སློབ་གསོ་གཅིག་གྱུར།
15/11/2008 22:06
རྒྱ་ནག་གིས་བོད་ཀྱི་ས་ཁུལ་མང་པོ་ཞིག་ཏུ་སློབ་གསོ་གཅིག་གྱུར་ལ་ཁ་གཡར་ཏེ། གཞི་རིམ་སློབ་ཆུང་མང་པོ་ཞིག་ཏུ་རྒྱ་ཡིག་མཁོ་ནའི་ཁྲིད་གཞི་ལག་བསྟར་བྱ་འཆར་ཡོད་པ་དང༌། གྲོང་གསེབ་ཁག་གི་སློབ་ཆུང་མང་པོ་ཞིག་སྒོ་རྒྱག་བཞིན་ཡོད་འདུག་ཟེར།
བོད་ནས་ཁ་པར་བརྒྱུད་འདི་གའི་གསར་འགོད་པར་གནས་ཚུལ་མཁོ་སྤྲོད་བྱས་དོན་ལྟར་ན། སྤྱི་ཟླ་ ༡༠ པའི་ཟླ་མགོ་ནས་བཟུང༌། རྒྱ་གཞུང་གིས་བོད་མདོ་སྨད་མཚོ་སྔོན་ཞིང་ཆེན་ཁོངས་གཏོགས། བ་ཡན་རྫོང་དང་ཡ་རྫི་རྫོང༌། གཅན་ཚ་རྫོང་སོགས་སུ་སློབ་གསོ་བསྒྱུར་བཅོས་དང༌། སློབ་གསོ་གཅིག་གྱུར། སློབ་གསོ་ལེགས་བཅོས་བཅས་ལ་ཁ་གཡར་ཏེ། སློབ་ཚན་ཡོངས་རྒྱ་ཡིག་ཏུ་སྒྱུར་བཞིན་ཡོད་པ་དང༌། བྱིས་པ་རྣམས་ངེས་པར་དུ་ས་ཁུལ་སོ་སོའི་ཞིང་གི་ལྟེ་བའི་སློབ་གྲྭར་ཡོང་དགོས་ཚུལ་བརྗོད་དེ། གྲོང་སྡེ་དང་གྲོང་གསེབ་ཁག་གི་སློབ་ཆུང་མང་པོ་ཞིག་སྒོ་རྒྱག་ཏུ་བཅུག་ཡོད་འདུག
རྒྱ་གཞུང་གི་འབྲེལ་ཡོད་ཚན་པས་སློབ་ཆུང་ཁག་གི་ལོ་རིམ་དང་པོ་ནས་ལྔ་པའི་བར་གྱི་སློབ་མ་རྣམས་ཞང་གི་ལྟེ་བའི་སློབ་གྲྭར་བསྐྱལ་དགོས་ཚུལ་གྱི་བཀའ་ཁྱབ་བཏང་ཡོད་སྟབས། སློབ་ཕྲུག་གི་ཁྱིམ་བདག་ཚོར་བྱིས་པ་ཕར་བསྐྱལ་ཚུར་ལེན་ཐད་དཀའ་ངལ་ཆེན་པོ་འཕྲད་དེ། ཁྱིམ་བདག་མང་པོ་ཞིག་གིས་སློབ་ཕྲུག་སློབ་གྲྭ་ནས་ཕྱིར་འཐེན་བྱེད་ཀྱིན་ཡོད་པ་དང༌། འཚོ་བའི་མཐུན་རྐྱེན་ཅུང་བཟང་བའི་ཁྱིམ་ཚང་དག་གིས་དགེ་རྒན་ཚུར་སྐད་བཏང་སྟེ། བྱིས་པར་སློབ་གསོ་སྤྲོད་ཀྱིན་ཡོད་ཀྱང༌། ཆ་རྐྱེན་སྐྱོ་བའི་ཁྱིམ་ཚང་དག་གི་བྱིས་པའི་སློབ་སྦྱོང་གི་སྐལ་བ་ཆད་དེ་ཁྱིམ་དུ་ལྷག་ཡོད་འདུག དེ་བཞིན། ཀན་ལྷོ་རྨ་ཆུ་ས་ཁུལ་ཏུའང་ཉེ་སྔོན་སྒྲིག་གཞི་དེ་ལག་བསྟར་བྱས་ཏེ། སློབ་ཆུང་ཁག་གི་སློབ་ཚན་ཡོངས་རྒྱ་ཡིག་ཏུ་བཅོས་སྒྱུར་བྱས་ཡོད་འདུག གནས་སྟངས་འདིའི་ཐད་བོད་ནང་གི་བོད་མི་མང་པོ་ཞིག་ལ། དངས་སྐྲག་དང་བློ་འཚབ་ཆེན་པོ་ཡོང་བཞིན་ཡོད་ཚུལ་སོགས་བརྗོད་སོང༌།
