བཟོའི་སྤྱི་དོན་
13/11/2009 19:43༄༅། །བོད་བཟོའི་སྤྱི་དོན་རགས་བསྡུས།
བོད་ཀྱི་སྲོལ་རྒྱུན་རིག་གནས་ལྟར་ན། བཟོ་རིག་པ་ཞེས་པའི་གོ་དོན་ལ་《ཤེས་བྱ་མཛོད་》ལས། དོན་གཉེར་རྗེས་
འཛིན་བཟོ་རིག་མཐའ་ཡས་ཀྱང་།། སྒོ་གསུམ་བཟོ་ལ་ཤེས་བྱ་ཀུན་ཀྱང་འདུ།། ཞེས་གཟུངས་པ་ལྟར། འདོད་རྒུ་དོན་དུ་
གཉེར་བའི་ལག་རྩལ་ཐམས་ཅད་བཟོ་རིག་པ་ཡིན་ཞིང་། དོན་རྒྱ་ཆེར་བསྐྱེད་ཚེ་ལུས་ངག་ཡིད་གསུམ་གྱི་བཟོ་རུ་མ་
འདུས་པའི་ཤེས་བྱ་གང་ཡང་མེད་པར་བཤད་དོ།། བཟོ་གནས་ཀྱི་དབྱེ་བའང་ཤེས་བྱ་ཀུན་འདུ་བར་བཤད་པ་ལྟར་དབྱེ་
ན་བགྲང་བས་མི་ལང་ཡང་། འདིར་ལུས་བཟོ་སྟེ་གཞན་རྗེས་སུ་འཛིན་པའི་ལག་རྩལ་བོད་བཟོ་ལྟར་དབྱེ་བ་མདོ་ཙམ་
བཀོད་ན། ལུས་བཟོ་མཆོག་ལ་སྐུ་གསུང་ཐུགས་བཅས་རྟེན་བཟོ་སྣ་གསུམ་ཡོད་ཅིང་། དེ་རེ་རེར་ཡང་། སྐུ་བཟོ་ལ་བྲིས་
འབུར་གཉིས། དེ་ལས་བྲིས་ལ་ཐང་ག་དང་ལྡེབས་རིས་གཉིས། ཐང་ག་ལ་བཞེང་བྱེད་རྒྱུས་དབྱེ་ཚེ་ཚོན་ཐང་ག གསེར་
ཐང་། ནག་ཐང་། དམར་ཐང་། ཨམ་ཚོན་སོགས་ཡོད་ལ། ཆེ་ཆུང་གིས་དབྱེ་ཚེ་གྱན་ཐང་དང་། ཐང་ག། ཙ་ཀ་གསུམ་དུ་
དབྱེ་བའང་ཡོད། འབུར་བཟོ་ལ། འཇིམ་བཟོ་རིགས་སྣ་ཚོགས་དང་། བརྡུང་མགར་དང་ལུགས་མགར་གཉིས་སུ་འདུ་བའི་
མགར་བཟོ། པར་རྐོ་དང་འབུར་བརྐོ་སོགས་འདུ་བའི་བརྐོས་དཀྲོལ། མར་རྒྱན། རྡུལ་ཚོན་ཕྱེ་མ། གོས་དྲུབ། གཙག་དྲུབ་
སོགས་མང་དུ་ཡོད། གསུང་རྟེན་གྱི་བཟོ་ལ་ལན་ཝར་སོགས་ཀྱི་གཟུངས་སྔགས་དང་རྣམ་བཅུ་དབང་ལྡན། གཞན་བོད་
ཡིག་གི་འབྲི་ཚུགས་སྣ་ཚོགས་འདུ་བའི་གསུང་རབ་ཀྱི་བཟོ་མང་པོ་དང་། ཐུགས་རྟེན་གྱི་བཟོ་ལ་མཆོད་པའི་རྟེན་དང་
ཕྱག་མཚན་རིགས་མང་པོ་འདུ། ལུས་ཀྱི་དམན་བཟོ་ལ་རྡོ་བཟོ་དང་། གྱོ་བཟོ། འཚེམ་བཟོ། ཤིང་བཟོ། རྩིག་བཟོ། འཐག་
བཟོ། བསེ་བཟོ་སོགས་ཁང་ཁྱིམ་ཅ་ལག་མཁོ་དངོས་འབྱོར་བ་སྣ་མང་སྒྲུབ་པ་ཡོད་ཚད་འདུ་བ་ཡིན་ནོ།། 《ཀློང་རྡོལ་
བའི་གསུང་འབུམ》དུ་མདོར་བསྡུས་ན་བཟོ་རྣམ་པ་བཅུ་ཡོད་པར་གསུངས་ལ། རྒྱ་གཞུང་ཁག་ཏུ་བཟོ་གནས་བཅོ་
བརྒྱད་དུ་བསྡུས་ཡོད་ཀྱང་《འདུལ་བ་ལུང་》དང་། 《ཀོ་ས་ལའི་རྒྱན་གྱི་མདོ་》དང་། 《མཛོད་》
དང་། 《དུས་འཁོར་》བཅས་ལས་འབྱུང་བའི་བགྲང་ཚུལ་ནི་མི་མཐུན་པར་སྣང་།
———
Back