རྡུལ་ཕྲན་གཅིག་ཁོ་ནའི་སྟེང་གི་འཇིག་རྟེན།

རྡུལ་ཕྲན་གཅིག་ཁོ་ནའི་སྟེང་གི་འཇིག་རྟེན་ཞེས་པ་ནི་༧གོང་ས་མཆོག་གི་གསུང་རྩོམ་གྲགས་ཅན་ཞིག་ཡིན་ལ། དེབ་འདི་ཐོག་མར་༧གོང་ས་མཆོག་གི་གསུང་བསྒྱུར་བ་ཐུབ་བསྟན་སྦྱིན་པ་ལགས་ཀྱིས་དབྱིན་ཡིག་ནང་བྲིས་ནས་བཏོན་པ་དང་། དེབ་ཀྱི་ཁ་བྱང་གཤམ་མར་ཚན་རིག་དང་ཆོས་ལུགས་ཀྱིས་ང་ཚོའི་འཛམ་གླིང་ལ་ཞབས་ཞུ་སྒྲུབ་ཐབས་ཞེས་བཀོད་ཡོད་པ་རེད།

ངྷ་སར་གནས་སྡོད་བོད་རིགས་ན་གཞོན་བསྟན་འཛིན་རིག་བཟང་ལགས་ཀྱིས་དེབ་འདི་བོད་ཡིག་ནང་བསྒྱུར་ཏེ་ད་ཆར་འགྲེམ་སྤེལ་བྱེད་ཀྱིན་ཡོད་ལ། ཁོང་གིས་དེབ་འདི་བསྒྱུར་བའི་གསལ་བཤད་ཀྱི་ནང་བཀོད་དོན། ང་ཚོའི་སྤྱི་ཚོགས་ཀྱི་དེང་རབས་ཀྱི་རྣམ་པ་ནི། དཔལ་འབྱོར་དང་འཕྲུལ་ལས། འགྲིམ་འགྲུལ། གྱོན་ཆས་ཀྱི་དཔེ་གསར་ལྟ་བུ་འཚོ་བའི་མཐུན་རྐྱེན་ཁོ་ནའི་སྟེང་དུ་འཇོག་མི་རུང་ཞིང་། སྲོལ་རྒྱུན་གྱི་བསམ་བློའི་དཔལ་ཡོན་ལ་ལྟ་སྟངས་གསར་པ་ཞིག་བཟུང་ནས་འདུ་ཤེས་གསར་པ་ཞིག་འཚོལ་རྒྱུ་ནི་དེའི་གྲུབ་ཆ་མེད་དུ་མི་རུང་བ་ཞིག་རེད། རྡུལ་ཕྲན་གཅིག་ཁོ་ནའི་སྟེང་གི་འཇིག་རྟེན་ཞེས་པའི་གསུང་རྩོམ་འདིས་ང་ཚོའི་སྲོལ་རྒྱུན་གྱི་བསམ་བློའི་དཔལ་ཡོན་ལ་དུས་རབས་ཉེར་གཅིག་པ་དང་འཚམ་པའི་སྤྱི་སྡོམ་བརྒྱབ་ཅིང་། དུས་རབས་གསར་པའི་འདུ་ཤེས་དེའི་འཚོལ་སྙེག་ལ་མཚན་ཉིད་རིག་པའི་སྒྲོམ་གཞི་ཞིག་གཏན་འབེབས་བྱས་ཏེ་ཚན་རིག་གི་འཇིག་རྟེན་དེར་ལེགས་ཉེས་དབྱེ་འབྱེད་ཀྱི་སྒོ་ནས་ང་ཚོར་སྣེ་ཁྲིད་བྱེད་པའི་ནུས་པ་ངེས་ཅན་ཞིག་ལྡན། གུས་པས་གསུང་རྩོམ་འདི་བསྒྱུར་བའི་དམིགས་ཡུལ་ཡང་དེ་ཉིད་ཡིན། ཅེས་བཤད་འདུག

ཁོང་གིས་གསུང་རྩོམ་འདི་ངོ་སྤྲོད་བྱས་དོན། ཚན་རིག་དང་སེམས་དོན་རིག་པ་མཉམ་སྦྲགས་ལས་གྲུབ་པའི་ཆེད་རྩོམ་འདི་ནི། ནང་བསྟན་གྱི་མཚན་ཉིད་རིག་པ་དང་ཚན་རིག་གཉིས་ཀའི་གཞི་རྩའི་ལྟ་བ་དང་། རྣམ་གཞག་དང་བརྟག་ཐབས། དེ་བཞིན་དུས་རབས་ཉེར་གཅིག་པའི་མི་རྣམས་ལ་འཕྲད་པའི་ཀུན་སྤྱོད་ཀྱི་དཀའ་ངལ་སོགས་ཀྱི་གསལ་བཤད་ཞིབ་འབྲི་དང་། ཕན་ཚུན་ཞིབ་བསྡུར་ལས་བྱུང་བའི་དཔྱད་གླེང་གི་ཁྱད་ཆོས་ཀྱིས་ཕྱུག་པར་མ་ཟད། སྐད་ཆའི་ཉམས་འགྱུར་གྱི་ཆ་ནས་ཀྱང་བློ་གཟུ་བོར་གནས་པའི་བགྲོ་གླེང་གི་རྣམ་པ་ཆེས་ཆེར་ལྡན་པ་ཞིག་རེད་ཅེས་བཤད་འདུག

བསྟན་འཛིན་རིག་བཟང་ལགས་དང་ལྷན་དུ་གསུང་རྩོམ་འདི་བསྒྱུར་བའི་བརྒྱུད་རིམ་སྐོར་ལ་གླེང་མོལ་བྱུང་སྐབས་ཁོང་གིས་གསུང་རྩོམ་འདིའི་གལ་ཆེན་རང་བཞིན་དེ་དང་པོར་འཇོག་པ་དང་། ལྷག་པར་དུ་བར་སྐབས་ཤིག་ལ་ཁོང་གིས་གསུང་རྩོམ་འདི་བོད་ཡིག་ནང་བསྒྱུར་བའི་འགྱུར་གཞན་ཞིག་མཐོང་ཞིང་། འགྱུར་དེ་དང་མ་རྩོམ་གཉིས་གཞིབ་བསྡུར་གྱིས་ཀློག་སྐབས་འགྱུར་དེས་བློ་ཡིད་མ་ཚིམས་པར་ཁོ་རང་ཉིད་ཀྱིས་བསྒྱུར་བའི་ངལ་བར་བསྟེན་ཚུལ་སོགས་བཤད་བྱུང་ལ། འདིའི་སྐོར་ཁོང་གིས་བསྒྱུར་པ་པོའི་གསལ་བཤད་ནང་དུ་འདི་ལྟར་བཀོད་འདུག སྤྱིར་འདས་པའི་ལོ་ངོ་བརྒྱད་ལྷག་གི་རང་ཉིད་ཀྱི་སློབ་གཉེར་ལ་མཚོན་ན། ནུབ་ཕྱོགས་ཀྱི་མཚན་ཉིད་རིག་པ་དང་འཛམ་གླིང་གི་ལོ་རྒྱུས་སོགས་གཙོ་གནད་དུ་བཟུང་ཡོད་པས། འདི་འདྲའི་བརྩམས་ཆོས་ཤིག་བོད་བསྒྱུར་བྱེད་པའི་བསམ་བློ་འཁོར་མ་མྱོང་། འོན་ཀྱང་། ན་ནིང་གི་ཕྱི་ཟླ་བཅུ་པའི་ནང་གྲོགས་པོ་ཞིག་གི་ལག་ཏུ་གསུང་རྩོམ་འདིའི་བོད་འགྱུར་རགས་ཟིན་ཞིག་འདུག་ཅིང་། གུས་པས་དེ་དང་མ་དཔེ་གཉིས་ལ་ཞིབ་ལྟ་བྱས་ཏེ་སྒྱུར་སྟངས་ཀྱི་རིག་པ་འགའ་ཞིག་ལ་རྒྱུས་ལོན་བྱེད་དགོས་བསམས་ནས་ཞིབ་ཀློག་བྱེད་སྐབས། མ་དཔེའི་ཚིག་དོན་དང་ཁྱད་ཆོས་སོགས་ཇི་བཞིན་ཐོན་པར་ད་དུང་རྒྱང་ཐག་ཧ་ཅང་རིང་བའི་ཚོར་སྣང་སྤྲད། ལྷག་པར་རགས་ཟིན་དེའི་ལེའུ་ཞིག་ནི་མཐའ་མའི་གཏན་འབེབས་ཀྱི་ཚུལ་དུ་དུས་དེབ་ཅིག་གི་ནང་བཀོད་འདུག་པ་ཡང་མཐོང་བྱུང་སྟབས། གལ་འགང་ཤིན་ཏུ་ཆེ་བའི་གསུང་རྩོམ་འདིའི་མ་རྩོམ་གྱི་ཉམས་འགྱུར་དང་ཐག་ཉེ་བ་ཞིག་བསྒྱུར་ཐུབ་ན་ཅི་མ་རུང་སྙམ་པའི་བསམ་ཚུལ་ངང་ངམ་ཞུགས་ཀྱིས་བྱུང་། དེར་བརྟེན། ཚོད་ལྟའི་ཚུལ་དུ་པྲན་རང་ངོས་ནས་ཕྱི་ལོ་ ༢༠༠༧ ལོའི་ཕྱི་ཟླ་བཅུ་གཅིག་པ་ནས་བཟུང་ལས་ཀའི་ཞོར་དུ་གསུང་རྩོམ་འདི་བསྒྱུར་མགོ་བརྩམས་པ་དང་། ༢༠༠༨ ལོའི་ཟླ་གསུམ་པའི་ཟླ་མཇུག་ལ་རགས་ཟིན་དང་པོ་ཡོངས་སུ་རྫོགས་རྗེས་བོད་ཡིག་གི་ལམ་ནས་མི་སྣ་མང་པོ་ཞིག་ལ་ཞིབ་ཀློག་བྱེད་དུ་བཅུག་པ་ཡིན། འོན་ཀྱང་། དབྱིན་ཡིག་གི་མ་དཔེ་དང་བསྡུར་ནས་སྒྱུར་རྩོམ་འདི་ཀློག་མཁན་ཞིག་བཙལ་ཀྱང་མ་བརྙེད་པས། གལ་བཔ་ཆེ་ལ་ནན་ཏན་གྱི་ཚུལ་དུ་སྒྱུར་རྩོམ་འདི་གུས་པ་རང་ཉིད་ཀྱིས་མ་ཕྱི་དང་ཞིབ་བསྡུར་ཐེངས་བདུན་ལ་བྱས་པ་ཡིན་ཞེས་བཤད་འདུག

གསུང་རྩོམ་འདི་རྩ་བའི་ཆ་ནས། སྔོན་གླེང་དང་། ༼རྟོག་གཞིགས།༽ ༼ཚན་རིག་དང་འཕྲད་པ།༽ ༼སྟོང་ཉིད་དང་། ལྟོས་གྲུབ། ཁོན་ཏྲོམ་དངོས་ཁམས་རིག་པ།༽ ༼འབར་གས་ཆེན་མོ་དང་། ནང་པའི་ཐོག་མ་མེད་པའི་འཇིག་རྟེན།༽ ༼འཕེལ་འགྱུར་རིག་པ། ལས་ཀྱི་རྣམ་གཞག སེམས་ཅན་གྱི་འཇིག་རྟེན།༽ ༼ཤེས་པའི་གནད་དོན།༽ ༼ཤེས་པར་ཕྱོགས་པའི་ཚན་རིག༽ ༼ཤེས་པའི་རྣམ་གྲངས།༽ ༼ཀུན་སྤྱོད་རིག་པ་དང་། རིགས་རྒྱུན་གྱི་ཚན་རིག་གསར་པ།༽ མཇུག་སྡོམ་དུ། ༼ཚན་རིག་དང་། སེམས་དོན་རིག་པ། འགྲོ་བ་མི།༽ བཅས་ཚན་པ་བཅུ་གཅིག་གིས་གྲུབ་འདུག དེ་བཞིན་དུ་སྒྱུར་པ་པོ་བསྟན་འཛིན་རིག་བཟང་ལགས་ཀྱིས་ཟུར་བཀོད་ཀྱི་མཆན་འགྲེལ་ནང་དུ་ཚན་རིག་པ་ཕལ་ཆེ་བའི་ལོ་རྒྱུས་ཉུང་བསྡུས་དང་། ཚན་རིག་གི་བརྡ་ཆད་མང་པོ་ཞིག་ལ་ཁ་གསལ་ཚིག་ཉུང་དུ་འགྲེལ་བཤད་དང་བཅས་བཀོད་འདུག