མཐུན་སྒྲིལ།
21/12/2011 10:50
མཐུན་སྒྲིལ།
མཛེས་པའི་གངས་རི་ཞིང་ན། །
བཙན་པོའི་བོད་འདི་ཆགས་ཞིང་། །
བརྗིད་ལྡན་སྔོན་བྱུང་ལོ་རྒྱུས། །
འཛིན་མའི་ཁྱོན་ལ་ཁྱབ་འདུག །
བྱུང་ནས་ཡལ་བའི་ལོ་རྒྱུས། །
ད་ལྟའི་ཚབ་དུ་མེད་རུང་། །
འགྱུར་མེད་བདེན་པའི་དན་རྟགས། །
སེམས་ཀྱི་དཀྱིལ་དུ་འཛིན་དགོས། །
གངས་ཕྲུག་བུ་དང་བུ་མོ། །
སྡུག་ནས་སྐྱོ་བ་མ་བྱེད། །
མཐུན་པའི་གོམ་སྟབས་མཉམ་ན། །
སེམས་ཀྱི་འདུན་མ་འགྲུབ་ངེས། །
ང་ཚོ་གདོང་དམར་བོད་པར། །
མཐུན་སྒྲིལ་དཔུང་པ་མཉམ་གཤིབས། །
སླད་མེད་ལྷག་བསམ་ཡོད་ན། །
སྐྱིད་པའི་ཉི་ཟེར་འཛུམ་ཡོང་། །
མི་མཐུན་ནང་དམེའི་དུག་ཤིང་། །
རྩ་བ་རྩད་ནས་བཅད་དེ། །
ཞི་མཐུན་མི་ནུབ་རྒྱལ་མཚན། །
གངས་རི་ལྗོངས་སུ་སྒྲེངས་དགོས། །
མཐུན་སེམས་དུང་ཟླ་དཀར་པོ། །
ང་ཚོའི་སེམས་སུ་འཁྲུངས་ན། །
རྔམ་ནག་མུན་པ་སྟུག་པོ། །
རྒྱང་རིང་ཡུལ་ནས་བྲོས་འགྲོ །
ང་ཚོ་གདོང་དམར་བོད་པར། །
མཐུན་སྒྲིལ་དཔུང་པ་མཉམ་གཤིབས། །
སླད་མེད་ལྷག་བསམ་ཡོད་ན། །
སྐྱིད་པའི་ཉི་ཟེར་འཛུམ་ཡོང་། །
———
Back