རེ་སྒུག

              མཇལ་འཛོམས་ཀྱི་རེ་སྒུག

ཡིད་ཀྱི་ཆུ་གཏེར་གཡོ་བའི་དབྱངས་ཅན་མ།   །མ་འོངས་བསེལ་ལྡན་གངས་ཀྱི་རི་སུལ་མ།། 

མ་མཉམ་བརྩེ་བའི་གྲོགས་དེ་མ་མཇལ་བར།   །བར་ཆད་མཚན་མ་དབེན་པའི་ཤིས་པ་སྩོལ།།

 དྲི་ཞིམ་སྨན་ལྗོན་ཚར་དུ་དངར་ས།    །ས་མཐོའི་ཡུལ་གྱི་བརྩེ་བའི་སྙིང་གྲོགས།།

 གྲོགས་ཀྱི་བསམ་པ་ཅུང་ཟད་མཚོན་ཕྱིར།   །ཕྱིར་དྲན་ཞིག་གིས་འདི་ལྟར་ཐལ་སོང་།། 

དུང་བའི་སྙིང་གཏམ་བདུད་རྩིའི་ཟེགས་མ།   །མ་ལུས་འཇོ་བའིཁྱེད་ཀྱི་འཛུམ་ཞལ།།

 ཞལ་གྱི་སྟངས་སྟབས་བུ་ཆུང་བདག་ལ།    །ལ་འུར་ཕྱོགས་དང་སྙིང་གི་གྲོགས་གཅིག ། 

བསིལ་སྦྱིན་ཟླ་བའི་མཛེས་སྡུག་འཕྲོག་པའི།    །གང་སྐུར་ཉེར་འཚེས་རེག་པ་མེད་ན།། 

ལྷད་མེད་འཛུམ་དཀར་དགྱེསཔའི་ཀློང་ནས།   །དྲན་པའི་འཕྲིན་འདི་བརྩེ་བས་བཞེས་རོགས།།

 ལྔ་རིག་འོད་སྣང་འབད་པས་བསྩལ་ཀྱང་།    །དྲི་མེད་སེམས་ཀྱི་ངོས་སུ་མ་ཤར།། 

མ་འབད་འཆར་བ་ཁྱེད་ཀྱི་མཚར་སྡུག    །གསེར་མདོག་ཉི་མ་ལས་ཀྱང་གསལ་བ།། 

ཁྱེད་ཀྱིས་བྲིས་པའི་སྙན་ངག་ཐུང་ཐུང།     །གདངས་སུ་འགུགསཔའི་ཆོ་ག་བརྩམས་དུས།།

 དྲན་གདུང་མཆི་མས་མིད་པ་གང་བ།     །སུ་དང་གང་གིས་འགོག་ཐབས་མི་འདུག །

 སྙིངཔོས་དབེན་པ་འཁོར་བའི་གྲོང་ཞེས།    །ཐམས་ཅད་སྒྱུ་མའི་ཆོས་སུ་གསུངས་ཀྱང་།། 

ཡིད་ཀྱི་ཆུ་མོ་གཅིག་ཏུ་འདྲེས་པའི།     །གྲོགས་ལ་དུང་བ་བསྒྱུར་དུ་མ་བཏུབས།། 

སྙིང་རྗེའི་ལྷ་གཅིག་སྤྱན་རས་གཟིགས་མགོན།    །ཉམ་ཐག་འགྲོ་ལ་མིག་མི་ཟུམ་པའི།། 

གཏམ་དེ་བདེན་ན་བུ་ངའི་གདུང་བ།     །ད་དུང་མ་གཟིགས་ཅི་ཞིག་ཡིན་ནམ།།

 རིགས་མཐུན་བརྩེ་གྲོགས་ཁྱེད་དང་ང་གཉིས། །རི་ཆུ་སྟོང་གིས་བར་དུ་བཅད་ཀྱང་།།

 ཕན་ཚུན་མཛའ་གཅུགས་ལྷོད་པ་མེད་ན།    །མཇལ་འཛོམས་ཉི་མ་འཆར་བ་ཆོས་ཉིད།།

 འདབ་བརྒྱད་སྙིང་གི་དབུས་སུ་གནས་པའི།  །གཏམ་གྱི་རོལ་མོ་དཀྲོལ་འདོད་བྱུང་ཡང་།།

 ཡུན་རིང་བྲལ་བའི་མནར་ཆགས་ཟབ་མོས།   །འོད་དཀར་ཟླ་འཛུམ་རེ་ཞིག་བསྒྲིབས་སོང།།

                                                སྤྱི་ལོ་༢༠༠༩། སྤྱི་ཟླ་༠༥་ཚེས་༡༣་ཉིན་ལ།།  །།