བོད་ཀྱི་ཆོས་བརྒྱུད་ཁག 3
02/09/2009 00:17ག༽ དབུ་མ་པ་ལ་ཁས་ལེན་ཡོད་མེད་དམ་ཐ་སྙད་ཚད་གྲུབ་ཁས་ལེན་མིན་བཅས་བཤད་པ།འཇུ་མི་ཕམ་པའི་ངེས་
ཤེས་སྒྲོན་མེར། དེས་ན་དབུ་མ་ཆེན་མོ་ལ། །ཁས་ལེན་མེད་པ་རང་གི་ལུགས། །ཞེས་དང༌། དེས་ན་རང་གི་བཞེད་པ་ལ།
།དོན་དམ་གནས་ལུགས་གཞལ་བའི་ཚེ། །གཤིས་ལ་ཅིར་ཡང་མ་གྲུབ་ལྟར། །ཁས་ཀྱང་ཅི་ཞིག་ལེན་པར་བྱེད། །དེ་ཕྱིར་
གྲུབ་མཐའ་གནས་ལུགས་ཀྱི། །ཁས་ལེན་ཡིན་ཕྱིར་རྩོད་སོགས་ཚེ། །གཤིས་བཞིན་ཁས་ལེན་ཅི་ཡང་མེད། །ཅེས་པའི་ཚིག་
ཟིན་ལ་ལེགས་པར་མ་བརྟགས་ན། དབུ་མ་པ་ལ་ཁས་ལེན་མེད་པ་ལྟ་བུ་ཞིག་གསུངས་ཀྱང༌། ཐ་སྙད་ཚད་གྲུབ་ཁས་ལེན་
མིན་ཐད།དེ་ཉིད་ཀྱི་བརྒལ་ལན་ཉིན་བྱེད་སྣང་བར། ཐ་སྙད་དཔྱོད་པའི་ངོར་ཡུལ་རང་གི་ངོ་བོས་གྲུབ་པར་སྣང་ཡང་
དེས་ཡུལ་དེ་བདེན་གྲུབ་ཏུ་ག་ལ་འགྱུར་ཏེ། ཐ་སྙད་ཚད་མས་གྲུབ་པ་འཐད་དགོས་ལ། དེ་ཐ་སྙད་དཔྱོད་བྱེད་ཀྱི་ངོར་
ཡང་མ་གྲུབ་ན་གང་དུའང་གྲུབ་པར་མི་འགྱུར་རོ། ཞེས་དང༌། དེས་ན་ཐ་སྙད་ཚད་མས་གྲུབ་ཚུལ་ཡང་མ་དཔྱད་མ་
བརྟགས་པའི་འཇིག་རྟེན་གྱི་ངོར་གྲུབ་ཀྱི་བརྟགས་ཤིང་དཔྱད་ན་གྲུབ་པར་མི་འགྱུར་རོ། ཞེས་སོགས་དང༌། ཤེར་འགྲེལ་
ཀེ་ཏ་ཀར།སྣང་བའི་དངོས་པོ་ཙམ་ལ་ཡོད་མེད་དུ་རྩོད་པ་མིན་ཏེ་སྣང་བའི་ངང་ཚུལ་འགོག་པའི་དབུ་མ་པ་སུ་ཡང་
མེད་དོ། ཞེས་སོགས་དང༌། དབུ་མ་རྒྱན་གྱི་རྣམ་བཤད་དུ། དེས་ན་ཐ་སྙད་ཚད་གྲུབ་འདོད་པའི་ལུགས་ལ་བདེན་གཉིས་
ཕྱེ་སྟེ་སྨྲ་ཞིང༌། མ་ཕྱེས་པར་དཔྱད་ཙམ་གྱིས་དོན་དམ་དཔྱོད་པར་མི་འགྲོ་བའི་ཚུལ་ཤེས་པར་བྱའོ། ཞེས་སོགས་ཐ་སྙད་
ཙམ་གྲུབ་བམ་སྣང་ཙམ་མྱོང་ཙམ་དེ་ཐལ་འགྱུར་པའི་ལུགས་ལ་བཞེད་པར་མཛད་པས། སྔར་ངེས་ཤེས་སྒྲོན་མེར་དབུ་
མ་པ་ལ་ཁས་ལེན་མེད་པ་ལྟ་བུ་ཞིག་གསུངས་པ་དེ་ཡང༌། སྒྲས་ཟིན་ཇི་ལྟ་བ་བཞིན་དབུ་མ་ཆེན་མོ་འཕགས་པའི་མཉམ་
བཞག་གི་ངོར་ཁས་ལེན་མེད་པ་དང༌།ཡང་ན་དོན་དམ་གནས་ལུགས་ལ་དཔྱོད་པའི་སྐབས་གཤིས་ལུགས་ལ་ཅི་ཡང་མ་
གྲུབ་པ་ལྟར་ཁས་ཀྱང་ཅི་ཡང་མི་ལེན་ཞེས་འགྲེལ་དགོས་ཏེ། དེ་ལྟར་ན། དབུ་མ་རྒྱན་གྱི་རྣམ་བཤད་དུ། འཕགས་པའི་
མཉམ་གཞག་ཡེ་ཤེས་ཤིན་ཏུ་དྲི་མ་མེད་པའི་གཟིགས་དོན་ནི་རྣམ་གྲངས་མ་ཡིན་པའི་དོན་དམ་བླ་ན་མེད་པ་ཡིན་ལ།
དེའི་ངོ་ལ་ལྟོས་ན་ཁས་ལེན་ཀུན་དང་བྲལ་བ་ཡིན་ནོ། ཞེས་གསུངས་པ་དང་གནད་མཐུན་པར་འགྱུར་བས། དབུ་མ་ཐལ་
འགྱུར་པའི་ལུགས་ལ་ཁས་ལེན་མེད་ཅེས་འགྲེལ་མི་རུང་ངོ༌། སྤྱིར་ན་ཀླུ་སྒྲུབ་དགོངས་རྒྱན་དུ། མ་བརྟགས་མ་དཔྱད་
འཇིག་རྟེན་རྣམ་གཞག་དང༌། བརྟགས་ཤིང་དཔྱད་པའི་གྲུབ་མཐའི་གཞུང་ལུགས་གཉིས། །གཅིག་གི་རྩ་བ་གཅིག་ལ་
ཐུག་མཐོང་ནས། །ཐ་སྙད་ཚད་གྲུབ་འཇོག་ལ་བློ་མ་བདེ། །ཞེས་སོགས་གསུང་པ་བཞིན་སྔ་འགྱུར་པའི་མཁས་དབང་
དུ་མས་ཐ་སྙད་ཚད་གྲུབ་འགོག་པར་མཛད་པའང་ཡོད་དོ། ཀུན་མཁྱེན་གོ་རམས་པའི་དབུ་མ་ངེས་དོན་རབ་གསལ་
དུ། དབུ་མ་པར་རློམ་པ་ཁ་ཅིག དབུ་མ་པ་ལ་རང་ལུགས་ཀྱི་ཁས་བླངས་ཅི་ཡང་མེད་དེ་དབུ་མ་པ་ནི། ཞེས་པ་ནས།
ཞེས་འདོད་དོ། དེ་ལ་འཇིག་རྟེན་པའི་དོན་གང་ཡིན་ཞེས་འདྲི། ཞེས་སོགས་ཁ་ཅིག་གིས་དབུ་མ་པ་ལ་ཁས་བླངས་མེད་
ཅེས་སྨྲས་པར་དགག་པ་མཛད་པ་དང༌། ལྟ་བའི་ཤན་འབྱེད་དུ། མ་བརྟགས་པའི་དོན་ཡང་གནས་ལུགས་དཔྱོད་པའི་
རིགས་པས་མ་བརྟགས་པ་ཡིན་གྱི། ཐ་སྙད་པའི་ཚད་མས་མ་བརྟགས་པ་ནི་མིན་ཏེ། ཐ་སྙད་པའི་ཚད་མས་ཡིན་མིན་ཡོད་
མེད་ལ་སོགས་པ་ཇི་ལྟར་གཞལ་བ་ལྟར་རྣམ་གཞག་སོ་སོར་ཕྱེ་ནས་ཁས་བླངས་དགོས་པའི་ཕྱིར་རོ། ཞེས་དང༌། དབུ་མ་
ངེས་དོན་རབ་གསལ་དུ། ཁ་ཅིག་དབུ་མ་ཐལ་འགྱུར་པའི་ལུགས་ལ་ང་ཙམ་ཐ་སྙད་དུ་ཡོད་པ་འགོག་པ་ལ་བརྩོན་པ་ནི།
གཞན་གྱིས་ཁས་བླངས་པའི་རྒྱུ་མཚན་གྱིས་འགོག་པའམ། ཡང་ན་རང་ཉིད་ཀྱིས་འཇུག་པ་རྩ་འགྲེལ་མ་མཐོང་བར་ཟད་
དེ། ཞེས་སོགས་གསུངས། ཀརྨ་པ་མི་བསྐྱོད་རྡོ་རྗེས་ནི། དྭགས་བརྒྱུད་གྲུབ་ཆེན་དུ། ཁ་ཅིག་དབུ་མ་པ་ལ་དམ་བཅའ་ཡོད་
ཟེར་བ་མི་འཐད་དེ། ཞེས་དང༌། རང་ལུགས་ལ་དམ་བཅའ་མེད་པའོ་ཞེས་པ་དེའང་ཐལ་འགྱུར་པའི་རང་ལུགས་ཀྱི་ཁྱད་
ཆོས་སུ་མི་རུང་སྟེ། ཐལ་འགྱུར་པ་ལ་རང་ལུགས་འདི་ཡིན་སྨྲ་བམས་བརྗོད་པ་དང་བྲལ་ཞིང༌། དེས་དམ་བཅའ་མེད་པའོ་
ཞེས་ཀྱང་བསམ་བརྗོད་ཀྱིས་རྟོགས་པར་མི་བྱེད་པའི་ཕྱིར། ཞེས་སོགས་དང༌། ཀརྨ་པ་དབང་ཕྱུགས་རྡོ་རྗེའི་འཇུགས་ཊཱིཀ་
སྐལ་བཟང་དགའ་སྟོན་དུ། དེས་ན་དབུ་མ་པས་ཐ་སྙད་དུ་སྐྱེ་བ་ཁས་མི་ལེན་ཡང་དེས་ཐ་སྙད་གཞན་གྲགས་སུ་སྐྱེ་བ་སོགས་
ཀྱི་རྣམ་གཞག་ཙམ་ཁས་ལེན་པ་ལ་འགལ་བ་མེད་དེ། གཞན་གྲགས་སུ་ཁས་བླངས་པ་དེ་ནི་རང་ལུགས་མ་ཡིན་པར་གཞན་
གྱི་རྗེས་བརྗོད་བྱས་བྲག་ཆ་བཞིན་དུ་བརྗོད་པ་ཡིན་པའི་ཕྱིར། ཞེས་སོགས་དབུ་མ་པ་ལ་ཁས་ལེན་དང་ཐ་སྙད་ཚད་གྲུབ་
མེད་པ་གསལ་བར་གསུངས། རྗེ་ཙོང་ཁ་པའི་དབུ་མའི་རྣམ་བཤད་ཆེན་མོར། རྣམ་ཀུན་འཇིག་རྟེན་ཚད་མིན་ཞེས་པས་
ལུགས་འདིས་ཚད་མ་གཏན་མི་འདོད་པར་སྟོན་པས། ལུགས་དེ་ཡང་དག་པ་མ་ཡིན་ནོ་ཞེས་སྨྲ་བ་དང༌། ཁ་ཅིག་ལུགས་
དེ་ལེགས་སོ་ཞེས་སྨྲ་བ་གཉིས་ཀས་ཀྱང་སློབ་དཔོན་འདིའི་བཞེད་པ་མ་རྟོགས་བཞིན་དུ་སྨྲས་པས། རང་གི་དེ་ཉིད་སྟོན་
པ་ཙམ་དུ་ཟད་དེ། འཇིག་རྟེན་གྱི་མཐོང་བ་དེ་ཁོ་ན་ཉིད་ལ་རྣམ་པ་ཀུན་ཏུ་ཚད་མ་མིན་པར་བསྟན་པ་ལ། སྤྱིར་ཚད་མ་
མི་བཞེད་པར་གོ་འདུག་པའི་ཕྱིར་རོ། ཚད་མ་དང་གཞལ་བྱ་ཡང་ཚིག་གསལ་ལས་གསུངས་པ་ལྟར་ངོ་བོ་ཉིད་ཀྱིས་གྲུབ་
པ་བཀག་ནས། ལྟོས་འཇོག་གི་ཚད་མ་དང་གཞལ་བྱ་འཇོག་པར་བཤད་པ་ལྟ་བུར་བྱེད་དགོས་ཏེ་འོག་ཏུ་འཆད་པར་
འགྱུར་རོ་ཞེས་སོགས་ཐ་སྙད་ཚད་གྲུབ་ཡོད་ལུགས་གསལ་བར་གསུངས་པ་ཆེས་མང་ངོ༌། རྗེས་མར་་་་་་་་་་་་་་
———
Back