འཚོལ་བཞིན་ཡོད།
02/01/2011 16:39
པདྨ་མེ་ཏོག ངས་ཁྱེད་རང་འཚོལ་བཞིན་ཡོད།
ས་སྒང་ལ་ཉི་འོད་ཕོག་པས།
གང་སར་སྙན་ངག་གི་འདབ་མ་བཞད་ཀྱིན་འདུག
ངས་ཀྱང་སྡོད་མ་ཚུགས་པར་སྙན་ངག་འབྲི་མགོ་བརྩམ་པས།
ཁྱེད་རང་སྙན་ངག་གི་ལྷ་མོ་ཡིན་པའི་གཏམ་རྒྱུད་གཞི་ནས་ཚོར།
པདྨ་མེ་ཏོག་་་་ ཁྱེད་རང་དངོས་གནས་སྙན་ངག་གི་ལྷ་མོ་ཞིག་ཡིན་ནམ།
སྐབས་རེར་ངས་རྨི་ལམ་ལས་བཏུས་པའི་སྙན་ངག་དེ་ཁྱེད་རང་ཡིན་ན་བསམ།
ལན་རེར་འགྲིན་པའི་སྒྲ་དབྱངས་ཀྱི་འགྱུར་ཁུགས་དེ་ཁྱེད་རང་ཡིན་ན་བསམ།
དངོས་གནས་སུ་ཞིག་ཡིན། སྙན་ངག་གི་ལྡེ་མིག་ཐོགས་པའི་བརྩེ་ལྡན་མ།
པདྨ་མེ་ཏོག་་་་ ཁོ་བོས་ཁེར་རྐྱང་གི་རྐང་ལམ་ཁྲོད་ནས། ཁོ་བོས་བྱིས་དུས་ལྟ་བུའི་སེམས་པས།
མཚམས་རེར་གནག་སྣུམ་གྱི་ལན་བུས་སྒེག་པའི་གཤིས་བཟང་མ་ལས་ཁྱེད་ཀྱི་སྙན་ངག་ཨེ་རྙེད་དྲན།
དུས་རེར་དཔྱིད་དཔལ་གྱི་ལང་ཚོ་བསུ་བའི་གཞན་གསོའི་གླུ་དབྱངས་ལས་ཁྱེད་ཀྱི་སྙན་ངག་རྟོཌ་ན་བསམ།
ཐེངས་རེར་དུང་སེམས་ཀྱི་ཝུ་ཆང་འཐུང་བའི་བཟི་ཁ་ལས་ཁྱེད་ཀྱི་སྙན་ངག་ཐོབ་ན་བསམ།
དེ་ལྟར་ན་ཡང་། གཤིས་བཟང་མ་ཁྱོད་་་་་་་་་་་་
ཅིའི་ཕྱིར་སྟོང་དབྱིངས་ཀྱི་ཉི་ཟླ་བཞིན་ཁོ་བོ་དང་རྒྱང་ཐག་རིང་་
མ་མཐར་ཡང་ཁོ་བོའི་འཛུམ་ཀོར་དུ་དད་གུས་ཀྱི་མིག་ཆུ་འཁྱིལ་དུས་
མཛེས་སྡུག་དང་སྙན་ངག་ལས་གྲུབ་པའི་ཞལ་རས་དེ་ཐེངས་གཅིག་སྟོན་དང་
པདྨ་མེ་ཏོག་་་་ ཁྱེད་རྟོག་བཏགས་མིན་པའི་འཕགས་མ་ཞིག་ཡིན་ན་
སྟོན་འཇུག་གི་སྡོང་ལོ་བཞིན་གོམ་འགྲོས་འཆོར་བའི་ང་ཚོར་
ཚོར་བ་ཟབ་པའི་སྙན་ངག་གི་སྒྱུ་རྩལ་ཞིག་གནང་དང་
ནམ་ཡང་དད་འདུན་ཁྲི་ཕྲག་གི་ཀློང་ནས་ལྷ་མོ་ཞིག་གི་བརྩིས་འདང་ཡོད།
དཀོན་མཆོག་ནས་སྤྱི་ལོ། ༢༠༡༡ སྤྱི་ཟླ། ༡ ཚེས། ༢ ཉིན་བྲིས་པ་དགེ། །།
———
Back