སྐད་ཡིག་མདུན་བསྐྱོད
08/01/2009 15:04
ཕྱིན་ཆད་བོད་ཀྱི་སྐད་ཡིག་མདུན་བསྐྱོད་ཡོང་བར་བྱེད་པའི་སྐོར།
གཞོན་ཚོས་མཁྱེན་དགོས་པ་ཞིག་ནི། ས་གཞི་ཆེ་པོ་འདིའི་ཐོག་ཏུ་རང་རེའི་མི་རིགས་འདི་
ཇི་སྲིད་གནས་པ་དེ་སྲིད་དུ་བོད་རིགས་ཀྱི་སྲོག་རྩར་གྱུར་པའི་བོད་ཀྱི་སྤྱི་སྐད་དེ། བོད་
ཡིག་གནས་ཐུབ་མིན་ནི། ཡར་འགྲོ་མར་འགྲོའི་ས་མཚམས་རྟ་ཁ་སྲབ་ཀྱིས་
བསྒྱུར་བ་ལྟ་བུའི་འགངས་ཆེའི་དུས་མཚམས་ཤིག་ཏུ་སླེབས་ཟིན་པ་དེ་ཡིན། རྒྱུ་མཚན་
གང་ཞིག་ཞེ་ན། ད་ལྟ་བོད་ཀྱི་སྤྱི་ཚོགས་ནི་གསར་པ་གསར་རྐྱང་ཞིག་ཏུ་གྱུར་ཟིན་པ་རེད། གསར་པ་ཐམས་ཅད་བདུད་ཀྱི་འཕྲུལ་དུ་སེམས་རུང་འདྲ་མ་སེམས་རུང་འདྲ་ཚན་རིག་
ཁོ་ནའི་ལམ་ལ་བརྟེན་ཏེ་སྤྱི་ཚོགས་ཡར་རྒྱས་གཏོང་བ་ལས་ཐབས་ལམ་གཞན་མེད་པར་
གྱུར་ཟིན་པ་རེད། དེ་འདྲ་ཡིན་དུས་བོད་རིགས་ཀྱི་གཞོན་ནུ་འབོར་ཆེན་ཞིག་གསོ་སྐྱོང་
བྱེད་དགོས་པ་དང༌། གསོ་སྐྱོང་བྱེད་ཡུལ་ནི་དེང་དུས་ཀྱི་སློབ་གྲྭ་ཆེ་འབྲིང་ཆུང་གསུམ་
བརྒྱུད་དགོས་པ་དང༌། སློབ་གྲྭ་དེ་དག་གི་བསླབ་བྱའི་སློབ་དེབ་ཁག་གི་ནང་དོན་ནི་དེང་
རབས་ཀྱི་ཚན་རིག་དང་རིག་གནས་ཤ་སྟག་ཡིན་པ་སྟེ། དཔེར་ན། དེང་དུས་ཀྱི་རྩིས་
རིག་དང༌། དངོས་ཁམས་རིག་པ། རྫས་འགྱུར་རིག་པ་སོགས་མཐའ་ཡས་པ་ཞིག་
ཡོད་ཅིང༌། དེ་ཚོ་བོད་ཡིག་གི་ཐོག་ནས་སློབ་དགོས་དུས་སློབ་ཆོག་གི་དེབ་ཀྱང་མེད་
པ་རེད། རྒྱུ་མཚན་དེའི་དབང་གིས་མི་ལ་ལས་བོད་ཀྱི་སྐད་ཡིག་རྗེས་ལུས་རེད་ཟེར་
བ་དང༌། བོད་ཡིག་ནི་བླ་མའི་ཡི་གེ་རེད་ཟེར་བ་དང༌། བོད་ཡིག་ལ་མདུན་ལམ་མེད་
ཟེར་བ་སོགས་ཀྱི་སྐད་ཆ་ཡོང་གི་ཡོད་པ་རེད། འོན་ཀྱང་འཛམ་གླིང་གི་སྐད་ཡིག་
གང་འདྲ་ཞིག་ཡིན་ཡང་ཐོག་མ་ཉིད་ནས་ཕུན་སུམ་ཚོགས་པ་དང་ཆ་ཚང་བ་ཞིག་
མིན་པར་རྒྱུན་མི་འཆད་པར་ཡར་རྒྱས་བཏང་བ་ཁོ་ན་ཡིན་པས་རང་རེ་བོད་ཀྱི་
སྐད་ཡིག་ཀྱང་སྤྱི་འགྲོས་དེ་ལ་བརྟེན་ཏེ་ཡར་རྒྱས་གཏོང་དགོས་པ་དང༌། གཏོང་
ཡང་ཐུབ་ཐག་ཆོད་ཡིན། འོན་ཀྱང་གཟི་བརྗིད་ཅན་གྱི་བྱ་བ་འདི་སྟེས་དབང་ངམ་
སྟབས་བདེ་པོ་ཞིག་གིས་སྒྲུབ་ཐུབ་པ་ཞིག་གཏན་ནས་མིན་པ་ཤེས་དགོས།
བྱ་རིམ་འདིའི་ནང་བསྒྲུབ་དགོས་པ་རགས་རིམ་ཙམ་བཤད་ན།
སྐད་ཡིག་ནི་རྨང་གཞི་ཡིན་པས་ཐོག་མར་བོད་ཀྱི་སྐད་ཡིག་གཉིས་པོ་མཐར་
ཕྱིན་པ་དང་བྱང་ཆུབ་པ་ཞིག་ཡིན་དགོས། དེ་ལྟར་ཡོང་བ་ལ་འབད་བརྩོན་
ཆེན་པོས་སྔར་སྲོལ་བོད་ཀྱི་རིག་གནས་ཀུན་སློབ་དགོས་པ་ལས་བོད་སྐད་
ཤོད་ཤེས་པ་དང༌། བོད་ཡིག་འབྲི་ཀློག་ཤེས་ཙམ་གྱིས་ཆོག་ཤེས་པར་མི་བལྟའོ། གལ་ཏེ་མི་རིགས་རང་ཉིད་ཀྱི་སྐད་ཡིག་བྱང་ཆུབ་པ་ཞིག་མ་ཤེས་པར་དེས་མི་
རིགས་གཞན་གྱི་སྐད་ཡིག་དང་རིག་གནས་སོགས་ཅི་ཙམ་ཤེས་ཀྱང་དེ་ལ་མཁས་
པ་ཡིན་པ་ཙམ་ལས། དེས་མི་རིགས་གཞན་གྱི་རིག་གནས་ཀྱི་ལེགས་ཆ་རྣམས་
བླངས་ཏེ་མི་རིགས་རང་གི་རིགས་གནས་ཡར་རྒྱས་གཏོང་བར་བྱས་རྗེས་
འཇོག་རྒྱུའི་རེ་བ་བྲལ་བ་རེད།
སློབ་སྦྱོང་བརྒྱུད་ཉིན་རེའི་འཚོ་བའི་ནང་རང་གི་རིག་གཞུང་བེད་སྤྱོད་བྱེད་རྒྱུ་དེ་ཤིན་
ཏུ་གལ་ཆེ་ཞིང༌། དེའི་གཞི་མ་ནི་བོད་ཀྱི་སྐད་ཡིག་ཡིན། འོན་ཀྱང། བོད་རིགས་
ནང་ཁུལ་དབྱིན་ཧིན་ཚིག་འདྲེས་པའི་བོད་སྐད་བཤད་པ་དང༌། གནས་འཕྲིན་
དབྱིན་ཡིག་ནང་འབྲི་བ། དགོས་སྡེ། བཤད་གྲྭ། སྒྲུབ་གྲྭ། ཆོས་ཚོགས་རྣམས་
ཀྱི་མཚན་བྱང་དང༌། ལས་ཁུངས་དང༌། ཚོང་ཁང༌། བཟོ་གྲྭ། མགྲོན་ཁང་སོགས་
ཀྱི་མིང་བྱང༌། ཆེད་བསྒྲག ཐོན་དངོས་ཀྱི་འགྲེལ་བཤད་དྲྭ་རྒྱ་རྣམས་དབྱིན་ཡིག་
གཙོ་བོར་འབྲི་སྲོལ་ཞིག་དར་བ་དང༌། གཞུང་སྒེར་གྱི་ཡིག་ཆ་འགའ་རེར་བརྡ་དག་
གསར་སྙིང་གང་དང་ཡང་མི་མཐུན་པའི་དབུས་པའི་ཕལ་སྐད་མང་པོ་འདྲེས་པ་དེ་
རྣམས་སྐད་ཡིག་ཡར་རྒྱས་དང་སྲུང་སྐྱོབ་ཕར་བཞག་རྩ་བརླགས་འགྲོ་བར་ཉེན་
ཁ་ཤིན་ཏུ་ཆེ། དེ་བས་རང་ཅག་ཚང་མས་སྐད་གཉིས་སྨྲ་བའི་བོད་རིགས་
གཞོན་ནུ་ཚོར་རྒྱབ་སྐྱོར་དང་སྐུལ་ལྕག་བཏང་སྟེ་རང་རེ་བོད་ཀྱི་སྐད་ཡིག་འདི་
སྔོན་ཐོན་ཡིན་པའི་སྐད་ཡིག་གཞན་གྱི་རྗེས་ཟིན་ཐུབ་པ་ཞིག་བྱེད་རྒྱུ་དེ་རང་རེའི་
ལས་འགན་ཡིན། སྔོན་ཐོན་ཅན་གྱི་མི་རིགས་དེ་ཚོའི་སྐད་ཡིག་ཀྱང་ཐོག་མ་ཉིད་
ནས་དུས་རབས་ཀྱི་དགོས་མཁོ་དང་འཚམ་པ་ཞིག་ཡིན་མི་སྲིད་ཀྱང་དུས་ཡུན་
ཧ་ཅང་རིང་པོ་ཞིག་གི་ནང་རྒྱུན་མི་ཆད་པར་ཡར་རྒྱས་བཏང་སྟེ་བྱུང་བ་ཡིན་པས་
རང་རེའི་སྐད་ཡིག་དང་རིག་གནས་ཀྱང་འཕེལ་མེད་རང་སོར་གནས་ཏེ་མི་སྡོད་
པར་མདུན་བསྐྱོད་དགོས་སོ།། །།
དཀོན་མཆོག་དར་རྒྱས་ཀྱིས།།
———
Back