བོད་གསེར་རྟ་རྫོང་དུ་བོད་མི་ཞི་རྒོལ་བ་དྲུག་དམར་བསད།

རྒྱ་ནག་གི་ཟི་ཁྲོན་ཞིང་ཆེན་ཁོངས་སུ་ཡོད་པའི་བོད་ཀྱི་གསེར་རྟ་རྗོང་ཐོག་ཏུ་བོད་མི་ཞི་རྒོལ་བའི་ཁྲོད་རྒྱ་མི་དྲག་ཆས་ཉེན་རྟོག་པས་ མེ་མདའ་རྒྱབ་སྟེ་བོད་མི་དྲུག་དམར་བསད་བཏང་བ་དང་བོད་མི་དྲུག་བཅུ་ལྷག་ཙམ་ལ་མེ་མདའི་རྨས་སྐྱོན་བཏང་བ་དེ་ཡ་ང་སྙིང་རྗེ་མེད་པའི་ཀླ་ཀློའི་བྱ་ཐབས་ཡིན་པ་རེད་ཅེས་དབུས་བོད་མིའི་སྒྲིགས་འཛུགས་ཀྱི་བཀའ་བློན་ཁྲི་པ་མཆོག་གིས་རྒྱ་ནག་གི་བྱ་སྤྱོད་ལ་སྐྱོན་བརྗོད་གནང་བཞག
ད་ཕན་གནས་ཚུལ་ཤེས་རྟོགས་བྱུང་བའི་ནང་རེས་གཟའ་མིག་མར་ཉིན་རྒྱ་མིའི་དྲག་ཆས་ཉེན་རྟོག་པས་གསེར་རྟ་རྗོང་ཐོག་ཏུ་བོད་མིའི་རྔམ་སྟོན་ཁྲོམ་སྐོར་བའི་སྟེང་གང་བྱུང་གིས་མེ་མདའ་རྒྱབ་ནས་ཉུང་ཐར་བོད་མི་གཉིས་རྐྱེན་ལམ་དུ་བཏང་ཡོད་པ་དང་ དེ་བཞིན་རེས་གཟའ་ཟླ་བའི་ཉིན་ཁམས་བྲག་མགོ་རུ་དེ་མཚུངས་རྒྱ་མིའི་ཉེན་རྟོག་པས་མེ་འཔེན་འོག་བོད་མི་གཉིས་དམར་བསད་བཏང་ཡོད་པ་རེད་ ཁ་ས་དབུས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གི་མཆོག་གིས་ ད་ལྟ་བོད་ནང་རྒྱ་ནག་གཞུང་གིས་དྲག་གནོན་བྱེད་པའི་ཛ་དྲག་གི་གནས་སྟངས་ལ་ རྒྱལ་སྤྱིའི་ཐོག་ནས་ཐེ་བྱུས་བྱ་དགོས་པའི་འབོད་སྐུལ་དང་ རྒྱ་ནག་གཞུང་གིས་འབྲི་རུ་དང་སེར་རྟ་རྗོང་བཅས་སུ་ དེ་ལྟ་བུའི་བསམ་ཡུལ་ལས་འདས་པའི་དྲག་གནོན་གྱི་བྱ་སྤྱོད་སྤེལ་བའི་སྲིད་ཇུས་ཀྱི་་རྐྱེན་པས་ ༢༠༠༨ནས་ཟུང་ བོད་མི་ཚོས་རྒྱ་ནག་གཞུང་ལ་འཁོན་འཛིན་དང་ཁོང་ཁྲོ་་ཇེ་ཆེར་འགྲོ་བཞིན་ཡོད་པའི་སྐོར་གསལ་འདོན་གནང་བཞག བཀའ་བློ་ཁྲི་པ་མཆོག་གིས་སྤྱི་བསྒྲགས་ནང་མུ་མཐུད་གསུང་པར་ རྒྱ་ནག་གི་འགོ་ཁྲིད་ཚོས་དངོས་ཡོད་བོད་མིའི་དཀའ་གནད་ལ་བསམ་གཞིགས་ཀྱིས་སེལ་ཐབས་མ་བྱས་བར་ དྲག་གནོན་དང་མི་གསོད་ཁྲག་སྦྱོར་གྱི་ལམ་ནས་བོད་ནང་བརྟན་ལྷིང་སྐྱར་གསོ་ཐུབ་རྒྱུ་མེད་པ་རེད་ བོད་ཀྱི་གནད་དོན་སེལ་རྒྱུའི་ཐབས་ལམ་བཟང་ཤོས་དང་ཆབས་ཅིག་རྒྱུན་གནས་ཐུབ་པའི་ཞི་བདེ་བསྐྲུན་ཐབས་ནི་ཞི་འགྲིག་དང་བོད་མི་ཚོའི་གཞི་རྩའི་ཐོབ་ཐང་ལ་བརྩི་བཀུར་ཞུ་རྒྱུ་དེ་ཡིན་པའི་སྐོར་ནན་བརྗོད་གནང་འདུག