བོད་ཀྱི་རིག་གཞུང་དང་དེའི་ཉེན་ཁ།

རྒྱ་ནག་གཞུང་གིས། ཟླ་འདིའི་ནང་སློབ་གྲྭ་གཅིག་བསྡུས་ཀྱི་ལས་གཞི་མགོ་འཛུགས་བྱས་ཡོད་འདུག་ལ། སློབ་གསོ་གོང་འཕེལ་གཏོང་བར་ཁ་གཡར་ཏེ་བོད་ཡིག་འཕེལ་རྒྱས་ཀྱི་ཁོར་ཡུག་ཆུང་དུ་གཏོང་བཞིན་པ་མ་ཟད། བོད་ཀྱི་བླ་སྲོག་ལྟ་བུའི་སྐད་ཡིག་ཉམས་ཉེས་གཏོང་མགོ་བཙུགས་ཟིན་འདུག་ཅེས་བོད་ནས་ཡོང་མཁན་ཞིག་གིས་བརྗོད་བྱུང༌། 

   ཕྱི་ཚེས་ ༡༧ ཉིན་འདི་གའི་གསར་འགོད་པར་བོད་ནང་སློབ་གསོའི་ལས་དོན་སྒྲུབ་མཁན་ཞིག་གིས་བརྗོད་པ་ལྟར་ན། རྨ་ལྷོ་བོད་རིགས་རང་སྐྱོང་ཁུལ་གྱི་རྩེ་ཁོག་རྫོང་ཁོངས་གཏོགས་ཧོར་ཞང་སོགས་འབྲོག་སྡེ་ཁག་གི་སློབ་ཆུང་མང་པོ་ཞིག་སྒོ་བརྒྱབས་ཏེ། ད་ལྟ་རྩེ་ཁོག་རྫོང་དུ་སློབ་ཆུང་གཅིག་བསྡུས་ཀྱི་སློབ་འབྲིང་གཉིས་པ་ཞིག་གསར་དུ་རྒྱག་མགོ་བརྩམས་འདུག་ཅེས་བརྗོད་བྱུང་ལ། རྩེ་ཁོག་སྟོབས་ལྡན་ཞང་གི་མངའ་ཁོངས་སུ་སློབ་ཆུང་ཁག་དགུ་ཡོད་པ་དེ་དག་ལོ་རྗེས་མར་དངོས་སུ་སྒོ་རྒྱག་རྒྱུ་ཡིན་ཚུལ་བརྗོད་འདུག་ཟེར། དེ་བས་འབྲོག་ཁུལ་གྱི་ལོ་ན་ཆུང་བའི་སློབ་མ་དེ་དག་འགྲིམ་འགྲུལ་སྟབས་བདེ་མིན་པ་སོགས་ཀྱིས་ད་ལྟ་རང་ཁྱིམ་དུ་ལྷག་ཡོད་པ་དང༌། དེ་རུ་སློབ་གསོའི་ལས་དོན་གཉེར་བཞིན་པའི་དགེ་རྒན་གང་མང་ཞིག་ཀྱང་ལས་མེད་ཆགས་ཉེན་ཡོད་ཚུལ་བརྗོད་ཀྱི་འདུག ས་དེར་ཡོད་པའི་བོད་རིགས་མང་པོ་ཞིག་གིས། འདི་ནི་རྒྱ་ནག་གིས། བོད་མི་རིགས་ཀྱི་རིག་གནས་རྩ་གཏོར་གཏོང་བའི་ཐབས་ལམ་གསར་བ་ཞིག་ཡིན་པ་དང༌། བོད་ཀྱི་རིག་གནས་རྩ་མེད་བཟོ་བའི་ལས་གཞི་གསར་བ་ཞིག་མགོ་བཙུགས་ཟིན་ཅེས་བརྗོད་ཀྱི་ཡོད་པ་རེད། གནས་སྟངས་འདི་དང་འབྲེལ་བའི་ཐད་བོད་ནས་གསར་ཏུ་འབྱོར་བའི་རྨ་ལྷོ་སོག་རྫོང་ནས་ཡིན་པའི་གྲོགས་པོ་ཞིག་ལ་སྐད་ཆ་དྲིས་པར། ཁོས། འདིའི་ཐད་ཀྱི་གནས་སྟངས་ང་ཚོའི་ས་ཁུལ་ཏུའང་ཧ་ཅང་ཛ་དྲག་ཞིག་ཏུ་གྱུར་འདུག་ལ། ང་ཚོའི་སོག་རྫོང་གི་ལས་བྱེད་ཚང་མས་ཀྱང་རྒྱ་ཡིག་གཙོ་བོར་བཟུང་སྟེ་བོད་ཡིག་ལ་དེ་འདྲའི་དོ་སྣང་མི་བྱེད་པའི་གནས་ཚུལ་རྒྱུན་དུ་གོ་གི་འདུག ང་རང་ཁེའུ་སིན་སློབ་ཆུང་ནས་མཐར་ཕྱིན་ཏེ་རྫོང་གི་སློབ་འབྲིང་གཉིས་པ་བར་དུ་སོང་བ་ཡིན། སོག་རྫོང་མི་རིགས་སློབ་འབྲིང་ནང་གཙོ་ཆེ་བ་རྒྱ་ཡིག་གི་སློབ་གསོ་སྤྲོད་བཞིན་འདུག ང་ཚོ་ཁེའུ་སིན་ཞང་སློབ་ཆུང་ནང་སློབ་གྲྭའི་དགེ་རྒན་གྱི་བཀའ་དྲིན་ལ་བརྟེན་ནས་སློབ་རིམ་དང་པོ་ནས་བོད་ཡིག་གཙོ་བོར་བཟུང་སྟེ་རྒྱ་ཡིག་དང་དབྱིན་ཡིག་སོགས་ཞོར་དུ་ཁྲིད་བཞིན་ཡོད་པས། སློབ་ཆུང་དེའི་ནང་བོད་ཡིག་ཡག་པོ་སྦྱོང་ཐུབ་ཀྱི་ཡོད་པ་རེད། ཡིན་ནའང༌། རྫོང་མི་རིགས་སློབ་འབྲིང་ནང་སླེབས་སྐབས་ཁྲིད་གཞི་མང་ཆེ་བ་རྒྱ་ཡིག་ཐོག་ཡོད་པ་དང༌། སློབ་གྲྭ་སྤྱིའི་སློབ་གསོའི་མཁའ་དབུགས་ལ་བལྟས་ཚེ་རྒྱ་ཡིག་ཤུགས་ཆེ་བའི་ཚོར་སྣང་འདུག ཡིན་ནའང༌། དགེ་རྒན་ནང་བོད་ཡིག་གི་ཤེས་ཚད་མཐོ་བ་དང་མི་རིགས་ལ་དུང་ཞེན་ཟབ་མོ་ཡོད་པའི་དགེ་རྒན་མང་པོ་ཡོད་པས་སློབ་མ་ཚོས་ཀྱང་རང་འགུལ་གྱིས་བོད་ཡིག་ལ་དོ་སྣང་ཆེན་པོ་བྱེད་བཞིན་འདུག ང་ཚོའི་བོད་ཡིག་གི་དགེ་རྒན་གྱིས་ནམ་རྒྱུན་ང་ཚོར་སློབ་གསོ་སྤྲོད་དུས་རྒྱ་ཡིག་སྦྱོང་དགོས་པ་རེད། ཡིན་ནའང༌། བོད་ཀྱི་སྲོལ་རྒྱུན་རིག་གནས་འདི་མི་ཉམས་རྒྱུན་འཛིན་བྱེད་དགོས་པ་དང༌། རང་ཉིད་བོད་རིགས་ཤིག་ཡིན་པའི་ཆ་ནས་བོད་ཡིག་ལ་དོ་སྣང་ཆེན་པོ་བྱེད་དགོས་པའི་སྐོར་གྱི་བསླབ་བྱ་རྒྱུན་དུ་གནང་གི་འདུག  དེ་བས་ད་ལྟའི་ཆར་སོག་རྫོང་གི་སློབ་ཆུང་ཁག་དྲུག་ལས་ཁེའུ་སིན་སློབ་གྲྭའི་བོད་ཡིག་ལ་དོ་སྣང་བྱེད་ཀྱིན་འདུག་ཅེས་གོང་རིམ་ནས་བརྗོད་ཀྱི་འདུག་ཟེར། རྒྱ་གར་དུ་ཡོང་བའི་ཐད། ཁོས། སྔོན་མ་ང་རྒྱ་གར་ཏུ་ཡོང་རྒྱུའི་འདུན་པ་རྩ་བ་ནས་མེད། ཡིན་ན་ཡང༌། ཕ་ཡུལ་དུ་ནམ་རྒྱུན་གང་སར་འཁྱམས་ཏེ་ཉི་མ་འཁྱོལ་ཐབས་བྱེད་བཞིན་ཡོད་པས། སྔོན་མ་ནས་ཡོད་པའི་སློབ་སྦྱོང་གི་འདུན་པ་དེ་བརླག་འགྲོ་གི་འདུག དེ་བས་ཕ་མ་དང་གཉེན་ཉེ་དག་གི་ངག་ནས་རྒྱལ་བ་རིན་པོ་ཆེའི་སློབ་གྲྭའི་ནང་བོད་ཡིག་གི་ཁོར་ཡུག་ཡག་པོ་ཡོད་པ་དང་རིག་གནས་སྦྱོང་བའི་གོ་སྐབས་མང་པོ་སྤྲོད་བཞིན་པ་ཐོས་རྗེས། ང་ཚོ་བོད་གངས་ཅན་གྱི་སྐྱབས་གནས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུ་རྒྱུ་དང་སློབ་སྦྱོང་དམིགས་ཡུལ་ལ་བཟུང་སྟེ་རྒྱ་གར་ཏུ་ཡོང་བ་ཡིན་པས། ཕ་མ་དང་གཉེན་ཉེ་དག་གི་རེ་བ་དང་ང་རང་ཉིད་ཀྱི་དམིགས་ཡུལ་སྟོང་ཟད་དུ་མི་གཏོང་བར་སློབ་སྦྱོང་ཡག་པོ་བྱ་རྒྱུ་ཡིན། ཅེས་བརྗོད་བྱུང༌། དེ་བཞིན་རང་ལོ་ ༡༣ ཡིན་ཞིང་ཕ་ཡུལ་འབའ་ཐང་ནས་ཡིན་པའི་བུ་མོ་ཞིག་ལ་དྲིས་པར། ཁོ་མོས་རྒྱ་སྐད་ཁོ་ན་ལས་བཤད་ཀྱི་མི་འདུག་ལ། ཁོ་མོས། ང་རང་འབའ་ཐང་ནས་ལོ་རིམ་དྲུག་པ་བར་སོང་བ་ཡིན། ང་ཚོའི་སློབ་གྲྭའི་ནང་ལོ་རིམ་དང་པོ་ནས་བོད་ཡིག་ཁྲིད་བཞིན་ཡོད་པ་རེད། ཡིན་ནའང༌། སློབ་གྲྭའི་སློབ་མ་མང་ཆེ་བ་དེ་རྒྱ་མིའི་སློབ་མ་ཡིན་པས་བོད་ཀྱི་སློབ་མ་དང་རྒྱ་མིའི་སློབ་མ་བོད་ཡིག་སྐབས་བཀར་ནས་ཁྲིད་བཞིན་ཡོད། དགེ་རྒན་ཚོས་སློབ་མར་དམིགས་བསལ་གྱིས་སློབ་སྦྱོང་ཐོག་ནན་མོ་བྱེད་ཀྱིན་མི་འདུག དེ་བས་ངས་བོད་ཡིག་ཡག་པོ་ཤེས་ཀྱི་མེད་སྟབས། ངའི་ཕ་མས་རྒྱ་གར་དུ་རྒྱལ་བ་རིན་པོ་ཆེའི་སློབ་གྲྭ་ཡོད་པ་དང༌། བོད་ཡིག་ཡག་པོ་སྦྱོང་ཐུབ་གི་རེད་ཟེར་ནས་ང་རང་རྒྱ་གར་ཏུ་བཏང་བ་རེད། ང་རང་སློབ་གྲྭར་སོང་སྟེ་བོད་ཡིག་ལ་ཧུར་བརྩོན་བྱ་རྒྱུ་ཡིན་ཅེས་བརྗོད་སོང་ལ། སློབ་གྲྭ་ནས་༧གོང་ས་མཆོག་གི་སྐོར་གྱི་གནས་ཚུལ་ཐོས་མྱོང་མིན་དྲིས་པར། ཁོ་མོས། ཕ་ཡུལ་ནས་རྒྱལ་བ་རིན་པོ་ཆེའི་པར་མཐོང་མྱོང་ཡོད། ཡིན་ནའང༌། རྒྱལ་བ་རིན་པོ་ཆེ་གང་དུ་བཞུགས་ཡོད་མེད་ཀྱི་གནས་ཚུལ་གཅིག་ཀྱང་ཐོས་མྱོང་མེད། ཅེས་བརྗོད་སོང༌། དེང་སྐབས་དབུས་སྣེ་ལེན་ཁང་སྒོ་ཁྱིམ་ཕྱི་ནང་ན་མོ་དང་མཉམ་དུ་ཡོང་མཁན་མདོ་དབུས་ཁམས་གསུམ་གྱི་བྱིས་པ་མང་པོ་ཞིག་མཉམ་དུ་རྩེད་མོ་རྩེས་བཞིན་འདུག་ལ། ཁོང་ཚོའི་བར་བརྡ་སྤྲོད་བྱེད་ཀྱི་སྐད་ཡིག་གཙོ་བོ་དེ་རྒྱ་སྐད་ཆགས་འདུག

འབྲེལ་མོལ་མུ་མཐུད་བྱ་འདོད་ཡོད།

བོད་གཞུང་བཀའ་ཤག་གི་ངོས་ནས་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་མཆོག་གིས་བོད་དོན་གླེང་བར་དགའ་བསུ་ཞུས་ཡོད་ལ། བོད་རྒྱ་འབྲེལ་མོལ་མུ་མཐུད་ནས་གནང་རྒྱུའི་འདོད་ཚུལ་དང་ཆོད་སེམས་བརྟན་པོ་ཡོད་པ་བསྐྱར་དུ་བརྗོད་ཡོད། 
   ཚེས་ ༡༠ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་གི་བསྒྲགས་ཡིག་སྤེལ་ནས་ལོ་ ༦༠ འཁོར་བའི་དུས་དྲན་གྱི་ཉིན་མོར། སུད་སིའི་རྒྱལ་ས་རྗེ་ནེ་ལྦར་རྒྱལ་ཁབ་ ༤༧ གྱི་འཐུས་མི་ལྷན་འཛོམས་བྱུང་ཡོད་ལ། སྐབས་དེར་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་བྷན་ཀེ་མོན་མཆོག་གིས། རྒྱ་ནག་གཞུང་གིས་བོད་ཀྱི་གནད་དོན་ཐད་ཏཱ་ལའི་བླ་མའི་སྐུ་ཚབ་དང་མཉམ་དུ་ལྷག་བསམ་ཟོལ་མེད་ཀྱིས་འབྲེལ་མོལ་བྱ་རྒྱུ་དང༌། ཕན་ཚུན་གྱི་དཀའ་རྙོག་དེ་འབྲེལ་མོལ་གྱི་ལམ་ནས་སེལ་ཐུབ་པའི་རེ་བ་ཡོད། ཅེས་གསུངས་ཡོད་པར། ཚེས་ ༡༨ བོད་གཞུང་བཀའ་ཤག་གི་ངོས་ནས་རྒྱལ་ཚོགས་སྤྱི་ཁྱབ་དྲུང་ཆེ་ཡིས་བོད་དོན་གླེང་བར་དགའ་བསུ་ཞུས་ཡོད་ལ། བཀའ་ཤག་གིས། ང་ཚོའི་ངོས་ནས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་འབྲེལ་མོལ་གྱི་ཐབས་ལམ་བརྒྱུད་ནས། རྒྱ་བོད་གཉིས་ཕན་གྱི་ལམ་ནས་བོད་ཀྱི་གནད་དོན་སེལ་རྒྱུ་ནི་བསམ་པ་རྣམ་དག་ཡིན་ཞེས་བསྐྱར་ཟློས་ཡང་ཟློས་ཞུ་རྒྱུ་ཡིན་ལ་འདི་ང་ཚོའི་ཆོད་སེམས་ཀྱང་ཡིན། དེར་བརྟེན་གལ་ཏེ་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་དཔོན་རིགས་ཚོར་འདོད་བློ་ཡོད་ཚེ་ང་ཚོའི་ཕྱོགས་ནས་ས་གནས་གང་དང་དུས་ཚོད་ག་དུས་ཡིན་ནའང་འབྲེལ་མོལ་བྱ་རྒྱུའི་གྲ་སྒྲིག་ཡོད། ཅེས་གསར་ལམ་ཁག་ལ་སྤེལ་ཡོད་ལ། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་བོད་རང་བཙན་རྩོད་ལེན་གྱིས་ནོར་འཁྲུལ་ཅན་གྱི་ལངས་ཕྱོགས། ཞེས་པ་དེ་གཞི་རྟེན་མེད་པ་ཞིག་དང་ཁུངས་སྐྱེལ་མི་ཐུབ་པ་ཞིག་རེད། ྋགོང་ས་ྋསྐྱབས་མགོན་ཆེན་པོ་མཆོག་གིས་བོད་རང་བཙན་རྩོད་ལེན་གནང་གི་ཡོད་པའི་རྒྱ་ནག་གཞུང་གི་འཆར་སྣང་དེས་ྋགོང་ས་མཆོག་གི་དགོངས་གཞིར་འཁྱོག་བཤད་བྱས་ཏེ་ཁོ་ཚོའི་ཆབ་སྲིད་ཀྱི་དགོས་དོན་བསྒྲུབ་རྒྱུ་དང༌། ཡང་ན་བོད་ཀྱི་དཀའ་རྙོག་སེལ་རྒྱུའི་ཆོད་སེམས་མེད་པ་སྟོན་གྱི་ཡོད། ྋགོང་ས་ྋསྐྱབས་མགོན་མཆོག་གིས་བོད་རང་བཙན་དང༌། ཕྱེད་རང་བཙན། ཡང་ན་རྣམ་པ་འགྱུར་བའི་རང་བཙན་རྩོད་ཀྱི་འདུག་ཅེས་པ་དེ་དྲང་བདེན་མིན། འོན་ཀྱང་དེ་ལྟ་བུའི་རྫུན་གཏམ་གྱི་གསལ་བསྒྲགས་དེས་རྣམ་དཔྱོད་ལྡན་པའི་རྒྱལ་སྤྱིའི་མང་ཚོགས་ལ་ལོག་འགྲེལ་དང་མགོ་སྐོར་གཏོང་ཐུབ་རྒྱུ་མིན་པ་ང་ཚོར་གདེང་ཚོད་ཡོད། ཅེས་ཀྱང་གསུངས་ཡོད་འདུག