སྙིང་སྡུག་ལགས།
30/07/2009 08:45
སྙིང་སྡུག་ལགས།
དྲན་སྣང་གི་ཡུལ་དུ་ལྷམ་མེད་འཆར་བ་
ཁྱེད་ཀྱི་འཛུམ་དམུལ་དམུལ་གྱི་ཞལ་མདངས་
རྟོག་འཆར་དང་བསམ་གཞིག་གི་ཡུལ་ནས་
ནམ་ཡང་རེ་ཞིང་སྒུག་པ་སྟེ་་་་་་་་་་་་་་་་་བརྩེ་དུང་
ལྷག་བསམ་དང་ལྷད་མེད་ཀྱི་ཞིང་ན་
འདི་ནི་ཁྱེད་ལ་འབུལ་འདོད་པ་དེ་ཁོ་ན་
འདི་ནི་ང་ལ་ཡོད་དེ་གཅིག་པུ་
ད་དུང་ འདི་ནི་བཤད་འདོད་པའི་སྐད་ཆ་
འོན་ཀྱང་ འདི་ནི་དྲན་ཡུལ་དུ་སྦས་པའི་ གསང་བ་ཉག་གཅིག་
འདི་ནི་ཆེས་ཐོག་མའི་སེམས་ཀྱི་རྨ་ཁའང་ཡིན།
སྙིང་སྡུག་ལགས།
རྨི་ལམ་གྱི་ཞིང་ནས་ཁྱེད་ཀྱི་ཟུར་མིག་གི་གཡོ་འགུལ་རེ་དྲན་དུས།
བརྗོད་མ་ཐུབ་པའི་སེམས་ཚོར་དང་
བཤད་མི་ཤེས་པའི་གདུང་བ་ དབུགས་རིང་གྲངས་མེད་དང་ལྷན་དུ་ཐོན།
ད་དུང༌། ལག་ཐོག་ཁ་དཔར་འཇུ་ཐེངས་རེ་རེར་
དྲན་དུང་གི་སྡུག་ཡུས་
སེམས་ཁུང་གི་འཕྲིན་ཐུང་རེ་བསྐུར་ནས་
འཁྲུལ་སྣང་དུ་བསུ་བའི་རབ་རིབ་ཀྱི་ཁྱེད་ལ་བཤད་དུས་
སེམས་པ་འདི་ཧ་ཅང་བདེ་སྣང་ཞིག
སྙིང་སྡུག་ལགས།
སེམས་པ་ནང་དུ་བཀུག་ནས་འདང་རེ་རྒྱག་སྐབས་
ངས་ཚོར་བྱུང་ ད་གཟོད་
འདི་ན་ ང་ནི་སྔོ་ལྗང་མཛེས་སྡུག་བྲལ་བའི་དགུན་གཞུང་ཞིག་
འདི་ན་ ང་ནི་འོད་མདངས་ཞན་པའི་ཁེར་རྐྱང་གི་རྒྱུ་སྐར་ཞིག
སྙན་ངག་རེ་འབྲི་དུས་ སུས་ཀྱང་མ་རྟོགས་པའི་རྨ་ཁ་འདི་
ན་ཟུག་ཅི་འདྲ་ཆེ་ཨང་ སེམས་པ་འཁྱམ་པོ།།
སྤྱི་ལོ། ༢༠༠༨ ཟླ་༡༡ ཚེས་༡༨ ཉིན། དཀོན་མཆོག་ནས།།
———
Back