རྙིང་མ།

                                             རྙིང་མ། རྙིང་མ་བའི་གྲུབ་མཐའ་ནི་བོད་ཀྱི་གནའ་རབས་ཀྱི་ནང་པ་སངས་རྒྱས་པའི་ཆོས་ཤིག་ཡིན་ཞིང་། དེ་ལ་བོད་

ཀྱི་བསྟན་པ་སྔ་དར་གྱི་ཆོས་ལུགས་ཞེས་བརྗོད་ཅིང་།    བསྟན་པ་ཕྱི་དར་གྱི་དུས་ལས་ལོ་བཞི་བརྒྱ་ལྷག་ཙམ་

དར་སྔ་བས་མིང་དུ་རྙིང་མའི་ཆོས་ལུགས་ཞེས་ཐོགས།     ཆོས་ལུགས་ཀྱི་ནང་དོན་ཐོག་ནས་བརྗོད་ན་མདོ་

ཕྱོགས་ཀྱི་བསྟན་པ་སྔ་ཕྱིའི་དབར་དབྱེ་བ་མ་མཆིས། སྔགས་ཀྱི་ཆ་ནས་མཚོན་ན། གསར་རྙིང་བར་དབྱེ་བྱ་ཕྲན་

བུ་ཡོད། དེའང་ཐེག་པ་རིམ་དགུར་གྲགས་པ་གསང་སྔགས་སྔ་གྱུར་བའི་ཆོས་ལུགས་ཞེས་ཆོས་རྒྱལ་ཁྲི་སྲོང་ལྡེའུ་

བཙན་གྱི་སྐུ་དུས་སུ་བོད་སྐད་དུ་ཐོག་མར་བསྒྱུར་ཞིང་།   སློབ་དཔོན་པད་མ་འབྱུང་གནས་ཀྱིས་དར་རྒྱས་སུ་

སྤེལ་བའི་རིང་ལུགས་འཛིན་མཁན་རྗེས་འབྲངས་དང་བཅས་པར་ཟེར་ཞིང་། རྙིང་ལུགས་ལ་ཐེག་པ་རིམ་དགུ་

ཡོད་པ་སྟེ།  ཉན་ཐོས།   རང་རྒྱལ།   བྱང་སེམས་ཏེ་སྤྲུལ་སྐུ་ཤཱཀྱ་ཐུབ་པས་གསུངས་པའི་ཐུན་མོང་གི་ཐེག་པ་

གསུམ་དང་། ཀྲི་ཡ། ཨུ་པ།   ཡོ་ག་སྟེ་ལོངས་སྐུ་རྡོ་རྗེ་སེམས་པས་གསུངས་པའི་གསང་སྔགས་ཀྱི་ཕྱིའི་ཐེག་པ་

གསུམ། བསྐྱེད་པ་མ་ཧྭ་ཡོ་ག  ལུང་ཨ་ནུ་ཡོ་ག།   རྫོགས་པ་ཆེན་པོ་ཨ་ཏི་ཡོ་ག་སྟེ་ཆོས་སྐུ་ཀུན་ཏུ་བཟང་པོས་

གསུངས་པའི་ནང་གི་ཐེག་པ་བླ་ན་མེད་པ་གསུམ་བཅས་སོ། 《ཐུའུ་བཀན་གྲུབ་མཐའ》ལས། རྙིང་མའི་

ཆོས་ཀྱི་སྙིང་པོར་གྱུར་པ་ནི་མན་ངག་རྗོགས་པ་ཆེན་པོར་གྲགས་པ་སྟེ། དེ་ལ་ཡང་སེམས་སྡེ་དང་། ཀློང་སྡེ་

དང་། མན་ངག་གི་སྡེ་གསུམ། སེམས་སྡེ་མ་བུ་བཅོ་བརྒྱད་ལས་ལྔ་བེེ་རོ་ཙ་ན་དང་། བཅུ་གསུམ་བི་མ་ལ་ལས་

བྱུང་། ཀློང་སྡེ་ཡང་བི་མ་ལ་ལས་བྱུང་ཞིང་། མན་ངག་གི་སྡེ་ལ་སྙིང་ཏིག་ཅེས་གྲགས་ཏེ་བེེ་རོ་ཉིད་ལས་བྱུང་

བའོ། ཞེས་གསུངས་ཤིང། དེའི་ཆོས་རྒྱུད་འཛིན་མཁན་རྣམས་ལ་རྙིང་མ་ཟེར་རོ། བོད་དུ་རྙིང་མའི་དགོན་པ་

གྲགས་ཆེ་ཤོས་སུ་ལྷོ་ཁ་ས་ཁུལ་གྱིས་བསམ་ཡས་གཙུག་ལག་ཁང་དང་།   རྡོ་རྗེ་བྲག སྨིན་གྲོལ་གླིང་བཅས་དང་། ཁམས་ཁུལ་དུ་རྫོགས་ཆེན་དགོན་དང་། ཀ་ཏོག་དགོན། དཔལ་ཡུལ་

དགོན་བཅས་ཡོད། ལོ་རྒྱུས་ཐོག་ཆོས་སྲིད་ཀྱི་ཚོགས་པ་ཕན་ཚུན་འཐབ་རྩོད་རྒྱུན་ཆད་མེད་པར་བྱུང་བའི་

དབང་གིས་རྙིང་མའི་དགོན་པ་མང་པོ་ཞིག་དགེ་ལུགས་པར་གྱུར་ཡོད།   གྲུབ་མཐའ་དེའི་ཉམས་ལེན་གྱི་

གཞུང་གཙོ་བོ་རྫོགས་པ་ཆེན་པོ་དང་། སྐྱབས་སུ་བཅོལ་ཡུལ་གཙོ་བོ་སློབ་དཔོན་པད་མ་འབྱུང་གནས་ཡིན།