ཤིན་ཅང་གནས་ཚུལ།
16/07/2009 09:00
ཤིན་ཅང་དུ་དྲག་ཟིང་བྱུང་ནས་ཉིན་བཅུའི་རྗེས་ཀྱི་གནས་ཚུལ།
RFA རླུང་འཕྲིན་ཁང་།
ཤིན་ཅང་ཞེས་པའི་ཤར་ཏུར་ཀི་སི་ཐན་ནང་ཟིང་འཁྲུག་བྱུང་ནས་ཉིན་བཅུ་ཕྱིན་ཏེ་ད་ཆ་དམག་མིའི་བལྟ་རྟོགས་
ནན་པོའི་འོག་གནས་བཞིན་འདུག
༄༅༎རྒྱ་ནག་གིས་ཤིན་ཅང་ཞེས་འབོད་པའི་ཤར་ཏུར་ཀི་སི་ཐན་གྱི་རྒྱལ་ས་ཨུ་རུམ་ཆི་ནང་ཟིང་འཁྲུག་བྱུང་ནས་
ཉིན་གྲངས་བཅུ་ཕྱིན་ཏེ་རེས་གཟའ་ལྷག་པ་ཉིན་དམག་མིའི་བལྟ་རྟོགས་ནན་པོའི་འོག་ཟ་ཁང་དང་ཚོང་ཁང་
འགའ་ཞིག་འགོ་ཕྱེ་ཐུབ་འདུག ཕྱི་ཟླ་བདུན་པའི་ཚེས་ལྔ་ཉིན་ཁ་ཆེ་ཡུ་གུར་མི་རིགས་ཚོས་རྒྱ་ནག་གཟུང་གི་
བྱེད་ཕྱོགས་ལ་ནད་མི་ཐེག་པར་མི་མང་བརྒྱ་ཕྲག་མང་པོས་དུས་གཅིག་ཏུ་ལངས་ཏེ་འདས་པའི་ལོ་ངོ་བཅུ་ཕྲག་
མང་པོའི་རིང་བྱུང་མྱོང་མེད་པའི་གཞི་རྒྱ་ཆེ་བའི་ངོ་རྒོལ་ལས་འགུལ་སྤེལ་ཡོད་ཅིང་དེའི་ཉིན་རྗེས་མར་རྒྱ་ཧན་
མི་རིགས་སྟོང་ཕྲགམང་པོས་ལག་ཏུ་དབྱུགས་པ་དང་གྲི་སོགས་གོ་མཚོན་ཐོག་སྟེ་ཡུ་གུར་མི་རིགས་ལ་རྡུང་རྡེག་
བཏང་ཡོད་པ་རེད།
གང་ལྟར་གྲངས་མང་རྒྱ་ཧན་མི་རིགས་དང་གྲངས་ཉུང་ཡུ་གུར་མི་རིགས་གཉིས་དབར་གྱི་འཁོན་འཁྲུག་འདིའི་
ནང་མི་རྒྱུ་གཉིས་འཕྲོ་བརླག་ཕོན་ཆེ་ཕྱིན་ཡོད་པ་རེད། རྒྱ་ནག་གཞུང་འབྲེལ་གསར་འགྱུར་བརྒྱུད་ལམ་ཁག་གིས་
གསལ་བསྒྲགས་བགྱིས་པར་གཞིགས་ན་མི་གྲངས་༡༨༤རྐྱེན་ལམ་དུ་ཕྱིན་ཡོད་པ་དང་མི་གྲངས་༡༧༨༠ཐམ་པར་
རྨས་སྐྱོན་ཕོག་ཡོད་པ་རེད། འོན་ཀྱང་ཕྱི་སྡོད་ཡུ་གུར་མི་རིགས་ཀྱི་ཚོགས་སྡེ་ཁག་གིས་གོང་ཞུས་གྲངས་འབོར་
བདེན་པ་མིན་པ་དང་ཡུ་གུར་མི་རིགས་ལྔ་བརྒྱ་བརྒལ་བའི་ཚེ་སྲོག་ཤོར་ཡོད་ལུགས་གསལ་བསྒྲགས་གནང་ཡོད་
པ་རེད།
བདུན་ཕྲག་འདིའི་རེས་གཟའ་ཟླ་བ་ཉིན་ཡུ་གུར་མི་རིགས་གཉིས་ཀྱིས་རྒྱ་ཧན་མི་རིགས་ལ་ཆོས་དམག་རྒྱག་དགོས་
པའི་སྐུལ་སློང་བྱེད་སྐབས་དམག་མིས་མེ་མདའ་བརྒྱབ་སྟེ་མི་གཉིས་པོ་དེ་བསད་པ་མ་ཟད་གཞན་ཞིག་ལ་རྨས་སྐྱོན་
ཕོག་པའི་གནས་ཚུལ་བྱུང་འདུག རྒྱ་ནག་གཞུང་གིས་ཡུ་གུར་རང་སྐྱོང་ལྗོངས་ནང་ངོ་རྒོལ་བྱུང་བར་དྲག་གནོན་
ཚབས་ཆེ་བྱས་པར་རྒྱལ་སྤྱིའི་ནང་སྐྱོན་བརྗོད་དང་རྒྱ་ནག་གཞུང་གི་གཞུང་ཚབ་ལས་ཁང་ཁག་གི་མདུན་ངོ་རྒོལ་
ལས་འགུལ་སྔ་རྗེས་བྱུང་ཡོད་པ་རེད།
———
Back