བོད་རང་བཙན་

བོད་རང་བཙན་ཁ་སྣེ་ལྕེ་སྣེ་ན་འདུག ཁྲིན་ཕོ་ཁུང་།

བོད་རང་བཙན་ཁ་ནས་མི་གཏོང་བ་དེ། ཀྲུང་ནན་ཧེ་ཡི་བཤད་སྟངས་ཤིག་ཡིན་ནམ།

ཁྲིན་ཕོ་ཁུང་།
ཚེ་རིང་རྒྱལ་གྱིས་བསྒྱུར།

དུས་རབས་སྔོན་མའི་ལོ་རབས་སུམ་ཅུ་བའི་སྐབས་སུ། ཀྲུང་གུང་དམར་དམག་གིས་བོད་མདོ་ཁམས་ཀྱི་མཐའ་མཚམས་

ནས་སྲོག་བྱོལ་བྱེད་སྐབས། བོད་ཀྱི་ས་ཁོངས་སུ་འཛུལ་མྱོང་བར་མ་ཟད། བོད་མིའི་ལག་ནས་ཟ་འཐུང་ལྟོ་གོས་དང་སྡོད་

གནས་སོགས་གཡོ་བསླུ་བྱས་ཡོད། དེར་བརྟེན་མའོ་ཙེ་ཏུང་གིས་ཀྱང་། “ང་ཚོས་བོད་མི་རིགས་ཀྱི་ལག་ནས་མཁོ་དངོས་

རིགས་མི་འཁྱེར་ཐབས་མེད་དུ་གྱུར་རྐྱེན། རྗེས་ནས་ངེས་པར་དུ་བུ་ལོན་འཇལ་དགོས” ཞེས་དང་། “དེ་ནི་ང་ཚོས་ཕྱིའི་

རྒྱལ་ཁབ་ལ་ཆད་པའི་བུ་ལོན་གཅིག་པུ་དེ་ཡིན” ཞེས་བཤད་ཡོད་པ་དེས་ཀྱང་། སྐབས་དེར་མའོ་ཙེ་ཏུང་ཁོ་རང་ཉིད་

ཀྱིས་ཀྱང་བོད་ནི་ཕྱིའི་རྒྱལ་ཁབ་ཅིག་ཏུ་ངོས་འཛིན་བྱས་ཡོད་པ་གསལ་ཡོད།

ཕྱི་ལོ་ ༡༩༤༩ ལོར། ཀྲུང་གུང་དམར་དམག་གིས་བོད་ཀྱི་ས་ཁོངས་ལ་བཙན་འཛུལ་བྱས་རྗེས། བོད་གཞུང་གི་ངོས་ནས་

“གྲོས་ཆོད་དོན་ཚན་བཅུ་བདུན” ངོས་ལེན་གྱིས་ཆིངས་ཡིག་བཞག་པ་ཡིན་ན། བོད་ཀྱི་ཆོས་དང་རིག་གཞུང། ཆབ་སྲིད་

བཅས་ལ་དམིགས་བསལ་ལྡན་པའི་སྒོ་ནས།   བོད་རྒྱའི་དབར་ “རྒྱལ་ཁབ་གཅིག་ལ་ལམ་ལུགས་གཉིས”    ཀྱི་སྲིད་བྱུས་

གསར་བ་ཞིག་འཛུགས་རྒྱུ་ཁས་ལེན་བྱས་པ་རེད། ཡིན་ནའང་། ཀྲུང་གུང་རང་ཉིད་ནས་བཙན་གྱིས་གཏན་ལ་ཕབས་ཤིང་།

“བཙན་དབང་གི་འོག” ནས་འཇོག་དགོས་བྱུང་བའི་ཆིངས་ཡིག་ “གྲོས་ཆོད་དོན་ཚན་བཅུ་བདུན” དེ་ཡང་། ཀྲུང་གུང་

རང་ཉིད་ཀྱིས་བརྩི་འཇོག་མ་བྱས་པར་སྣང་མེད་དང་རྒྱབ་འགལ་བྱས་རྐྱེན།    ཕྱི་ལོ་ ༡༩༥༩ ལོར་བོད་མིའི་ཞི་བའི་སྒེར་

ལངས་ཆེན་མོ་བྱུང་བ་རེད། ཀྲུང་གུང་གིས་དྲག་ཆས་ཁོ་ནར་ཡིད་རྟོན་གྱིས་ཁྲག་དྲི་བྲོ་བའི་དྲག་གནོན་བྱས་ཤིང་། བོད་

མིའི་བླ་ན་མེད་པའི་དབུ་ཁྲིད་ཏཱ་ལའི་བླ་མ་འང་གཞན་ཡུལ་དུ་མི་གྱར་ཐབས་མེད་བྱུང་བ་རེད།

དེ་རྗེས་ཀྲུང་གུང་གིས་བོད་ཁུལ་དུ་དམར་གསོད་ཆེན་མོ་དང་།  མནར་གཅོད་དྲག་པོ།  གཏོར་བཅོམ་ཆེན་པོ། རྩ་མེད་

ཚབས་ཆེན་བཟོས་ཡོད་པ་དེ་ང་ཚོས་གསལ་བཤད་བརྒྱག་མ་དགོས་པར། ཕྱི་ལོ་ ༡༩༨༠ ལོར།  ཀྲུང་གུང་གི་མགོ་ཁྲིད་

ཧོའོ་ཡའོ་པང་གིས་བོད་ཁུལ་དུ་བལྟ་ཞིབ་བྱེད་སྐབས། བོད་དུ་བྱུང་བའི་བཀོད་ཆགས་ཆེན་པོ་དང་།   བོད་མི་རིགས་

ཀྱིས་མྱོང་བཞིན་པའི་བློ་ཡིད་ལ་མི་ཤོང་པའི་དཀའ་སྡུག་མཐའ་དག་མིག་མཐོང་ལག་ཟིན་བྱུང་རྗེས།  ཡ་ང་གནོང་

འགྱོད་སྐྱེས་ཏེ་ས་གནས་ས་ཁུལ་གྱི་ཀྲུང་གུང་ཏང་གི་ཆབ་སྲིད་མགོ་ཁྲིད་པ་ཚོར་ཚོགས་འདུ་བསྡུས་ཏེ་བཀའ་སློབ་གནང་

དོན། “ངེས་པར་ཏུ་བོད་ཁུལ་གྱི་འཚོ་བའི་གནས་སྟངས་དེ་ཕྱིི་ལོ་ ༡༩༥༩ ལོའི་ཡར་སྔོན་གྱི་འཚོ་བའི་ཆུ་ཚད་དུ་སླར་གསོ་

ཐུབ་པ་བྱེད་དགོས” ཞེས་བརྗོད་ཡོད་པ་དེས་ཀྱང་གསལ་བོར་བསྟན་ཡོད།

ཀྲུང་གུང་གིས་འདས་པའི་དུས་སུ་བོད་ནི་ “མུན་ནག་དང་། རྗེས་ལུས། ཀླ་ཀློ་ (རང་ཚོད་མེད་པའི་རྫུན་གཏམ་གནམ་

འོག་ལ་མི་ཤོང་པ་སྤྱད་ཡོད།) བཅས་ཀྱི་ཞིང་བྲན་ལམ་ལུགས་སྤྱི་ཚོགས” ཤིག་ཡིན་པའི་སྐྱོན་འཛུགས་བྱེད་བཞིན་ཡོད། དོན་དངོས་ཐོག་ཀྲུང་གུང་གིས་བོད་ལ་བཙན་འཛུལ་བྱས་པ་ནས་བཟུང་། བོད་ལ་བདེ་སྐྱིད་ཀྱི་ཉི་འོད་དང་། ཡར་རྒྱས་

ཀྱི་རྣམ་པ། ཤེས་རིག་འཕེལ་རྒྱས་སོགས་ཅི་ཡང་བྱུང་མེད་པར་མ་ཟད། དེ་ལས་ལྡོག་སྟེ། བོད་ནི་སྔར་ལས་མུན་ནག་དང་།

རྗེས་ལུས། ཀླ་ཀློ་བཅས་ཀྱི་གཡང་རོང་དུ་དེད་ཡོད། ཀྲུང་གུང་གི་མནར་གཅོད་འོག་གི་བོད་ནི། དངོས་གནས་ “ཞིང་བྲན་

སྤྱི་ཚོགས” ཤིག་ཏུ་གྱུར་ཡོད་པ་མ་ཟད། “མི་ཡུལ་གྱི་དམྱལ་ཁམས” ངོ་མ་དེ་ཆགས་ཡོད།

ད་ལྟའི་བར་དུ། བོད་ཆོལ་ཁ་གསུམ་དུ་དོན་རྐྱེན་སྔར་བཞིན་མཚམས་མ་ཆད་པ་འདིས། ཞིང་བྲན་ཡར་ལངས་ཀྱི་རྣམ་པ་

དེ་མཚོན་བཞིན་ཡོད།  ཡིན་ནའང་། ཀྲུང་གུང་ལ་མཚོན་ན་དེ་ནི་བློ་འགྱོད་སྤུ་ཙམ་ཡང་མེད་པའི་ཁ་ཞེ་གཉིས་མོས་ཀྱི་

དོན་ཞིག་ཏུ་གྱུར་ཡོད།    དེར་བརྟེན་ཀྲུང་གུང་གིས་བོད་དོན་ཐད་མཁྲེགས་བཟུང་གི་འདུ་ཤེས་ཁོ་ན་ལས་ཀུ་ཡངས་

གཏོང་བསམ་མེད་པ་དང་། དྲག་རྡུང་བྱེད་རྒྱུ་ལས་གྲོས་མོལ་བྱ་འདུན་མེད་པའང་གསལ་བོར་མངོན་ཡོད།

ཕྱི་ལོ་ ༡༩༧༨ ལོ་ནས་བཟུང་། ཏུན་ཞོའོ་ཕེན་ལ་ཀྲུང་གུང་གིས་བོད་ལ་འཛིན་པའི་གཡོན་ལྷུང་སྲིད་ཇུས་དེར་ཡོ་བསྲང་

བྱེད་དགོས་པའི་ངེས་ཤེས་སྐྱེས་ཏེ། ཕྱི་ལོ་ ༡༩༧༩ ལོར་ཏུན་ཞོའོ་ཕེན་གྱིས་ཏཱ་ལའི་བླ་མའི་དམིགས་བསལ་སྐུ་ཚབ། སྐུའི་

གཅེན་པོ་རྒྱལ་ལོ་དོན་འགྲུབ་ལགས་དང་མཇལ་འཕྲད་ཀྱིས་གྲོས་མོལ་བྱས་པ་དང་། བོད་ཀྱི་གནད་དོན་ཐད་ཏུན་རང་

ཉིད་ཀྱིས་དངོས་སུ་གུང་ཁྲན་རྗེས་འཛིན་པ་ཚོར་བརྗོད་རྒྱུར། “རང་བཙན་ཕུད་པའི་དོན་དག་ཅི་ཡང་གླེང་མོལ་བྱས་

ཆོག” ཅེས་བརྗོད་ཡོད་པ་རེད།

ད་ལྟ་ཀྲུང་གུང་གི་མཐོ་རིམ་དཔོན་རིགས་ཚོས་རྩ་བ་ཉིད་ནས་ཅི་ཡང་གླེང་མོལ་བྱ་འདོད་ཡོད་པ་མ་རེད། ཏཱ་ལའི་བླ་

མའི་ལངས་ཕྱོགས་ཇི་ལྟར་ཞི་འཇམ་ནས་ཞི་འཇམ་གྱི་ལམ་དུ་ཕྱོགས་ཏེ། “རང་བཙན་བརྩོན་ལེན” ནས་“དབུ་མའི་ལམ

” དང་། “ཞི་བའི་སྲིད་བྱུས” ནས་ “ཚད་མཐོའི་རང་སྐྱོང་།” “རྒྱལ་ཁབ་གཅིག་ལ་ལམ་ལུགས་གཉིས” ནས་ “ཀྲུང་ཧྭ་མི་

དམངས་སྤྱི་མཐུན་རྒྱལ་ཁབ་ཀྱི་བཅའ་ཁྲིམས” ཀྱི་གནས་བབ་ཏུ་ཕབས་ཀྱང་། ཀྲུང་གུང་གིས་ཡ་ང་བསམ་ཤེས་མེད་པར་

མཐའ་གཅིག་ཏུ་སྣང་མེད་བྱས་ཡོད།

ཀུན་གྱིས་ཤེས་གསལ་བཞིན་བོད་རྒྱའི་གྲོས་མོལ་གྱི་གེགས་རྐྱེན་གཙོ་བོ་གཅིག་ནི། ཀྲུང་གུང་གིས་ཏཱ་ལའི་བླ་མར་ “བོད་

དེ་གདོལ་མ་ནས་རྒྱ་ནག་གི་ཆ་ཤས་ཤིག་ཡིན་པ” ངེས་ལེན་བྱེད་དགོས་ཞེས་ཨུ་ཚུགས་མཐར་བསྐྱེད་བྱེད་བཞིན་པ་དེ་

རེད། ཀྲུང་གུང་གིས་ཏཱ་ལའི་བླ་མ་ནི་ནང་བའི་དགེ་སློང་ཞིག་ཡིན་པའི་ཆ་ནས་རྫུན་བཤད་དེ་ཀྲུང་གུང་ལ་བསྟུན་ཐབས་

བྱེད་མི་སྲིད་པ་དེ་གསལ་བོར་ཤེས་ཡོད། ཏཱ་ལའི་བླ་མས་ “བོད་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས”

ཤིག་ཏུ་ངེས་འཛིན་བྱས་ཟིན་པ་དེ་ནི། བླ་ན་མ་མཆིས་པའི་ཀུན་སློང་བཟང་པོ་དེ་གསལ་སྟོན་བྱས་ཡོད་ལ། ཀྲུང་གུང་

གིས་བསམ་བཞིན་རྐང་བཙུགས་ནས་དཀའ་གནད་ལ་གཏོད་བཞིན་པ་དེ་ནི། གྲོས་མོལ་བྱ་འདོད་མེད་པ་དེ་བསྟན་པ་

ཞིག་རེད།

ད་ལྟའི་ཕྱོགས་གཉིས་ཀྱི་རྣོ་ངར་ཁྲོད། ཀྲུང་གུང་སྲིད་བློན་ཝུན་ཇ་པོའོ་དང་། ཕྱི་འབྲེལ་དྲུང་ཆེ་ཀྲང་ཅེ་ཁྲུ་སོགས་ཀྱིས་

འདས་པའི་ལོ་ངོ་ ༢༢ སྔོན་ཏེ། ཕྱིི་ལོ་ ༡༩༨༧ ལོའི་ཏཱ་ལའི་བླ་མའི་ལངས་ཕྱོགས་ (ཀྲུང་གུང་གིས་དམག་མི་ཕྱིར་བསྡུ་

དང་། རྒྱ་རིགས་གནས་སྤོར་བ་མཚམས་འཇོག་བྱེད་དགོས།) ཀྱི་ཚིག་རྩ་ཁོ་ན་བཟུང་སྟེ་གནད་དོན་གླེང་བཞིན་ཡོད། ཅི་

ཕྱིར། སྤྱི་ལོ་ ༢༠༠༢ ཚུན་ཆད་ནས་བཏོན་པའི་ཏཱ་ལའི་བླ་མའི་ལངས་ཕྱོགས་གསར་བ་སྟེ། ཀྲུང་ཧྭ་མི་དམངས་སྤྱི་མཐུན་

རྒྱལ་ཁབ་ཀྱི་རྩ་ཁྲིམས་ལ་གཞི་བཅོལ་བའི་ཐོག་ནས། བོད་ལ་རང་སྲིད་རང་སྐྱོང་མིང་དོན་མཚུངས་པ་ཞིག་མངོན་འགྱུར་

ཡོངས་ཐབས་ཀྱི་སྐོར་ནས་ཚིག་ཟུར་ཙམ་ཡང་མི་གླེང་དོན་ཅི་ཡིན་ནམ།

དེ་ནི། ཁུངས་མེད་ཀྱི་ཀྱལ་གཏམ་ཞིག་ཏུ་མངོན་པ་སྟེ། དེ་སྔོན་སྤྱི་ལོ་ ༡༩༤༩ ལོར། བོད་གཞུང་དམངས་གཉིས་ཀྱིས་བོད་

ནི་ “རང་བཙན་གཙང་མའི་བདག་དབང་ཅན་གྱི་རྒྱལ་ཁབ” ཅིག་ལ་ངེས་ཤེས་འཛིན་བཞིན་པའི་སྐབས་སུ། ཀྲུང་གུང་

གིས་ “བོད་དེ་གདོལ་མ་ནས་ཀྲུང་གོའི་ཆ་ཤས་ཤིག་ཡིན” ཞེས་བརྗོད་མྱོང་ཡོད་དམ། དེང་སྐབས། ཏཱ་ལའི་བླ་མས་ “བོད་

ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས” ཤིག་ཏུ་ངོས་འཛིན་གནང་བཞིན་པའི་སྐབས་སུ། ཀྲུང་གུང་གིས་

ཨུ་ཚུགས་མཐར་བསྐྱེད་ཀྱིས་ཏཱ་ལའི་བླ་མའི་ལངས་ཕྱོགས་ནི་ “བོད་རང་བཙན” རེད་ཅེས་འཁྱོག་བརྗོད་བྱེད་བཞིན་

ཡོད། མཐར་ཐུག་གི་བོད་ཀྱི་གནད་དོན་འབབ་ས་དེ། “རང་བཙན” བྱས་ན་ཡང་མི་འགྲིག་པ། “རང་བཙན་མ་བྱས” ནའང་མི་འགྲིག་པ་ཞིག་གི་གནས་སུ་བསྐྱལ་ཡོད།

དེ་བཞིན། ལམ་ཁ་གཅིག་ལ་འགྲོ་མི་ཐུབ་པ་དེ་འང་ཡ་མཚར་དགོས་པའི་གནས་ཤིག་རེད། བཙན་བྱོལ་བོད་མའི་ཁྲོད།

ཏཱ་ལའི་བླ་མའི་དབུ་ཁྲིད་པའི་ “རང་བཙན་བློས་གཏོང” བྱེད་པའི་ཞི་འགྲིག་གི་ཤོག་ཁག་དང་། གཞོན་ནུ་ལྷན་ཚོགས་

གཙོས་ “རང་བཙན” འཐབ་རྩོད་པའི་ཤོག་ཁག་གཉིས་ཆགས་བསྡད་ཡོད།

ཀྲུང་གུང་གི་གཏི་ཐུག་གི་བྱ་སྤྱོད་དེར། འཛམ་གླིང་མི་དམངས་ཡོངས་ཀྱིས་གོ་བ་ལོན་དཀའ་བར་གྱུར་ཡོད། དོན་དངོས་

ཐོག ཀྲུང་གུང་རང་ཉིད་ལ་བོད་རང་བཙན་གྱི་གནས་སྟངས་དེ་མཁོ་གལ་ལྡན་པར་གྱུར་ཡོད་དེ།  བོད་རྒྱལ་ཁབ་བཙན་

འཕྲོགས་ནས་བོད་ས་ཡོངས་ལ་བྲན་སྒྱུར་དང་། དེ་ནས་ “རང་བཙན” གྱི་ལམ་དུ་བཙན་གྱིས་དེད་པ་མཐའ་དག་ནི། ཀྲུང་གུང་གིས་བསམ་བཞིན་དུ་བཟོས་པ་ཞིག་ཡིན། དེང་སྐབས། “བོད་རང་བཙན” དེ་ཆབ་སྲིད་ཀྱི་ཐ་སྙད་ཅིག་ཡིན་

པའི་ཆས་ནས། ཀྲུང་གུང་གི་གཏམ་བཤད་ཁྲོད་ཤུགས་ཆེན་པོས་ཁྱབས་ཡོད་པར་མ་ཟད། ཀྲུང་གུང་གི་མགོ་ཁྲིད་རིམ་

པའི་བཤད་སྟངས་ཤིག་ཏུ་གྱུར་ཡོད།

ཀྲུང་གུང་གི་ཁ་སྣེ་ལྕེ་སྣེ་ན། ཀྲུང་གུང་རང་ཉིད་ལ་ངོ་རྒོལ་བྱེད་བཞིན་པའི་བོད་མི་ཚང་མར་ “བོད་རང་བཙན་འཐབ་

རྩོད་པའི” མིང་འདོགས་ཀྱིན་ཡོད་པར་མ་ཟད། བོད་མི་དམངས་ལ་གདུང་སེམས་མཉམ་སྐྱེད་བྱེད་པའི་རྒྱལ་ཁབ་ཕྱི་ནང་

གི་མི་སྣ་དང་། ཏཱ་ལའི་བླ་མར་མཇལ་འཕྲད་གནང་བཞིན་པའི་ཕྱི་རྒྱལ་གྱི་དབུ་ཁྲིད་ཚང་མར་ “བོད་རང་བཙན་རྒྱབ་སྐྱོར་

བ” ཞེས་འབོད་བཞིན་ཡོད། བཙན་བྱོལ་བོད་མི་འདུས་སྡོད་ཀྱི་དྷ་རམ་ས་ལར་ “བོད་རང་བཙན་སྒར་ས་ཆེན་མོ” དང་། བོད་ཀྱི་རང་དབང་མཚོན་པའི་གངས་སེང་དར་ཆ་ལ་  “བོད་རང་བཙན་གྱི་དར་ཆ།” བོད་ཀྱི་སྲོལ་རྒྱུན་ཆོས་དང་རིག་

གཞུང་མཚོན་པའི་གཞས་ལ་ “བོད་རང་བཙན་གྱི་གཞས” བཅས་སུ་འབོད་བཞིན་ཡོད།

ཀྲུང་ནན་ཧེ་ཡིས་ “བོད་རང་བཙན” ཁ་ནང་ནས་མི་གཏོང་བ་དེའི་ཤུགས་བསྟན་ནི་འདི་ལྟ་སྟེ། ཁྱོད་ཀྱིས་རབ་ཡིན་ན་

རང་བཙན་གྱི་ལངས་ཕྱོགས་འཛིན་རོགས། དེ་མིན་ངས་མི་རིགས་ཆེན་པོའི་རིང་ལུགས་ཀྱི་དར་ཆ་མཐོན་པོར་བསྒྲེངས་

རྒྱུ་སྟབས་བདེ་མི་འདུག གལ་སྲིད་ཁྱོད་ཀྱི་ “བོད་རང་བཙན” གྱི་འབེན་དེ་མེད་ན། ངས་ཅི་ལྟར་ཀྲུང་གོའི་མི་དམངས་

ལ་ “རྒྱལ་གཅེས་རིང་ལུགས” འུད་སྒྲོག་བྱེད་དམ། གལ་སྲིད་ངས་  “རྒྱལ་གཅེས་རིང་ལུགས”  ཀྱི་དར་ཆ་མཐོན་པོར་

བསྒྲེངས་མ་ནུས་ཚེ། ཅི་ལྟར་དམངས་གཙོ་དང་། འགྲོ་བ་མིའི་ཐོབ་ཐང་སོགས་ལ་སྐྱོན་འཛུགས་བཀག་སྡོམ་བྱེད་ཐུབ་

བམ། གལ་སྲིད་ངས་དམངས་གཙོའི་རླབས་རྒྱུན་འགོག་མ་ནུས་ཚེ། གུང་ཁྲན་ཏང་གི་ཁེ་ཕན་དང་ང་ཚོ་མཐོ་རིམ་དཔོན་

རིགས་ཚོའི་ཕོགས་ཐོབ་ཆེན་པོ་དེ་ཅི་ལྟར་གཉེར་ཞེས་པ་དེ་རེད།

ཀྲུང་གུང་གིས་ཏཱ་ལའི་བླ་མར་ “བོད་རང་བཙན་པ” ཞེས་མ་ཎི་ལྟར་ཟློ་བཞིན་ཡོད་མོད། རྒྱལ་སྤྱིའི་སྤྱི་ཚོགས་ཀྱིས་ཀྲུང་

གོས་དོན་མེད་འུར་དཀྲོགས་བྱེད་བཞིན་པའི་རྣམ་འགྱུར་དེ་གསལ་བོ་ཤེས་ཡོད། ཡིན་ནའང་། ཀྲུང་གུང་གིས་བྱ་སྤྱོད་

དེ་ཁོ་ན་སྤྱད་ནས་ཀྲུང་གོའི་མི་དམངས་ལ་མགོ་སྐོར་གཏོང་བཞིན་པ་དང་། ལྷག་པར་དུ་བོད་དོན་ལ་གསལ་ཆ་མེད་

པའི་གཞི་རིམ་མི་དམངས་ལ་མགོ་སྐོར་བསླུ་བྲིད་ཐེབས་བཞིན་ཡོད།

ཀྲུང་གུང་གིས་ཏཱ་ལའི་བླ་མ་དང་ལྷན་དུ་གྲོས་མོལ་བྱ་འདོད་མེད་པ་མ་ཟད། གྲོས་མོལ་བྱེད་པའི་བློ་སྟོབས་ཀྱང་ཡོད་པ་

མ་རེད། ཀྲུང་གུང་ཆེས་སྐྲག་ས་ནི། ཏཱ་ལའི་བླ་མས་ད་བར་དུ་ཉམས་ཆུང་མཐར་བསྐྱེད་བྱས་ཏེ། མངའ་ཁོངས་བློས་གཏོང་

གིས་དྲང་བདེན་གྱི་རྒྱལ་ཁ་ལོན་པ་དེ་རེད། དེར་བརྟེན། རིག་གསར་སྐབས་ཀྱི་སྐད་ཆ་རྣམ་སྤྱད་དེ།   ནུས་ཤུགས་ཅི་ཡོད་

བཏོན་ནས་ཏཱ་ལའི་བླ་མར་དམོད་མོ་རྒྱག་བཞིན་ཡོད། དེ་ནི་སྒོ་ཁྱིས་བདག་པོར་ཟུག་པའི་དཔེ་ལས་མ་འདས་སོ།

ཏཱ་ལའི་བླ་མས་མུ་མཐུད་དུ་ཞི་བདེ་ཡི་ལག་ཟུང་བརྐྱངས་ནའང་། ཀྲུང་གུང་ལ་ལག་འཇུ་བྱེད་པའི་བློ་ཁོག་མེད་པ་རེད།

དེའི་ཤུགས་བསྟན་རྒྱབ་ལྗོངས་ནི། ཆབ་སྲིད་ཀྱི་གཙོ་འགན་འཁུར་མཁན་གྱི་ཧའོ་དང་ཝུན་སོགས་ཀྱི་ངོ་ཚ་ཁ་སྐྱེངས་དགོས་

པའི་དབང་ཚད་དེ་རེད། ཏུན་ཞོའོ་ཕེན་གྱི་རྗེས་ནས་བཟུང་ཀྲུང་གུང་མགོ་ཁྲིད་རིམ་པའི་ཁྲོད་དབང་གྲགས་ཅན་གཅིག་

ཀྱང་བྱུང་མྱོང་མེད་ལ། སུས་ཀྱང་འགན་དབང་དེ་ཕྲག་ཏུ་ལེན་ཐུབ་མེད། དེར་བརྟེན། སུ་ཞིག་གིས་ཀྱང་སྲིད་དོན་གྱི་གལ་

ཆེའི་བྱེད་ཕྱོགས་ལ་འགྱུར་བ་གཏོང་ཐུབ་ཀྱིན་མེད། ཁོ་ཚོས་ཏང་ནང་ཁུལ་གྱི་རང་གི་དབང་ཚད་ཙམ་སྲུང་སྐྱོབ་ཀྱི་ཆེད་དུ་

དྲག་སྡོམ་ཁོ་ན་བྱེད་བཞིན་ཡོད། གཅིག་ལས་གཅིག་ལྷག་གི་དྲག་སྡོམ་དེ་ནི། ཕྱི་ཕྱོགས་ལ་ཁ་གཏོད་པ་ཞིག་མ་ཡིན་པར། དེ་ལས་ལྡོག་ཏེ་རང་ཉིད་ཀྱི་མི་དམངས་ལ་ཁ་གཏད་ནས་ཡོད། ཅིང་ཙེ་མིན་དང་ཀྲུའུ་རོང་ཅུ་ནས། ཧོའོ་ཅིན་ཐའོ་དང་

ཝུན་ཇ་པའོ་ཚང་མས།    ནུས་ཤུགས་གང་ཡོད་བཏོན་ཏེ་ཧའོ་ཡའོ་ཕང་དང་ཀྲའོ་ཙུ་ཡང་གཉིས་ཕམ་ཉེས་སུ་བཏང་སྟེ་

ལས་གནས་ནས་ཕུད་བའི་དོན་དག་ཏེ་ནག་བསུབ་རྡོག་རོལ་བྱེད་དོན་ནི། རྙོག་འཛིང་ཆེ་བའི་ཏང་ནང་ཁུལ་གྱི་གཏོས་

ཆེ་བའི་ཁེ་ཕན་རུ་ཚོགས་ཀྱི་ཆེད་ཁོ་ན་ཡིན། དེར་བརྟེན། དམ་པ་ཁོང་གཉིས་རང་ལུས་རང་ལ་མི་དབང་བའི་གནས་སྟངས་

འོག་ཚུད་ཅིང། ཐ་ན་ཚེ་མཇུག་ཀྱང་དཀའ་སྡུག་ཁྲོད་སྐྱེལ་དགོས་བྱུང་ཡོད་དོ།།