སྙིང་རེ་རྗེ

ལན་གཅིག་རྙེད་དཀའི་དལ་འབྱོར་ཐོབ་ཡོད་རུང༌།།

དགེ་སྡིག་དཔང་པོ་མི་ཤེས་སྙིགས་དུས་འདིར།།

དུག་གསུམ་སྤོང་མེད་ལས་བརྩམས་མི་ངན་ཚོ།།

ཕྱི་མའི་ལྔ་ལམ་འགྱུར་དུས་སྙིང་རེ་རྗེ།།

བརྒྱ་ཕྲག་བློ་གསལ་བུང་བ་ཤེས་བརྩོན་ཀྱང༌།།

འབུམ་ཕྲག་ཀླད་མེད་གཞོན་ནུས་རྐུས་ཤོར་ཏེ།།

སྨྱོ་གཏམ་འཇིག་རྟེན་སྐྱེལ་བའི་མི་ཚེ་དེ།།

ནམ་ཞིག་འགྱོད་གདུང་སྐྱེ་བ་སྙིང་རེ་རྗེ།།

རྩ་ཆེའི་རང་གི་སྐད་ཡིག་བརླག་དོར་ཡང༌།།

གཞན་སྐད་ཤེས་པའི་ཁེངས་དྲགས་རྒྱས་གྱུར་ཏེ།།

རང་སྐད་འཕྱ་སྨོད་ལས་བརྩོན་གཞོན་ནུ་ཚོ།།

མི་རིགས་མཐའ་བྲལ་གཏོང་བ་སྙིང་རེ་རྗེ།།

བོད་རིགས་གཞིས་བྱེས་གནས་སྟངས་ཐབས་སྡུག་ཀྱང༌།།

གཡོ་ཁྲམ་རྫུན་འབག་གྱོན་པའི་ལས་སྣེ་འགས།།

རང་དོན་གཅེས་ཏེ་གཞན་དོན་རྡོག་བརྫིས་བཏང༌།།

ལས་འབྲས་རླུང་ལ་བསྐུར་བ་སྙིང་རེ་རྗེ།།

དྲང་བདེན་འཐབ་རྩོད་སྤོལ་བའི་གདེང་སྤོབས་ཀྱང༌།།

མ་ཉེས་ཁ་གཡོག་རག་པའི་རྐྱེན་ངན་དེས།།

སྙིང་ཁོངས་དྲོན་པོར་གྲི་ལྕགས་རྒྱབས་པ་ལྟར།།

སྐྱོ་གདུངས་བཀླུབས་པའི་ཁོ་རང་སྙིང་རེ་རྗེ།།

དཀའ་སྡུག་བྱེ་བའི་ལོ་ཟླ་གསལ་ཡོད་རུང༌།།

ཆ་འཇོག་ཁྱི་མཐོང་ལྟར་སྣང་འཛིན་པའི་མི།།

ཕུག་ལ་འགྱོད་གདུངས་མེ་ལྕེ་འབར་བའི་དུས།།

ཅི་བྱེད་འདི་བྱེད་མེད་པ་སྙིང་རེ་རྗེ།།

གངས་ལྗོངས་ཕ་ཡུལ་སྐྱིད་ཉམས་འདོད་ཡོད་རུང༌།།

གཞན་ཡུལ་སླེབས་པའི་འདུན་སར་རེ་བཅངས་ནས།།

ལོ་ཟླ་འགྲིམས་དུས་གོད་ཆགས་རེ་ལྷག་པ།།

ནག་ཉེས་རྐང་ལ་འཛིན་པ་སྙིང་རེ་རྗེ།།

སྣ་ཚོགས་གཏམ་གྱི་སྨྱུག་གར་འཁྲབ་ཡོད་རུང༌།།

དོན་དམ་རང་ལ་ལེགས་བྱ་མེད་གྱུར་ཡང༌།།

ཉེར་གཅིག་དུས་རབས་ཀྱོག་མཚམས་ཆེད་དམིགས་ཏེ།།

མ་བཟོད་དྲང་བདེན་གཏམ་གླེང་ཕྱོགས་ལ་བསྐྱོད།།

སྤྱི་ལོ་༢༠༠༩ ཟླ་༡ ཚེས་༡༠ ཉིན་དཀོན་མཆོག་གིས།།