ཚེ་སྲོག་འོག་གི་རྒྱལ་དར།

ཚེ་སྲོག་འོག་གི་རྒྱལ་དར།

རྒྱལ་དར། བོད་ཀྱི་རྒྱལ་དར།     གངས་སེང་གི་དར་ཆ།   ངས་ལག་ལ་དམ་དུ་འཆང་ཡོད། འདི་ནི་བོད་གངས་ཅན་པའི་དངོས་ཡོད་ཀྱི་ལོ་རྒྱུས་ཀྱི་དཔང་རྟགས་ཡིན།   གངས་རི།    གངས་ཅན་པའི་ཚེ་སྲོག་གིས་ཁྱེད་ཀྱང་དམར་པོ་ཆགས་ཉེན་ཡོད། 

རྒྱལ་དར། ངས་རང་ཉིད་ཀྱི་རྒྱལ་དར་འདིའི་སྟེང་དར་ཆ་སུ་གཅིག་ལངས་པ་མཐོང་འདོད་མེད།  

འདི་ནི་ང་ཚོའི་ཆ་ལུགས་ཡིན་ལ་འདི་ནི་རང་བཙན་གྱི་བདེན་དཔང་ཡིན། ནམ་ཞིག་ཁྱེད་ཉིད་གཅིག་བུ་རླུང་ལ་སྐྱོད་བཞིན་ཡོད་པའི་དུས་དེར་ང་ཚོའི་རྒྱལ་ཁ་ཡིན་ལ་ལོ་རྒྱུས་ཀྱི་རི་མོ་སླར་གསོ་བྱས་པ་ཡིན། ངས་ཁྱེད་ཉིད་དམ་དུ་བཅངས་ཡོད་ལ་ད་དུང་དམ་དུ་བཅངས་ཏེ་ཆས་འདོད་ཡོད། 

ང་ཚོའི་ཚེ་སྲོག་གི་འབོད་སྒྲ་ཁྱེད་ཡིན་ལ་ང་ཚོའི་བརླ་སྲོག་གི་རྒྱུན་ཐག་ཀྱང་ཁྱེད་ཡིན། 

ང་ཚོ་འདི་ལྟར་འགྲོ་འདོད་ལ་ང་ཚོས་འདི་ལྟར་འཚོལ་འདོད། མཐའ་ན་གངས་ཅན་པའི་ལོ་ཆུང་བྱིས་པ་ཞིག་ལ་ཐུག་ཀྱང་ཁྱེད་ཀྱི་སྟེང་ཞུམ་མེད་ཀྱི་དཔའ་ངར་དང་འགྲན་མེད་ཀྱི་སྙིང་སྟོབས་འོག་བསྐྱོད་ངེས། 

 ང་ཚོའི་ཚེ་སྲོག་ཁྱེད་ལས་བྱུང་ལ་ང་ཚོའི་ཚེ་སྲོག་ཁྱེད་ལ་དབང་།   གངས་ཅན་པ་གཅིག་གིས་འདི་ལྟར་འབོད་སྒྲ་སྒྲོག་བཞིན་གནས།   ཁྲག་གི་ཆུ་བོ། རོ་ཡི་རི་བོ།   བྱིས་པའི་ངུ་སྐད་ཀྱིས་གནམ་ས་བཀང་།    ཆེས་མྱ་ངན་ཐང་དེར་དར་ཆ་ཞིག་རླུང་གིས་སྐྱོད་བཞིན་གནས། འདི་ནི་མི་རིགས་འདི་མཇུག་རྫོགས་མེད་པའི་དན་རྟགས འདི་ནི་ང་ཚོའི་དཔའ་བོ་ཚོའི་བསླབ་བྱ་རེད།   དམར་ནག་གི་ཁྲག་ཁྲོད་ལས་གངས་ཅན་པ་ཞིག་གིས་འདི་ལྟར་བསམ།   ང་ཚོའི་མགོན་སྐྱབས་ཀྱིས་ད་དུང་ཁྱེད་ཕྱག་ལ་ཐོགས་ཡོད།      ང་ཚོའི་ཡུལ་གྱར་བ་གང་མང་ཞིག་གིས་ཁྱེད་ཕྱག་ལ་བསྣམ་ནས་སྐྱོད་ཀྱི་ཡོད།   འདི་ནི་ངའི་ཕམ་ཁ་ལས་ང་ཚོའི་ཕམ་ཁ་མིན།   རེ་བཅོལ་གྱི་བསམ་གཞིག་འདི་དག་འོག་སྣུམ་ཟད་ཀྱི་མར་མེ་ལྟར་མི་ཡུལ་ནས་ཁ་ཁར་བྲལ།  

        གངས་ཅན་པའི་དཔའ་རྒོད་ཀྱི་ཚོ་ཁག་གཅིག   རྟ་མཆོག་གི་རྨིག་སྒྲ་དང་ཀི་སྒྲ་ལས་དང་ཆ་དམར་པོ་ཞིག་དུམ་བུར་བཅད་དེ་ཁྱེད་ཉིད་མཐོན་པོ་བསྒྲེངས།     དགའ་སྤྲོ་དང་ལྷ་གསོལ་གྱིས་ཡུལ་འདིར་རྫོགས་ལྡན་གསར་བ་སླེབས་པའི་ཚོར་སྣང་ཁུར་བཞིན་གནས།     སང་ཉིན་གྱི་ད་མཚམས་འདི་དག་གི་རྨི་ལམ་ཁྲག་དྲི་དང་གཅར་རྡུང་འོག་དམྱལ་བ་མངོན་སུམ་མྱོང་བའི་ཚོར་སྣང་ཞིག    ད་དུང་དཔའ་ངར་དང་སྙིང་སྟོབས་འོག་ནམ་ཞིག་ལ་དར་ཆ་འདི་བསྒྲེངས་པའི་དཔའ་རྒོད་ཀྱི་ཚོ་ཁག་ཅིག་ཐོན་འོང་ལ་འདི་དག་གིས་ང་ཚོར་མགོན་སྐྱབས་གནང་ཡོང་།   དུས་དེར་ང་ཚོས་རང་ཉིད་ཀྱི་ཉི་གཞོན་དང་མཉམ་དུ་རྫོགས་ལྡན་གསར་བའི་འོད་སྟོང་མདུན་དུ་བསུ་ངེས་སྙམ། འདི་ལྟར་ཁྲག་ཁྲོད་ནས་མགོ་བོ་ཐུར་ལ་འགྱེད།   གངས་ཅན་པ་ཚོ་འཐབ་རྩོད་ནི་ཇི་ལྟར་རྩུབ་ལ་ཇི་ལྟར་སྡུག   དེ་རིང་ལས་ལོ་ངོ་ལྔ་བཅུའི་སྔོན་ང་ཚོའི་ཕ་མེས་ཚོས་སྡུག་བསྔལ་འདིའི་འོག་ཁྲག་གི་ལོ་རྒྱུས་བཀོད་ཡོད། དུས་འདིར་ཡང་གངས་ཅན་པས་སྡུག་བསྔལ་འདི་མི་ཡུལ་ལ་སླར་ཡང་འཁྱུད།    མ་འོངས་པའི་ལོ་ངོ་ཅི་ཞིག་ན་ཡང་བསྐྱར་འབྱུང་སྲིད།  

        ང་ཚོས་འདི་ལྟར་བརྙས་བཅོས་དང་སྡུག་བསྔལ་འོག་ལོ་རྒྱུས་ཀྱི་དྲན་ཤིང་རེ་བཀོད་ནས་རང་ཉིད་གང་ཞིག་དང་ཇི་ལྟར་བསམ་གཞིག་ཁྲོད་བསྐྱོད་འདོད་ཡོད།    ལོ་རྒྱུས་སྟེང་དཔའ་མཉམ་ལྡན་པའི་མི་རིགས་ཤིག་དེང་སྐབས་འདི་ལྟར་བསམ་གཞིག་དང་ཞི་དུལ་ཇི་ལྟར་ཆགས་པ་ཡིན།   འདས་པའི་ལོ་ངོ་ལྔ་བཅུ་ལ་སྡུག་པོ་དང་བཙན་གནོན་འོག་མི་ཡུལ་གྱི་ལ་ལུང་འགྲིམས་པས་སྡུག་བསྔལ་ལ་གནས་ཡོད།  དོན་དངོས་ནས་བརྗོད་ན་གཞན་ཡུལ་འགྲིམས་པ་ནི་སྡར་མའི་ངང་ཚུལ་ཡིན། རང་ཡུལ་ནས་རང་གི་གཡུལ་ས་བཟུང་སྟེ་འཐབ་རྩོད་བྱེད་པ་ནི་དོན་དངོས་ཀྱི་དཔའ་བོའོ།     མདོར་བསྡུས་ན་འཇིགས་བྲལ་གྱི་སྙིང་སྟོབས་ལྡན་པ་ནི་བོད་ནང་གནས་པའི་མི་རྣམས་ཡིན།     འདིར་རང་སྲོག་གཏོང་མཁན་གྱི་ཁ་ཕོ་འཐེན་མཁན་མང་ཡང་དོན་དངོས་ལ་བརྒྱ་ལས་གཅིག་ལྟར་ཆགས་བཞིན་ཡོད།   ཆ་རྐྱེན་དང་བསམ་ཚུལ་གང་མང་དབང་གིས་རང་ཉིད་ཀྱི་མཚན་སྙན་རྒྱས་ལ་རེ།     བོད་པ་ཚོ་འདི་ལྟར་ང་ཚོ་ག་ཙམ་བསྐྱོད་འདོད།    བོད་མིའི་ཁ་དཔེར།    ཝ་རྔ་མ་ཤ་ལེ་འབྲོ་བ་ལས། སྟག་འཛུམས་དྲུག་ཤ་ལེ་ཤི་ན་དགའ། ཞེས་་ལྟར་ང་ཚོ་ཡང་དཔའ་ངར་དང་སྙིང་སྟོབས་འོག་རང་ཡུལ་ལ་བོད་ཀྱི་རྒྱལ་དར་མཐོན་པོར་སྒྲེང་ཞིན་བསྐྱོད་འགྲོ།   ༢༠༠༨།༡༠།༤ དགོང་མོ་བྲིས།