བོད་ཀྱི་ཆོས་བརྒྱུད་ཁག 4
02/09/2009 00:21༣༽ བཞེད་ཚུལ་སོ་སོའི་སྒྲུབ་བྱེད་ལུང་དང་བཅས་མཐར་ཐུག་གཅིག་ཏུ་འབབ་ཚུལ་དཔྱད་པའི་རིམ་པ།
ཀ༽ བདེན་སྟོང་ཙམ་དོན་དམ་མཐར་ཐུག་ཏུ་བཞེད་མིན་གྱི་ལུགས་གཉིས་དོན་ལ་གཅིག་ཏུ་འབབ་ལུགས། དེ་ལ་དང་པོ་བདེན་སྟོང་ཙམ་དེ་དོན་དམ་མཐར་ཐུག་མིན་པར་བཞེད་པ་རྣམས་ཀྱིས་ནི། དབུ་མ་རྒྱན་ལས། དམ་
པའི་དོན་དང་མཐུན་པའི་ཕྱིར། །འདི་ནི་དམ་པའི་དོན་ཞེས་བྱ། །ཞེས་བདེན་སྟོང་རྣམ་གྲངས་པའི་དོན་དམ་དུ་
གསུངས་པས་དོན་དམ་མཚན་ཉིད་པ་མིན་པར་བཞེད་པ་དང༌། རྣམ་གྲངས་མིན་པའི་དོན་དམ་འཆད་སྐབས། དེ་
ཉིད་ལས། སྐྱེ་ལ་སོགས་པ་མེད་པའི་ཕྱིར། །སྐྱེ་བ་མེད་ལ་སོགས་མི་སྲིད། །ཅེས་སྐྱེ་བ་དང་སྐྱེ་མེད་གཉིས་ཆ་བཀག་
པར་གསུངས་པ་དང༌། དེ་བཞིན་དུ་ཡེ་ཤེས་སྙིང་པོ་ཀུནས་ལས་བཏུས་ལས། །ཡོད་མིན་མེད་མིན་ཡོད་མེད་མིན།
།གཉིས་ཀའི་བདག་ཉིད་མིན་པའང་མིན། །ཞེས་དང༌། རྩ་ཤེས་ལས། ཡོད་ཅེས་བྱ་བ་རྟག་པར་འཛིན། །མེད་ཅེས་བྱ་
བ་ཆད་པར་ལྟ། །དེ་ཕྱིར་ཡོད་དང་མེད་པ་ལ། །མཁས་པའི་གནས་པར་མི་བྱའོ། །ཞེས་དང༌། སྟོང་ངོ་ཞེས་ཀྱང་མི་
བརྗོད་དོ། །མི་སྟོང་ཞེས་ཀྱང་མི་བྱ་ཞིང༌། །ཞེས་སོགས་དང༌། མདོར་ན། ཡུམ་བར་བ་ལས། །གཟུགས་སྟོང་ཞེས་བྱ་
བར་སྤྱོད་ན་མཚན་མ་ལ་སྤྱོད་དོ། །གཟུགས་མི་སྟོང་ཞེས་བྱ་བར་སྤྱོད་ན་མཚན་མ་ལ་སྤྱོད་དོ། །ཞེས་དང༌། མདོ་
སྡུད་པ་ལས། ཕུང་འདི་སྟོང་ཞེས་རྟོགས་ནའང་བྱང་ཆུབ་སེམས་དཔའ་ནི། །མཚན་མ་ལ་སྤྱོད་སྐྱེ་མེད་གནས་ལ་
དད་མ་ཡིན། །ཞེས་དང༌། མདོ་ལས། འོད་སྲུངས། བདག་ཅེས་བྱ་བ་འདི་ནི་མཐའ་གཅིག་གོ །བདག་མེད་ཅེས་བྱ་བ་
འདི་ནི་མཐའ་གཉིས་པའོ། །མཐའ་དེ་གཉིས་ཀྱི་དབུས་གང་ཡིན་པ་དེ་ནི་གཟུགས་མེད་པ། བསྟན་དུ་མེད་པ། ཞེས་
སོགས་ཁུངས་སུ་བྱས་ཏེ་སྟོང་པ་ཉིད་མཐར་ཐུག་པ་ནི། ཡོད་མེད་དང་ཡིན་མིན་ལ་སོགས་པའི་མཐའ་གང་དུ་ཡང་
བརྗོད་དུ་མེད་པའི་མཐའ་བཞི་སྤྲོས་བྲལ་ཞིག་ལ་འདོད་པ་ལས་བདེན་སྟོང་ཙམ་དེ་དོན་དམ་མཐར་ཐུག་མིན་ཞེས་
བཞེད་དོ། བདེན་པར་གྲུབ་པས་སྟོང་ཙམ་དོན་དམ་མཐར་ཐུག་ཏུ་དགོངས་པ་རྣམས་ཀྱིས་ནི། ཚིག་གསལ་ལས།
འཇིག་རྟེན་དེ་ན་ཇི་སྙེད་སྒྲ་ཡོད་པ། །ཐམས་ཅད་དངོས་མེད་ཅི་ཡང་མེད་ཅི་ཡང་མེད་པ་ཞེས་བྱ་བ་ལ་སོགས་པ་
འབྱུང་བས་ན། མེད་པར་དགག་པ་བརྗོད་པ་འདོད་པའི་ཕྱིར། དངོས་པོ་མེད་པའི་དོན་ནི་རང་བཞིན་མེད་པའི་དོན་
ཡིན་ནོ། །ཞེས་སོགས་དང༌། རྗེས་སུ་དཔག་པ་དག་ནི་གཞན་གྱིས་དམ་བཅའ་བ་འགོག་པ་ཙམ་གྱི་འབྲས་བུ་ཅན་
ཡིན་ནོ། ཞེས་དང༌། ཁོ་བོ་ཅག་འདི་མེད་པ་དང་ཡོད་པར་མི་བསྒྲུབ་ཀྱི། གཞན་གྱིས་ཡོད་པར་བཏགས་པ་དང་མེད་
པར་བཏགས་པ་འགོག་སྟེ། མཐའ་གཉིས་བསལ་ནས་དབུ་མའི་ལམ་སྒྲུབ་པར་འདོད་པའི་ཕྱིར་རོ། ཞེས་མཐའ་གཉིས་
བཀག་ཙམ་གྱི་དབུ་མ་སྐབས་འདིའི་བསྒྲུབ་བྱར་གསུངས་པ་དང༌། སྔར་ཡོད་མེད་གང་དུ་ཡང་མི་བལྟ་བར་གསུངས་
པའི་མདོ་ཚིག་རྣམས་ལ་ཡང་དགག་བྱའི་ཁྱད་པར་དོན་གྱིས་སྦྱར་དགོས་ཏེ། ཤེས་རབ་སྙིང་པོ་ལས། ཕུང་པོ་ལྔ་པོ་དེ་
དག་ཀྱང་རང་བཞིན་གྱིས་སྟོང་པར་རྣམ་པར་ཡང་དག་པར་ལྟའོ། ཞེས་དང༌། ཡུམ་བར་བ་ལས། དེ་ཡང་འཇིག་རྟེན་
གྱི་ཐ་སྙད་ཀྱི་དབང་གིས་ཡིན་གྱི་དོན་དམ་པར་ནི་མ་ཡིན་ནོ། ཞེས་སོགས་དང༌། མདོ་ལས། གང་ཞིག་རྐྱེན་ལས་སྐྱེས་
པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། ཅེས་དང༌། དངོས་རྣམས་སྐྱེ་བ་ཀུན་རྫོབ་ཏུ། །དམ་པའི་དོན་དུ་
རང་བཞིན་མེད། །ཅེས་དང༌། མདོར་ན་ལང་གཤེགས་ལས། རང་བཞིན་གྱིས་མ་སྐྱེས་པ་ལ་དགོངས་ནས་ངས་ཆོས་
ཐམས་ཅད་སྐྱེ་བ་མེད་པོའོ་ཞེས་བསྟན་ཏོ།
ཞེས་སོགས་མདོ་མང་པོ་ཞིག་ལས་དགག་བྱའི་ཁྱད་པར་དངོས་སུ་སྦྱར་བ་བཞིན་གཞན་ལ་ཡང་དོན་གྱིས་སྦྱར་དགོས་
པ་དང༌། དེ་བཞིན་ཏུ་བསྟན་བཅོས་རྣམས་ལས་ཀྱང༌། དབུ་མ་རིན་ཆེན་ཕྲེང་བར། དེ་ལྟར་བདག་དང་བདག་མེད་པ།
།ཡང་དག་ཇི་བཞིན་དམིགས་སུ་མེད། ཅེས་དང༌། བསམ་གྱིས་མི་ཁྱབ་བར་བསྟོད་པ་ལས། རྐྱེན་རྣམས་ལས་ནི་འབྲས་
འབྱུང་བ། །མ་སྐྱེས་ལེགས་པར་ཁྱེད་ཀྱིས་གསུངས། །ངོ་བོ་ཉིད་ཀྱིས་དེ་མ་སྐྱེས། །དེ་ཕྱིར་སྟོང་པར་རབ་ཏུ་བསྟན། །ཞེས་
དགག་བྱའི་ཁྱད་པར་སྦྱར་ཏེ། ངོ་བོ་ཉིད་དམ་རང་བཞིན་གྱིས་གྲུབ་པའི་སྐྱེ་བ་དང་སྐྱེ་མེད་སོགས་མཐའ་གང་དུ་ཡང་
མ་གྲུབ་པར་གསུངས་པ་ལ་དགོངས་པར་བཞེད་པ་དང་གཞན་ཡང་དབུ་མ་རྒྱན་ལས། དམ་པའི་དོན་དང་མཐུན་པའི་
ཕྱིར། །ཞེས་སོགས་ཀྱི་དོན་ཡང༌། བདེན་པར་གྲུབ་པས་སྟོང་ཙམ་དེ་ཉིད། བློ་དོན་དམ་པ་ཞེས་སོགས་སྔར་དྲངས་པ་ལྟར་
དང༌། ལྷག་མཐོང་ཆུང་བ་དང༌། དེ་བཞིན་དབུ་མ་རྒྱན་གྱི་བརྗེད་བྱང་ལས། དམ་སོགས་བཅུ་གཉིས་ལ། ཞེས་སོགས་ཀྱི་
སྐབས་དེའི་འགྲེལ་ཚུལ་ལས་ཀྱང་རྟོགས་པར་འགྱུར་རོ། ཡང་དགག་བྱའི་བདག་གཉིས་ངོས་འཛིན་སྐབས། བཞི་བརྒྱ་
པར། འདི་ཀུན་རང་དབང་མེད་པ་སྟེ། །དེས་ན་བདག་ནི་ཡོད་མ་ཡིན། །ཞེས་པའི་ཐད་ཀྱི་འགྲེལ་བར། དེ་ལ་བདག་
ཅེས་བྱ་བ་ནི་གང་ཞིག་དངོས་པོ་རྣམས་ཀྱི་གཞན་ལ་རག་མ་ལས་པའི་ངོ་བོ་རང་བཞིན་ཏེ། དེ་མེད་པ་ནི་བདག་མེད་
པའོ། དེ་ནི་ཆོས་དང་གང་ཟག་གི་དབྱེ་བས་རྣམ་པ་གཉིས་སུ་རྟོགས་ཏེ། ཆོས་ཀྱི་བདག་མེད་པ་དང་གང་ཟག་གི་བདག་
མེད་པ་ཞེས་བྱའོ།
ཞེས་བདག་མེད་གཉིས་གཞི་ཆོས་ཅན་གྱིས་ཕྱེས་པ་ལས་དགག་བྱའི་ཁྱད་པར་མེད་པར་རང་དབང་བའི་ངོ་བོས་སྟོང་
པར་གསུངས་པ་སོགས་ཁུངས་སུ་མཛད་དོ། འོ་ན་ཁས་ལེན་དེ་གཉིས་དོན་ལ་མི་འགལ་ཚུལ་གང་ཞེ་ན། སྤྱིར་པཎ་
ཆེན་བློ་བཟང་ཆོས་རྒྱན་སོགས་སྔོན་བྱོན་མཁས་གྲུབ་གོང་མ་རྣམས་ཀྱི་གསུང་རབ་དང་ཞལ་གདམས་ཁག་ལས་མཐར་
ཐུག་གི་ལྟ་བ་གཅིག་ཏུ་འབབ་ཅེས་གསུངས་པ་ཆེས་མང་ནང་ཡང༌། འདིར་ཡིག་ཚོགས་བསྐྱུངས་ཕྱིར་རྒྱབ་རྟེན་དེ་དག་
གི་གསུང་འགོད་མི་དགོས་པར་རང་གི་རྨོངས་བློར་འཆར་ཚུལ་ཙམ་དོགས་སློང་གི་ཚུལ་དུ་བརྗོད་ན། དེ་ལ་བདེན་སྟོང་
ཙམ་སྟོང་ཉིད་མཐར་ཐུག་ཏུ་འདོད་མིན་གྱི་ལུགས་དེ་གཉིས་ཚིག་ཟིན་གྱི་ཆ་ནས་འགལ་ཡང་དོན་ལ་མི་འགལ་ཚུལ་
དངོས་ནི། དོན་དམ་མཐར་ཐུག་ཏུ་དགོངས་པའི་བདེན་སྟོང་ཙམ་དང་མཐའ་བཞི་སྤྲོས་བྲལ་གཉིས་མིང་མི་འདྲ་ཡང་
དོན་ལ་གཅིག་ཏུ་འབབ་ལུགས་དེ་ཡིན་མོད། འོ་ན་དེ་གང་ཞེ་ན། ལུགས་སྔ་མ་རྣམས་ཀྱིས་དོན་དམ་མཐར་ཐུག་འཆད་
སྐབས་སུ། འཇུ་མི་ཕམ་པ་ཆེན་པོས། སྐྱེ་བ་ཡོད་མེད་སོགས་མཐའ་ཐམས་ཅད་ལས་འདས་ཤིང་སྒྲ་དང་རྟོག་པའི་སྤྱོད་
ཡུལ་ཐམས་ཅད་སྤངས་པའི་འཕགས་པའི་མཉམ་བཞག་ཡེ་ཤེས་ཤིན་ཏུ་དྲི་མ་མེད་པའི་གཟིགས་དོན་ནི། རྣམ་གྲངས་
མ་ཡིན་པའི་དོན་དམ་བླ་ན་མེད་པ་ཡིན་ལ། དེའི་ངོ་ལ་ལྟོས་ན་ཁས་ལེན་ཀུན་དང་བྲལ་བ་ཡིན་ནོ། ཞེས་དང༌། ཀུན་
མཁྱེན་གོ་རམས་བ་ཆེན་པོས། སོ་སོ་སྐྱེ་བོའི་བློ་ཡུལ་ལས་འདས་པ་འཕགས་པའི་མཉམ་བཞག་ཟག་པ་མེད་པའི་ཡེ་
ཤེས་ཀྱིས་གཉིས་སུ་སྣང་བ་ནུབ་ཅིང༌། ཡོད་མེད་རྟག་ཆད་ལ་སོགས་པའི་མཐའ་གང་དུ་ཡང་མ་མཐོང་བ་ཉིད་དོན་
དམ་བདེན་པར་གསུངས་པའི་ཕྱིར། ཞེས་དང༌། མཐར་ཐུག་དཔྱོད་པའི་རིགས་ཤེས་ཀྱི་ངོར་ཡོད་མིན་མེད་མིན་གྱི་ལྟ་
བ་ཁས་བླངས་པ་ལ། ཞེས་སོགས་དང༌། ཀརྨ་པ་མི་བསྐྱོད་རྡོ་རྗེས། དམ་བཅའ་དང་ཁས་ལེན་དང་འདོད་པ་རྣམས་ནི་
ཡུལ་གང་ཡང་རུང་བ་ལ་མངོན་པར་ཞེན་པ་དང༌། དངོས་པོ་ལ་རྣམ་པར་རྟོག་པ་ལས་བྱུང་བ་ཡིན་ན། བདེན་པ་
གཉིས་ཀ་ཡང་རིགས་པས་དཔྱད་ན་རྙེད་པ་རྡུལ་ཕྲ་རབ་ཀྱི་ཆ་ཤས་བརྒྱ་སྟོང་དུ་བགོས་པ་ཙམ་ཡང་མེད་ཅིང༌། འཕགས་
པའི་མཉམ་བཞག་ལ་རྣམ་པར་རྟོག་པ་གང་ཡང་མི་མངའ་བས་དབུ་མ་པས་ཕྱོགས་གང་ཡང་ཁས་བླངས་པ་མེད་ཕྱིར།
ཞེས་དང༌། རྟེན་འབྲེལ་སྐྱེ་བ་མེད་པ་ནི་འཕགས་པའི་མཉམ་བཞག་གི་ཡུལ་དུ་ཡིན་ལ། ཞེས་སོགས་ཐམས་ཅད་ཀྱིས་
འཕགས་པའི་མཉམ་བཞག་གི་ངོར་དང༌། གནས་ལུགས་དཔྱོད་པའི་རིགས་ཤེས་ཀྱིས་དཔྱད་ངོར་མཐའ་བཞིས་སྟོང་
ཚུལ་གསུངས་པ་དང༌། མཐའ་བཞི་ཅིག་ཆར་དུ་ཁེགས་ཚུལ་ཡང༌། ལྟ་བའི་ཤན་འབྱེད་དུ། དེ་ལྟར་སོ་སོ་སྐྱེ་བོའི་
གནས་སྐབས་སུ། མཐའ་བཞིའི་སྤྲོས་པ་རེས་འཇོག་ཏུ་བཀག་ནས་བསྒོམས་པས། ཐེག་ཆེན་གྱི་མཐོང་ལམ་སྐྱེས་པའི་
ཚེ། མཐའ་བཞིའི་སྤྲོས་པ་ཅིག་ཆར་དུ་འགགས་ནས་རྟོགས་བྱའི་ཆོས་ཉིད་དང་རྟོགས་བྱེད་ཀྱི་བློ་གཉིས་སོ་སོར་མི་
སྣང་བར། བློ་དེ་ཉིད་སྤྲོས་བྲལ་དང་དབྱེར་མེད་པར་མངོན་དུ་གྱུར་པའི་ཡུལ་དེ་ཉིད་ལ། དོན་དམ་བདེན་པ་ཞེས་
པའི་ཐ་སྙད་བཏགས་པ་ཡིན་གྱི། དེའི་ཚེ་ཡང་དོན་དམ་བདེན་པ་འདིའོ་ཞེས་ཅུང་ཟད་ཀྱང་བཟུང་བར་བྱ་བ་མེད་
དོ། འདི་ལ་དགོངས་ནས་བཀའ་དང་བསྟན་བཅོས་དྲི་མ་མེད་པ་རྣམས་ལས། མ་མཐོང་བའི་ཚུལ་གྱིས་མཐོང༌། མ་
གཟིགས་པའི་ཚུལ་གྱིས་གཟིགས་ཞེས་སོགས་མང་དུ་གསུངས་སོ། ཞེས་གསལ་བར་གསུངས་པ་བཞིན། མཐའ་བཞི་
སྟེ་ཡོད་མཐའ་དང་མེད་མཐའ། གཉིས་ཀ་དང་གཉིས་མིན་བཅས་རིམ་གྱིས་ཁེགས་ནས་མཐར་འཕགས་པའི་མཉམ་
བཞག་ཡེ་ཤེས་ཀྱིས་མཐའ་གང་དུ་ཡང་མ་རྙེད་པའམ་མཉམ་བཞག་དེའི་ངོར་སྤྲོས་པ་ཐམས་ཅད་དང་བྲལ་བ་དེ་
ཙམ་ལ་མཐའ་བཞི་ཅིག་ཆར་ཁེགས་ཞེས་གསུངས་པ་ལས། མཐའ་བཞི་ཅིག་ཆར་བའི་དགག་བྱ་དམིགས་བསལ་བ་
ཞིག་མཛད་མེད་སྙམ། དེ་ལྟར་ན་རྗེ་བླ་མའི་དབུ་མའི་རྣམ་བཤད་ཆེན་མོར། དེ་ཁོ་ན་ཉིད་མངོན་སུམ་དུ་གཟིགས་
པའི་ཡེ་ཤེས་དེ་དོན་དམ་ཤེས་པ་དང༌། དོན་དམ་བདེན་པ་དེའི་ཤེས་བྱར་འཇོག་ཐུབ་ཀྱང༌། ཡེ་ཤེས་དེའི་ངོར་བྱ་
བྱེད་དེ་གཉིས་དང་བྲལ་བ་མི་འགལ་བ་ནི། བྱ་བྱེད་གཉིས་ནི་ཐ་སྙད་པའི་བློ་ཁོ་ནའི་ངོར་འཇོག་པའི་ཕྱིར་ཏེ། ཞེས་
གསུངས་པ་བཞིན་རྗེ་ཡབ་སྲས་ཀྱིས་ཀྱང་བདེན་སྟོང་དོན་དམ་མཐར་ཐུག་དང༌། མཉམ་བཞག་ཡེ་ཤེས་ཀྱིས་རྟོགས་
པར་བཞེད་པ་སོགས་ནི། རྗེས་ཐོབ་བམ་ཐ་སྙད་གཏན་ལ་འབེབས་སྐབས་ཀྱི་དབང་དུ་བྱས་ཏེ་དེ་ལྟར་ལན་མཛད་
པ་ལས། འཕགས་པའི་ཉམས་བཞག་གི་གཟིགས་ཚུལ་ལ་ནི། སྔར་རྣམ་གྲངས་མིན་འི་དོན་དམ་འཆད་ཚུལ་གསུངས་
པ་བཞིན་མཉམ་བཞག་རང་ཉིད་གཉིས་སྣང་གི་སྤྲོས་པ་དང་བྲལ་ཞིང༌། ཡུལ་དང་ཡུལ་ཅན་ཆུ་ལ་ཆུ་བཞག་གི་
ངང་ཚུལ་དུ་སོང་བས། མཉམ་བཞག་པ་རང་གིས་ནི་བདེན་སྟོང་རྟོགས་མ་རྟོགས་དང༌། གཞི་དེ་བདེན་གྲུབ་ཀྱིས་
སྟོང་མ་སྟོང་སོགས་ཀྱི་ལན་གང་ཡང་མི་མཛད་པར་བཞེད་པས། དེ་ལྟར་ན་ལུགས་དེ་གཉིས་གནད་གཅིག་ཏུ་སོང་
ངོ༌། འོ་ན་དགག་བྱ་ལ་ཁྱད་པར་མེད་ན་ལུགས་དེ་གཉིས་ལ་སོ་སོའི་སྐྱེ་བོས་དོན་དམ་མཐར་ཐུག་རྟོགས་པ་ཡོད་
མེད་ཀྱི་ཁྱད་པར་ཇི་ལྟར་འགྱུར་སྙམ་ན། དེ་ནི་ཀུན་མཁྱེན་གོ་རམས་པ་ཆེན་པོས། གནས་ལུགས་དཔྱོད་པའི་སོ་སྐྱེའི་
བློ་གྲོས་ཀྱིས། །མཐའ་བཞིའི་སྤྲོ་པ་ཅིག་ཆར་མི་ཁེགས་ཀྱང༌། །རེས་འཇོག་ཚུལ་གྱིས་བཞི་ཆར་བཀག་ནས་ནི། །ཚུལ་
བཞིན་བསྒོམས་པས་མཐོང་ལམ་སྐྱེས་པའི་ཚེ། །ལྟ་བ་ཆོས་དབྱིངས་མཐོང་བའི་ཐ་སྙད་མཛད། །ཅེས་གསུངས་པ་ལྟར།
ལུགས་སྔ་མ་རྣམས་ཀྱིས་ནི། མཐའ་བཞི་རིམ་ཅན་དུ་ཁེགས་ནས་མཐར་མཐའ་གང་དུ་ཡང་མ་རྙེད་པའམ་རང་གི་
བློ་ངོར་མཐའ་བཞི་ག་ཁེགས་པ་དེ་ལ་མཐའ་བཞི་སྤྲོས་བྲལ་རྟོགས་པའི་ཐ་སྙད་མཛད་ཡོད། དེ་ལྟར་ན་བློ་ངོ་དེར་
གཉིས་སྣང་གི་སྤྲོས་པ་ཡང་ཁེགས་དགོས་ཤིང༌། དེ་ལྟར་ཁེགས་པ་ནི་འཕགས་པའི་མཉམ་བཞག་གི་གནས་སྐབས་
ན་མ་གཏོགས་མེད་པ་རྗེ་ཡབ་སྲས་ཀྱིས་ཀྱང་བཞེད་དོ། ། རྗེས་མར་་་་་་་་་་་་་་་་
———
Back