བོད་ཀྱི་ཆོས་བརྒྱུད་ཁག 1
02/09/2009 00:04༄༅།། བོད་ཀྱི་ཆོས་བརྒྱུད་ཁག་གི་ལྟ་བའི་རྣམ་གཞག་མཐར་ཐུག་གཅིག་ཏུ་འབབ་ཚུལ་གླེང་བ།
མཁན་པོ་ཕུན་ཚོགས་སྤྲུལ་སྐུ།
༡༽ སྐབས་དོན་འཚོལ་བའི་དགོས་པ་རྒྱུ་མཚན་བཅས་སྔོན་གླེང་གི་རིམ་པ།
ྋདུས་རབས་ཉི་ཤུ་པའི་ནང་གངས་ཅན་འགྲོ་བའི་ལྷ་གཅིག་ཕྱག་ན་པདྨོའི་ཐུགས་རྗེ་དང་བཀའ་དྲིན་གྱི་
མཛད་རླབས་ཁོ་ནར་བརྟེན། གོ་ལ་ཧྲིལ་པོ་འདིར་ལྷན་དུ་འཚོ་བའི་འགྲོ་བ་སྤྱིའི་ཕན་གནོད་དང༌། ལྷག་པར་ནང་
སེམས་ཀྱི་བདེ་སྐྱིད་དང་འབྲེལ་ཆེ་བའི་བོད་བརྒྱུད་ནང་བསྟན་གྱི་འཕེལ་ཕྱོགས་རྒྱལ་མཚམས་མང་པོར་བརྒལ་བ་
དང་ལྷན། བོད་དུ་དར་བའི་ཆོས་བརྒྱུད་ཆེན་པོ་བཞི་ནང་ཕན་ཚུལ་བར་འབྲེལ་ལམ་དང༌། ལྟ་སྤྱོད་མཐར་ཐུག་གི་
དགོངས་དོན་གཅིག་ཏུ་གྲུབ་ཚུལ་སོགས་ཀྱི་ཐད་སྒོ་གང་ས་ནས་ཇེ་རྒྱས་དང་ཇེ་ལེགས་སུ་འགྲོ་བཞིན་ཡོད་ནའང༌།
ཆོས་བརྒྱུད་དེ་དག་གི་ལྟ་བའི་འབབ་སྟེགས་གཅིག་ཏུ་གྲུབ་ཚུལ་ཇི་བཞིན་མ་ཤེས་ཚེ། ཆོས་བརྒྱུད་རིས་མེད་ཅེས་པའི་
ཚིག་དེ་བརྒྱ་སྟོང་བགྲངས་ཀྱང་མིང་དོན་མཚུངས་པ་ཞིག་ཡོང་དཀའ་བར་བརྟེན། སྔར་ལོ་རྒྱུས་ཀྱི་བྱུང་བའི་ཁྲོད་
བཞག་པའི་ཆོས་བརྒྱུད་ནང་ཁུལ་འཐེན་འཁྱེར་གྱི་བག་ཆགས་ངན་པ་དེ་འབྱུང་འགྱུར་ཡང་ཅུང་ལྷག་མི་སྲིད་པ་
ཞིག་མིན། དེས་ན་ངེས་པར་ཤེས་དགོས་པ་ཞིག་ནི།
ཆོས་བརྒྱུད་དེ་དག་གི་མཐར་ཐུག་གི་ལྟ་བ་གཅིག་ཏུ་གྲུབ་ཙུལ་ཡང་སྐྱེས་བུ་སྒེར་གྱི་ཆོས་དང་ཆབ་སྲིད་ཀྱི་ཁེ་ཕན་
ཞིག་དང་འབྲེལ་ནས་གསར་དུ་བསྒྲུབས་པ་ཞིག་མིན་པར། དོན་དངོས་ལུང་རིགས་ཀྱི་རྒྱབ་རྟེན་ཚད་མ་དང༌། རིས་
མེད་གྲུབ་དབང་གོང་མ་དག་གིས་ལྟ་བའི་མྱོང་བཤད་ཁག་ལས་ཡིད་ཆེས་དང་ངེས་པ་སྐྱེ་དགོས་མོད། འོན་ཀྱང་ལྟ་
བ་གཏན་ལ་འབེབས་ཚུལ་གྱི་ཁྱད་པར་དང་ཁས་ལེན་འཛིན་མཚམས་ཀྱི་སྒྲས་ཟིན་མི་འདྲ་བའི་ཁྱད་པར་ཆེས་མང་
དུ་མཆིས་པར་བརྟེན། མཐར་ཐུག་གི་ལྟ་བའི་འབབ་སྟེགས་གཅིག་ཏུ་འཚོལ་བར་ཐུགས་སྣང་དང་དཔྱད་ཞིབ་མཛད་
མཁན་ཞིག་ཡིན་ཕྱིན། ྋལྷ་གཅིག་ཕྱག་ན་པདྨོ་མཆོག་གིས། ང་ཚོས་མཐུན་ཕྱོགས་རྐྱང་རྐྱང་ནས་བཤད་བསྡད་པ་
ཙམ་མིན་པར། སྔོན་ལ་མི་མཐུན་པའི་ཕྱོགས་དེ་དག་གསལ་པོ་ཤེས་པར་བྱས་དེ་ནས་གང་ཞིག་ནས་མི་མཐུན་པའི་
ཚུལ་བཙལ་ཏེ། མཁས་དབང་ཕན་ཚུན་དབར་དགག་གཞག་མཛད་པའི་དགོངས་པ་བཞེས་ཕྱོགས་ལ་ཞིབ་བསྡུར་
གྱིས་དགོས་པ་རྒྱུ་མཚན་གང་ཞིག་ལ་ཐུག་མིན་འཚོལ་རྒྱུ་ཆེས་གལ་ཆེ་ཞིང༌།
དེ་རྗེས་མཐར་ཐུག་གི་དགོངས་པ་འབབ་ས་གང་ཡིན་ཤེས་པ་ཞིག་བྱུང་ན་ཕན་ཐོགས་ཡོད། ཅེས་གསུངས་པ་བཞིན།
དགག་བྱ་ངོས་འཛིན་གྱིས་མཚོན་གནད་མང་པོ་ཞིག་ལ་མཁས་གྲུབ་གོང་མ་རྣམས་ཀྱིས་ཕན་ཚུལ་དགག་གཞག་གི་
རིགས་ལམ་འདྲ་མིན་ཞིག་མཛད་པར་སྣང་ནའང༌། དེ་ནི་དཔེར་ན་གནས་ངེས་ཅན་ཞིག་ཏུ་འགྲོ་བར་ལམ་བུ་མི་
འདྲ་བའི་ཁྱད་པར་ཡོད་པ་བཞིན་ལྟ་བ་གཏན་ལ་འབེབས་ཚུལ་གྱི་རྣམ་གཞག་མི་འདྲ་བ་ཙམ་ལས། མཐར་ཐུག་གི་
གྲུབ་དོན་གཅིག་ཏུ་སོང་ལུགས་རྟོགས་དགོས་པ་ཆེས་གལ་ཆེ། ཁས་ལེན་འཛིན་མཚམས་མི་འདྲ་བ་དེ་བཞིན་གང་
ཞིག་རང་གི་རྨོངས་བློར་འཚམས་མིན་གྱི་རྟོག་འཆར་རེ་ཡོད་ཀྱང༌། འདིར་མཐུར་ཐུག་གི་ལྟ་བ་གཅིག་ཏུ་འབབ་
ལུགས་དེ་སྐབས་དོན་འཚོལ་བ་དངོས་ཡིན། སྤྱིར་མདོ་རྒྱུད་གང་གི་སྐབས་སུ་ཡང་ཀུན་རྫོབ་དང་དོན་དམ་གྱི་རྣམ་
གཞག་འཇོག་ཚུལ་སོགས་བཞེད་ཕྱོགས་མི་འདྲ་བ་མང་དུ་མཆིས་ཀྱང༌། འདིར་ཆོས་རྗེ་ས་པཎ་གྱིས། ཉན་ཐོས་དང་
ནི་ཐེག་ཆེན་ལ། །ལྟ་བའི་རིམ་པ་ཡོད་མོད་ཀྱི། །ཕ་རོལ་ཕྱིན་དང་གསང་སྔགས་ལ། །ལྟ་བའི་དབྱེ་བ་བཤད་པ་མེད།
།ཅེས་གསུངས་པ་ལྟར་མདོ་སྔགས་ཐུན་མོང་གི་ལྟ་བ་གཏན་ལ་འབེབས་སྐབས་ཀྱི་དཀའ་གནད། བདེན་སྟོང་ཙམ་
དོན་དམ་མཐར་ཐུག་ཏུ་འདོད་མིན་དང༌། གཞི་དེའི་སྟེང་དུ་དགག་བྱ་བདེན་གྲུབ་ཁེགས་ཚེ་གཞི་དེ་ཁེགས་དགོས་
མིན། ཐ་སྙད་ཚད་གྲུབ་ཁས་ལེན་མིན་བཅས་ཀྱི་སྐོར་ལ་བཤད་ཐབས་རིམ་པ་བཞིའི་སྒོ་ནས་ཅུང་ཙམ་དཔྱད་པར་
བྱེད་ལ། དེ་ལ་ཡང་ཆོས་བརྒྱུད་རང་རང་གི་སློབ་དཔོན་རྣམ་པའི་ནང་ཁུལ་གྱི་བཞེད་མཚམས་མི་འདྲ་བ་ཡོད་ཀྱང་
འདིར་སྔ་འགྱུར་པའི་མཁས་པའི་དབང་པོ་འཇུ་མི་ཕམ་པ་དང༌། ས་སྐྱ་པའི་ཀུན་མཁྱེན་གོ་རམས་པ། བཀའ་བརྒྱུད་
པའི་ཀརྨ་པ་མི་བསྐྱོད་རྡོ་རྗེ། དགེ་ལྡན་པའི་རྗེ་ཡབ་སྲས་སོགས་ཀྱི་བཞེད་པ་གཙོར་བཟུང་གིས་བསྡུས་ཏེ་
འཆད་ཁུལ་བགྱིའོ། ། རྗེས་མར་་་་་་་་
———
Back