་ཙམ་ལས། དགོངས་དོན་མཐར་ཐུག་དོན་དཔྱོད་རིགས་པའི་ངོར་གཞི་ཆོས་ཅན་དེ་ཁེགས་པ་དང༌། སྣང་ཙམ་མྱོང་ཙམ་སོགས་
ཀྱི་རྣམ་གཞག་འཇོག་དགོས་པའི་གནད་རྣམས་གཅིག་ཏུ་བབས་ཡོད།
ག༽ དབུ་མ་པ་ལ་ཀས་ལེན་ཡོད་མེད་དམ་ཐ་སྙད་ཚད་གྲུབ་ཁས་ལེན་མིན་གྱི་ལུགས་གཉིས་དོན་ལ་གཅིག་ཏུ་
འབབ་ལུགས།དབུ་མ་པ་ལ་ཁས་ལེན་མེད་ཅིང་ཐ་སྙད་ཚད་གྲུབ་མི་བཞེད་པའི་ལུགས་རྣམས་ཀྱིས་ནི། སྔར་ཡོད་མིན་
མེད་མིན་སོགས་གསུངས་པའི་མདོ་བསྟན་བཅོས་ཀྱི་གསུང་ཚིག་རྣམས་དང༌། མདོ་ཏིང་ངེ་འཛིན་རྒྱལ་པོ་ལས། མིག་
དང་རྣ་བ་སྣ་ཡང་ཚད་མ་མིན། །ལྕེ་དང་ལུས་དང་སེམས་ཀྱང་ཚད་མ་མིན། །གལ་ཏེ་དབང་པོ་འདི་དག་ཚད་ཡིན་ན།
།འཕགས་པའི་ལམ་གྱིས་སུ་ལ་ཅི་ཞིག་བྱ། །ཞེས་དང༌། རྩོད་ཟློག་ལས། གལ་ཏེ་ངས་དམ་བཅས་འགའ་ཡོད། །དེས་ནང་
ང་ལ་སྐྱོན་དེ་ཡོད། །ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་ཡིན། །ཅེས་དང༌། འཇུག་པར། གལ་ཏེ་འཇིག་
རྟེན་ཚད་མ་ཡིན་ན་ནི། །ཞེས་པ་ནས། རྣམ་ཀུན་འཇིག་རྟེན་ཚད་མིན་དེ་ཡི་ཕྱིར། །དེ་ཉིད་སྐབས་སུ་འཇིག་རྟེན་གནོད་
པ་མེད། །ཅེས་དང༌། ཇི་ལྟར་གཞན་དབང་དངོས་འདོད་ལྟར། །ཀུན་རྫོབ་ཀྱང་ནི་བདག་གིས་ཁས་མ་བླངས། །འབྲས་ཕྱིར་
འདི་དག་མེད་ཀྱང་ཡོད་དོ་ཞེས། །འཇིག་རྟེན་ངོར་བྱས་བདག་ནི་སྨྲ་བར་བྱེད། །ཅེས་སོགས་གསུངས་པ་རྣམས་དབུ་མ་
པ་ལ་ཁས་ལེན་དང་འཇིག་རྟེན་པའི་ཚད་མའམ་ཐ་སྙད་པའི་ཚད་མ་མེད་པར་བཞེད་པའི་ཁུངས་སུ་འགྲེལ་པར་
མཛད། ཐ་སྙད་ཚད་གྲུབ་བཞེད་པ་རྣམས་ཀྱིས་ནི། མདོ་ལས། འཇིག་རྟེན་ན་གང་ཡོད་པར་འདོད་པ་དེ་ནི་ང་ཡང་ཡོད་
པར་འདོད་དོ། ཞེས་དང༌། འདི་ལྟར་དེ་བཞིན་བཤེགས་པའི་ཀུན་རྫོབ་དང་དོན་དམ་པ་གཉིས་ཐུགས་སུ་ཆུད་དེ། ཤེས་
པར་བྱ་བ་ཡང་ཀུན་རྫོབ་དང་དོན་དམ་པའི་བདཻན་པ་འདིར་ཟད་དེ། ཞེས་སོགས་དང༌། རྩ་ཤེར། འཕགས་པའི་བདེན་པ་
བཞི་པོ་རྣམས། །ཁྱོད་ལ་མེད་པར་ཐལ་བར་འགྱུར། ཞེས་སོགས་དངོས་སྨྲ་པས་སྨྲས་པར། གང་ལ་སྟོང་པ་ཉིད་རུང་བ། །དེ་
ལ་ཐམས་ཅད་རུང་བར་འགྱུར། །ཞེས་སོགས་ཀྱི་རྩོད་ལན་མཛད་པ་རྣམས་དང༌། གང་ཕྱིར་རྟེན་འབྱུང་མ་ཡིན་པའི༌། །ཆོས་
འགའ་ཡོད་པ་མ་ཡིན་ནོ། །ཞེས་སོགས་དང༌། འཇུག་པར། དངོས་པོ་སྟོང་པ་གཟུགས་བརྙན་ལ་སོགས་པ། །ཚོགས་ལ་ལྟོས་
རྣམས་མ་གྲངས་པ་ཡང་མིན། །ཞེས་དང༌། ཀུན་རྫོབ་དེ་ཉིད་གཤོག་ཡངས་དཀར་པོ་རྒྱས་གྱུར་པ། །ཞེས་སོགས་བདེན་
གཉིས་ཡོད་པར་གསུངས་པའི་ལུང་རྣམས་ཁུངས་སུ་མཛད་དེ་ཐ་སྙད་ཚད་གྲུབ་ཡོད་པར་བཞེད་དོ། དེ་ལྟར་ལུགས་སོ་
སོས་ཁུངས་ལུང་དང་བཅས་ཏེ་དེ་གཉིས་མི་འགལ་ཚུལ་བཤད་པ་ལ། ཐོག་་མར་ཐ་སྙད་ཚད་གྲུབ་ཁས་ལེན་མིན་གྱི་
ལུགས་ཕན་ཚུལ་བར་དགག་སྒྲུབ་ཇི་ལྟར་མཛད་པའི་རྩོད་ལན་རྣམས་ཤེས་དགོས་ཤིང༌། དེ་ནི་ཐ་སྙད་ཚད་གྲུབ་མི་བཞེད་
པ་རྣམས་ཀྱིས་འདི་ལྟར་འགོག་སྟེ། ཐ་སྙད་ཚད་གྲུབ་ཁས་བླངས་ཚེ་དོན་དཔྱོད་རིགས་པས་དཔྱད་བཟོད་དུ་ཐལ་བ་དང༌། དོན་དམ་མཐར་ཐུག་པ་དེ་མ་རྟོགས་པར་ཐལ་བ་དང༌། མིག་དང་རྣ་བ་སྣ་ཡང་ཚད་མ་མིན། །ཞེས་སོགས་ཀྱི་ལུང་རྣམས་
དང་འགལ་བར་འགྱུར་ཞེས་སོགས་ཀྱི་ཐལ་བ་འཕེན་པར་མཛད། དེའི་ལན་དུ་ཅིག་ཤོས་ཀྱིས་རིགས་པས་དཔྱད་བཟོད་
དུ་མི་འགྱུར་ཚུལ་སྔར་བདེན་གྲུབ་ཁེགས་ཚེ་གཞི་ཆོས་ཅན་ཁེགས་དགོས་མིན་གྱི་སྐབས་སུ་བཤད་པ་བཞིན་དང༌། བདེན་
སྟོང་རྟོགས་པའི་རིགས་ཤེས་གོམས་པའི་མཉམ་གཞག་གི་ངོར་གཉིས་སྣང་གི་སྤྲོས་པ་ཐམས་ཅད་ཁེགས་པས། དོན་དམ་
བདེན་པའི་རྟོགས་ཚད་ལུགས་སྔ་མ་ཇི་ལྟ་བ་བཞིན་རྫོགས་པར་རྟོགས་པ་དང༌། མིག་ཤེས་སོགས་ཚད་མ་མིན་པར་གསུངས་
པ་དེ་ཡང༌། འཇུུག་པར༌། དེ་ཉིད་སྐབས་སུ་འཇིག་རྟེན་གནོད་པ་མེད། །ཅེས་སོགས་གཞན་སྐྱེ་བཀག་པར་འཇིག་རྟེན་པས་
གནོད་པ་མེད་ཚུལ་འཅད་པའི་སྐབས་ཡིན་པས། འཇིག་རྟེན་པའི་བློ་རང་ག་བའི་མིག་ཤེས་སོགས་ཀྱི་ཚད་མ་རྣམས་དེ་ཁོ་
ན་ཉིད་ལ་ཚད་མ་མིན་པར་གསུངས་པ་ལས་སྤྱིར་ཚད་མ་མིན་པར་གསུངས་པ་མིན་ཞེས་ལན་མཛད་ཅིང༌། དེ་ལས་
གཞན་དུ་ཁྱོད་ཀྱིས་ཐ་སྙད་ཚད་གྲུབ་ཁས་མ་བླངས་པ་མི་འཐད་དེ། དེ་ལྟར་ན། མདོ་ལས་འཇིགས་རྟེན་ན་གང་ཡོད་
པར་འདོད་པ་དེ་ནི་ང་ཡང་ཡོད་པར་འདོད་དོ། ཞེས་སོགས་སྔར་གྱི་མདོ་བསྟན་བཅོས་རྣམས་དང་འགལ་བར་འགྱུར་
བ་དང༌། ལས་འབྲས་ཀྱི་རྣམ་གཞག་ལ་སྐུར་བ་བཏབ་པར་འགྱུར་བ་དང༌།
རྒྱུ་ཚོགས་གཉིས་ལས་འབྲས་བུ་སྐུ་གཉིས་ཐོབ་ཚུལ་སོགས་ཀྱི་རྣམ་གཞག་གསུངས་པ་ཐམས་ཅད་མི་འཐད་པར་འགྱུར་
རོ་ཞེས་སོགས་ཀྱི་ཐལ་བ་འཕངས་པར། ལུགས་སྔ་མས་སྐྱོན་མེད་དེ། དེ་ལྟར་མཛད་པ་རྣམས་ནི། རེ་ཞིག་དེ་ཁོ་ན་ཉིད་
རྟོགས་མི་ནུས་པའི་གདུལ་བྱ་རྣམས་རྗེས་སུ་འཛིན་ཆེད། དེ་དག་གི་འཁྲུལ་ངོ་སྣང་ཙམ་དང་མཐུན་པར་གཞན་ངོར་
རྟེན་འབྲེལ་སོགས་ཀྱི་རྣམ་གཞག་ཐམས་ཅད་ཡོད་ཅེས་གསུངས་པ་ལས། དབུ་མ་ཐལ་འགྱུར་པའི་ལུགས་ལ་དེ་དག་ཡོད་
པ་མིན་ཞེས་ལན་མཛད་དེ། དྭགས་བརྒྱུད་གྲུབ་ཆེན་དུ། འོ་ན་ཐལ་འགྱུར་པས་ཀུན་རྫོབ་ཀྱི་ཆོས་ཀུན་རྫོབ་ཏུའང་ཀུན་
རྫོབ་ཀྱི་ཚད་མས་མ་གྲུབ་བཞིན་དུ་ཀུན་རྫོབ་ཀྱི་རྣམ་གཞག་རྒྱ་ཆེར་སྨྲ་ན། ཀུན་རྫོབ་ཏུ་ཀུན་རྫོབ་ཀྱི་ལས་འབྲས་དང་
འཆིང་གྲོལ་སོགས་ཀྱང་ཡེ་མེད་དུ་སྨྲའམ་ཞེ་ན། མི་སྨྲ་སྟེ། དེ་ནི་ཇི་ལྟར་མངོན་མཐོ་ངེས་ལེགས་དོན་དུ་གཉེར་བའི་སྐྱེས་
བུ་དམ་པ་དག་གིས་མ་དཔྱད་པའི་ངོར་ཀུན་རྫོབ་ཀྱི་རྣམ་གཞག་ཇི་ལྟར་བྱེད་པ་ལྟར་ཁོ་བོས་ཀྱང་དེར་བརྗོད་པའི་ཕྱིར།
ཞེས་དང༌། གཞན་ངོར་གཟུགས་ནས་རྣམ་མཁྱེན་གྱི་བར་གྱི་ཐ་སྙད་མི་འདོར་བར་ཞལ་གྱིས་བཞེས་པ་ཡིན་ཏེ། ཞེས་
སོགས་དང༌། ཐལ་འགྱུར་པའི་ལུགས་ལ་གཟུགས་ནས་རྣམ་མཁྱེན་གྱི་བར་ཆོས་རྣམས་ཡོད་པར་ཁས་ལེན་པ་ལྟ་ཅི། ཐལ་
འགྱུར་པ་ཁོ་རང་ཡང་ཁས་མི་ལེན་པར་གསུངས་ཏེ། དེ་ཉིད་ལས། འོ་ན་ཐལ་འགྱུར་པ་དེ་ཇི་ལྟ་བུ་ཞིག་ཅེ་ན། དེ་ཡང་
གཞན་གྱིས་འཕུལ་ནས་ཐལ་འགྱུར་པར་བཏགས་པ་ལས། ཐལ་འགྱུར་པ་ཉིད་ཅེས་ཐལ་འགྱུར་པ་ཉིད་ཀྱིས་ཐལ་འགྱུར་
པར་ཁས་བླངས་པ་མ་ཡིན་ནོ། འོ་ན་ཁྱེད་ཅག་ཐལ་འགྱུར་པ་ཞེས་བརྗོད་པ་ཅི་ཞེ་ན། དེ་ནི་ཁྱེད་དང་རྩོད་སྐབས་འབྱེད་
པའི་ཆེད་དུ་ཁྱེད་ཀྱིས་དེར་འདོགས་ཀྱིན་འདུག་པའི་རྗེས་བརྗོད་བྱས་པ་མ་གཏོགས་དེ་ལྟ་བུའི་རྩོད་པས་མི་བརྫི་བའི་
རྩོད་པ་ལས་གྲོལ་སྐབས་ན། བདག་དབུ་མ་པའོ་ཞེས་སྨྲ་བསམ་གྱི་བརྗོད་པ་དང་བྲལ་ལ། རྩོད་སྐབས་ཉིད་དུའང་སྨྲ་བསམ་
གྱི་བརྗོད་པ་དང་བྲལ་ཡང་དེར་བརྗོད་པར་སྣང་བ་ནི་སྒྲ་བརྙན་གྱི་སྒྲ་བཞིན་ནོ། ཞེས་སོགས་གསལ་བར་གསུངས་སོ། འོ་
ན་ལུགས་དེ་གཉིས་མི་འགལ་ཚུལ་གང་ཞེ་ན། དབུ་མ་པ་ལ་ཁས་ལེན་ཡོད་མེད་ནི་ལུགས་སྔ་མས་དབུ་མ་པ་ཞེས་པ་
དང༌། ལུགས་ཕྱི་མས་འཕགས་པའི་མཉམ་གཞག་གི་ངོར་ཞེས་པ་གཉིས་གནད་གཅིག་ཏུ་སོང་ལུགས་སྔར་གྱི་བཤད་པ་
རྣམས་ཀྱིས་ཀྱང་འགྲུབ་ལ། ལྷག་པར་ཐ་སྙད་ཚད་གྲུབ་བཞེད་པ་རྣམས་ཀྱིས་ཐ་སྙད་ཚད་གྲུབ་ཀྱི་འཇོག་ཚུལ་དེ་དང༌། མི་བཞེད་པ་རྣམས་ཀྱིས་སྣང་ཙམ་མྱོང་ཙམ་དུ་ཡོད་པ་དང༌། ཡང་ན་གཞན་ངོར་ཡོད་ཅེས་པ་རྣམས་མིང་མི་འདྲ་ཡང་
དོན་ལ་གཅིག་ཏུ་སོང་ཡོད་ལུགས་ཇི་བཞིན་ཤེས་ཚེ་དབུ་མ་པ་ལ་ཁས་ལེན་ཡོད་མེད་གཉིས་ཀྱི་གནད་རྣམས་ཤུགས་
ཀྱིས་འགྲུབ་པོ། ཐ་སྙད་ཚད་གྲུབ་ཁས་ལེན་པ་རྣམས་ཀྱིས་ཐ་སྙད་ཚད་གྲུབ་ཀྱོ་དོན་འཇོག་པ་ན། ལྷག་མཐོང་ཆེན་མོར། དེ་ལ་ཐ་སྙད་དུ་ཡོད་པར་འདོད་པ་དང་མེད་པར་འདོད་པ་ནི་ཅི་འདྲ་པ་ཞིག་གི་སྒོ་ནས་འཇོག་པ་ཡིན་སྙམ་ན། ཐ་སྙད་
པའི་ཤེས་པ་ལ་གྲགས་པ་ཡིན་པ་དང་ཇི་ལྟར་གྲགས་པའི་དོན་དེ་ལ་ཐ་སྙད་པའི་ཚད་མ་གཞན་གྱིས་གནོད་པ་མེད་པ་
དང༌། དེ་ཁོ་ན་ཉིད་ལའང་རང་བཞིན་ཡོད་མེད་ཚུལ་བཞིན་དུ་དཔྱོད་པའི་རིགས་པས་གནོད་པ་མི་འབབ་པ་ཞིག་ནི་
ཐ་སྙད་དུ་ཡོད་པར་འདོད་ལ། དེ་དག་ལས་ལྡོག་པ་ནི་མེད་པར་འདོད་དོ། ཞེས་ཐ་སྙད་པའི་ཤེས་པ་ལ་གྲགས་པ། ཐ་
སྙད་པའི་ཚད་མ་གཞན་གྱི་གནོད་པ་མེད་པ། དེ་ཁོ་ན་ཉིད་ལ་དཔྱོད་པའི་རིགས་པས་མི་གནོད་པ་བཅས་ཐ་སྙད་ཁྱད་
ཆོས་གསུམ་ལྡན་དུ་གསུངས་ལ། དེ་ལྟར་ན་ཐ་སྙད་ཚད་གྲུབ་ཅེས་པའི་ཚིག་དེ་ཁས་ལེན་མིན་གང་ལྟར་ཡང་དེའི་དོན་
ནི། དེ་ཁོ་ན་ཉིད་ལ་དཔྱོད་པའི་རིགས་པས་དཔྱད་བཟོད་ཅིག་ལ་མི་འཇོག་པར། སྣང་ཙམ་མྱོང་ཙམ་མམ་གཞན་ངོར་
ཡོད་པར་བཞེད་པའི་ལུགས་ཀྱི་གཞན་ངོར་ཡོད་པའི་ཚད་ཇི་ལྟ་བ་བཞིན་དུ་གྲུབ་སྟེ། ལུགས་དེ་ལ་ཡང་དཔེར་ན་སྒྲ་
རྟག་མི་རྟག་དང༌། རི་བོང་གི་རྭ་ཡོད་མེད་ལྟ་བུ་རྣམས་གཞན་ངོར་ཡོད་མེད་ཀྱི་ཁྱད་པར་ངེས་པར་འབྱེད་དགོས་ཤིང༌།
དེ་ནི་ཅུང་ཟད་དཔྱད་པའི་ཚད་མ་དང་ཚད་མིན་གྱི་དབྱེ་བའམ། ཡང་ན་གཞན་ངོར་ཡོད་པའི་ཚད་མ་དང་ཚད་མིན་
གྱིས་ཁྱད་པར་འབྱེད་དགོས་པ་ལས། དེ་མིན་གཞན་ངོར་ཡོད་མེད་ཀྱི་ཁྱད་པར་འབྱེད་བྱེད་ཀྱི་རྣམ་གཞག་འཇོག་དཀའ་
བའི་ཕྱིར། དེས་ན་ལུགས་དེས་གཞན་ངོར་ཡོད་ཅེས་དང་ལུགས་གཞན་གྱིས་རང་ལུགས་ལ་ཚད་མས་གྲུབ་ཅེས་པ་གཉིས་
ལ་ཐ་སྙད་འདོགས་ཚུལ་མི་འདྲ་བའི་ཁྱད་པར་ཡོད་ནའང༌། སོ་སོའི་ལུགས་ཀྱི་གཞན་ངོར་ཡོད་པ་དང་ཐ་སྙད་ཚད་གྲུབ་
ཀྱི་དོན་འཇོག་ཚུལ་ཇི་བཞིན་ཤེས་ཚེ་དོན་ལ་གཅིག་ཏུ་གྲུབ་སྙམ། དེ་ལྟར་ན་སངས་རྒྱས་ཀྱི་ཀུན་རྫོབ་མཁྱེན་མིན་དང༌། སྣང་ཙམ་དགག་མི་དགག་སོགས་ཀྱི་ཁྱད་པར་ཡང་གནད་འདི་ཉིད་ལ་ཐུག་པར་སེམས་སོ། །
འོ་ན་སྔོན་བྱོན་མཁས་གྲུབ་དམ་པ་རྣམས་ཀྱིས་ལུགས་ཕན་ཚུལ་བར་དགག་གཞག་རྒྱ་ཆེར་མཛད་པས། ཁོང་རྣམ་
པས་མཐར་ཐུག་གི་གནད་དེ་དག་མ་དགོངས་པ་ཡིན་ནམ་ཞེ་ན། ག་ལ་ཡིན་ཏེ། དེ་ནི་སྔར་བཤད་པ་བཞིན་རྗེས་འཇུག་
གདུལ་བྱ་རྣམས་ཀྱི་བློ་གྲོས་ཀྱི་རྩལ་རྒྱས་ཤིང༌། རིམ་གྱིས་མཐར་ཐུག་གི་ལྟ་བ་རྙེད་པའི་ཐབས་ཁོ་ནར་གཟིགས་ནས། ལུགས་
སོ་སོའི་ལྟ་བ་གཏན་ལ་འབེབས་ཚུལ་གྱི་རིགས་པའི་རྩལ་འདོན་མི་འདྲ་ཞིང༌། ཐ་སྙད་ཁས་ལེན་འཛིན་མཚམས་སོགས་ཀྱི་
ཐད་ལ་ཕན་ཚུལ་དགག་གཞག་གི་ཚུལ་མཛད་པ་ལས། མཐར་ཐུག་གི་ལྟ་བ་ནི་འཕགས་པའི་མཉམ་གཞག་གིས་གཟིགས་
པ་ཇི་ལྟ་བ་བཞིན་སྤྲོས་བྲལ་ཆོས་ཀྱི་དབྱིངས་དེ་ཁོ་ན་ཉིད་འབའ་ཞིག་ཏུ་ཟད་དོ། ། རྗེས་མར་་་་་་་
———
Back