དྲན་གདུང་གི་མིག

        དྲན་གདུང་གི་མིག

༄༅། །དགུན་གསུམ་པའི་གྲང་ངར་ལ་སྙིང་རྗེ་ག་ལ་ཡོད། ཤིང་ལོ་སེར་པོ་རྣམས་ནི་གཡོ་བཞིན་སྡོང་

རྒས་ལས་་་ས་ལ་ལྷུང་། འདི་ནི་གྲང་ངར་གྱི་དབང་དུ་གྱུར་བའི་དགུན་དུས་ལས་གཞན་ཅི། ངོ་མཚར་

ཅན་གྱི་འཇིག་རྟེན་ནི་ཐམས་ཅད་ཡ་མཚན་གྱིས་ཁེངས། འདིར་ལྟར་ཁ་བ་ནི་ལྷབ་ལྷུབ་དུ་བབ་པའི་

དགུན་ཁའི་ཞོགས་དྲོ་ཞིག་ལ་ཁོ་བོ་རང་ཡུལ་ལས་བྲལ་རྒྱུའི་གསང་གཏམ་ནན་པོ་དེ། ཁོ་བོའི་གྲོགས་

ཤིག་དང་མཉམ་དུ་གསང་བའི་ཞིང་ཁམས་སུ་ཕྱིན་ཏེ་བཤད།  ཁོང་གིས་ཀྱང་མིག་ཟུང་གཉིས་ལས་

མཆི་མ་འཁོར་བཞིན་མཛའ་བརྩེ་ཡི་ཡིད་གཏམ་འགའ་བཤད་དོ།   འདི་ལྟར།  ལས་དབང་ནི་ལས་

དབང་ཡིན། སུ་ཞིག་གིས་ཀྱང་སྒྱུར་མི་ཐུབ་ལ།  ཁ་ཕྱོགས་ནི་དེ་བས་ཀྱང་གར་སྐོར་ཐུབ།   མཐོང་རྒྱུ་

མེད་པའི་སེམས་སྟིང་གི་ན་ཚ་འདི་ནི་མེ་ལྕེ་རབ་ཏུ་འབར་རོ། གང་ལྟར། ཅི་བྱ། ཁོ་བོ་ལས་དབང་གི་

བརྙས་གཅོད་འོག་མཚན་མོའི་ཆུ་ཚོད་བཅུ་གཉིས་ཙམ་ལ་རླངས་འཁོར་དུ་འཛུལ།  གློག་འོད་འོག་

ཐལ་རྡུལ་གཡོ་ཙམ་བྱེད་པ་ལས་མི་འགོར་བ་ཙམ་ལ་གཏི་མུག་དབང་གིས་གཉིད་ཀྱི་ཞིང་ཁམས་སུ་

བཀྲ་ཤིས་ཀྱི་ཀ་བཏགས་འཁྱེར་ནས་རང་གི་གྲོགས་ལས་རྒྱང་རིང་ནང་རྒྱང་རིང་དུ་བསྐྱོད་དོ། རེ་བའི་

ཕུགས་བསམ་ནི་ཤིང་གྲུ་ཆུང་ཆུང་ལ་བཞོན་ནས་ཟླ་བའི་གྲོང་ཁྱེར་ལ་འགྲོ་རྒྱུ་ལས་གཞན་ཅི།  གངས་

དཀར་ཤེལ་གྱི་གངས་རི་གྲང་ངར།  ནགས་ཁྲོད་ཀྱི་གཅན་གཟན་གྱི་འཇིགས་སྣང་།   བར་ཐག་འདི་

དག་གི་ཁྲོད་དུ།  ལུས་ཁམས་ཡོངས་སུ་ཆར་ཆུས་བརླན།  སྤྲིན་ནག་གི་ཁྲོད་དུ།   གློག་དམར་འཁྱུག

འབྲུག་སྒྲས་ས་གཞི་ཡོངས་སུ་དབང་དུ་བསྒྱུར། འདི་ནི་ཅི་འདྲའི་འཇིགས་སྣང་། འདར་སིག་སིག་གི་

ཁྲོད་དུ།   ཁོ་བོའི་མིག་གཟུང་གཉིས།   མཆི་མས་ཁེངས་ནས་གསལ་ལ་མི་གསལ་གྱི་ཁོ་བོའི་ཨ་མའི་

བཞིན་རས་མདུན་དུ་ལན་མང་འཆར།  གང་ལྟར།  སེམས་ཐག་ནི་བཅད་ཟིན།  དེར་བརྟེན་གངས་

དཀར་ཤེལ་གྱིས་སྒྲོན་པའི་ངོ་མཚར་ཅན་གྱི་རི་བོ་ཧི་མ་ལ་ཡ་ལས་བརྒལ།     དམར་པོའི་སྐར་ལྔའི་

དབང་གྱུར་ལས་ཐར་ཡང་།   ལྷག་པ་ནི་ཅི།  ཁོ་བོར་ཡོད་ཚད་ནི་རང་ཡུལ་ལ་བསྐྱུར།  འདིར་ལྷིང་

འཇགས་མེད་པའི་སྤྱི་ཚོགས་འདིར།  ཉིན་འཁྱོལ་ཡང་མཚན་འཁྱོལ་དཀའ།  ཟས་མིད་པར་འགྲོ་

ཡང་བཅུད་ག་ལ་ཡོད། ལས་དབང་ལགས། ཁྱོད་ལ་སྙིང་རྗེ་ཡོད་དམ། འདི་ནི་ཅི་བྱས་པའི་འབྲས་བུ། ལས་དབང་གིས་ཁ་ལོ་བསྒྱུར་པའི་བུ་ཆུང་ངས་མཆོག་གསུམ་ལ་གསོལ་བ་འདེབས།    ཡང་ཁ་ཤས་

ཀྱིས་སྤྱི་ཚོགས་འདིར།   རམ་འདེགས་ཞུ་བཞིན།   ཁ་ནས་སྤྱི་དོན་གྱི་ཚིག་བཟང་འབྲུག་སྒྲ་ལྟ་བུར་

བཤད་ཀྱང་རུང་། དོན་དངོས་སུ་སྒེར་དོན་ལ་གློག་འཁྱུད་འཁྱུད་བྱེད་པ་ནི་སྨྲ་ཅི་དགོས།  ཁོ་བོའི་

འདས་ཟིན་པའི་ཟླ་བ་རེ་རེ་ནས་སྐྱོ་གར་གྱི་མིག་ཆུ།    དྲན་གདུང་གི་མཆི་མས་ནི་གཞན་ཡུལ་ལ་

ཆགས་ག་ལ་འདོད། ངས་དྲིན་ཆེན་གྱི་ཨ་མ་དང་བརྩེ་བའི་གྲོགས་པོ་སོགས་ལ་མཇལ་འདོད་པའི་

འདུན་པ་ནི་སུ་ཞིག་གིས་ཚད་ག་ལ་གཞལ་ཐུབ། དེའི་ཞོགས་པར་ཁ་བ་ལྷབ་ལྷུབ་ཀྱི་ཁྲོད་དུ་གྲོགས་

ཀྱིས་གནང་བའི་དྲན་རྟེན་གྱི་དེབ་ཆུང་ལ་ལྟ་བཞིན་མིག་ཆུ་དང་།   ཉམས་ཆུང་བྱིས་པའི་དུས་སུ་

རྩེད་མོར་རོལ་བའི་སྣང་བ་ཤར་ནས་དགོད་ཀྱང་ཅུང་ཤོར་བཞིན་མི་བཟོད་པའི་སྨྱག་རྩེ་ནས་དུང་

                             དཀར་ཤོག་ཐོག་ལ་སྙིང་གཟེར་བཤད་དོ། 

                                                                                     དཀོན་མཆོག་གིས།། །།