གནད་ལ་ཁེལ་བའི་

གནད་ལ་ཁེལ་བའི་ངོས་འཛིན།

བོད་ཀྱི་བང་ཆེན་གསར་ཤོག་སྤྱིའི་འདོན་ཐེངས་ ༢༤༡ སྟེང་རྩོམ་སྒྲིག་པས་གཏམ།

ཟླ་འདིའི་ཕྱི་ཚེས་༦ ནས་ཉིན་གསུམ་རིང་བོད་རྒྱ་མཁས་པའི་ལྷན་ཚོགས་ཤིག་སུད་སིའི་གྲོང་ཁྱེར་ཇི་ནི་ཝ་རུ་འཚོགས་

ཡོད་པ་དང༌། གནད་དོན་མང་པོ་ཞིག་གི་ཐོག་ལ་བགྲོ་གླེང་དང་མཇུག་བསྡོམས་ཀྱི་ཡིག་ཆ་ཞིག་ཀྱང་གསལ་བསྒྲགས་

བྱས་ཡོད་པ་རེད། དེའི་ནང་ནས་བོད་ཀྱི་གནད་དོན་སེལ་བའི་ཐབས་ལམ་ཞེས་པའི་ནང་གསེས་གསུམ་པ།  “རྒྱ་རིགས་

ཚོས་རང་ཉིད་ཀྱི་རྒྱ་རིགས་ཆེན་པོའི་རིང་ལུགས་ལ་བཤགས་བསྡོམས་དང༌། བོད་མིའི་རིག་གཞུང་འཚོ་བ་སྐྱེལ་སྟངས་ལ་

བརྩི་བཀུར་བྱེད་དགོས་ ”ཞེས་འཁོད་ཡོད་པ་དང། མ་འོངས་པར་རིམ་བཞིན་རྒྱ་རིགས་ཕལ་མོ་ཆེའི་སེམས་ནང་དུ་ལྟ་ཚུལ་

འདིར་ངོས་འཛིན་གསལ་པོ་ཞིག་བྱུང་ན་གཞི་ནས་བོད་རྒྱའི་དཀའ་རྙོག་ཐག་གཅོད་ཡོང་རྒྱུར་རེ་བ་བྱེད་ཆོག་པ་ཞིག་ཡིན་

ལ།      ཆབ་སྲིད་པ་དང་མཁས་པ་ཚོས་བོད་རྒྱའི་གནད་དོན་ཐག་གཅོད་མི་ཐུབ་པའི་འབྱུང་རྐྱེན་ངོས་འཛིན་དང་འགྲེལ་

བཤད་ག་འདྲ་ཞིག་བརྒྱབ་མིན་ལ་མ་ལྟོས་པར།  དོན་དངོས་ཐོག་རྒྱ་མི་རིགས་ཀྱི་སེམས་ནང་དུ་མི་རིགས་ཆེན་པོའི་སྤོབས་

སེམས་ཁེངས་དྲེགས་ཀྱི་རིང་ལུགས་ཤུགས་ཆེན་པོ་ཡོད་པ་དང༌།     བོད་པ་ཐེ་བས་གྲངས་ཉུང་མི་རིགས་རྣམས་ནི་རྨོངས་

བརྟུལ་རྗེས་ལུས་ཅན་འབའ་ཞིག་ཡིན་པའི་འདུ་ཤེས་བརྟན་པོ་གནས་ཡོད་པ།

དུས་རྒྱུན་དུ་གྲངས་ཉུང་མི་རིགས་རྣམས་ལ་བཤུ་གཞོག་དང་གཉའ་གནོན་ག་འདྲ་ཞིག་བྱེད་བཞིན་ཡོད་ཀྱང༌། རྒྱ་མི་རིཌ་

ནི་གྲངས་ཉུང་མི་རིགས་རྣམས་ཀྱི་མགོན་སྐྱབས་ཡིན་པའི་ལྟ་ཚུལ་ནོར་བ་དེ་རྒྱ་མི་རིགས་ཕལ་མོ་ཆེའི་སེམས་ནང་དུ་གསལ

་པོ་ཡོད།        དེའི་ཐོག་ལ་རྒྱ་གཞུང་གི་དུས་ནས་དུས་སུ་མི་རིགས་རིང་ལུགས་ཀྱི་སློབ་གསོ་དང་དྲིལ་བསྒྲགས་ཀྱིས་གསོས་

བཏབ་ནས་བསམ་ཚུལ་དེ་ཤུགས་ཆེ་ནས་ཆེ་རུ་གཏོང་བཞིན་ཡོད་པ་དང༌། གནད་དོན་དེའི་འོག་ནས་བོད་ཀྱི་ས་ཁུལ་ཁག་

ཏུའང་རྒྱ་རིགས་རྣམས་ཀྱིས་བོད་མི་རིགས་ལ་མཐོང་ཆུང་དང་ཐུབ་ཚོད་འབའ་ཞིག་བྱེད་བཞིན་པས། བོད་མིའི་ངོས་ནས་

དུས་ནམ་ཡང་རྒྱ་གཞུང་གི་སྟངས་འཛིན་དང་རྒྱ་མི་རིགས་ཀྱི་མཉམ་དུ་གནས་མི་ཐུབ་པའི་བསམ་ཚུལ་དེ་སླེབས་ནས་ངོ་

རྒོལ་སྐད་འབོད་གང་མང་བྱེད་དགོས་པའི་རྒྱུ་མཚན་གཅིག་འདི་ལ་ཐུག་ཡོད་པ་རེད།

རྒྱ་མི་རིགས་ཀྱི་ནང་དུ་མི་རིགས་ཆེན་པོའི་རིང་ལུགས་སམ་རྒྱ་མི་རིགས་ཀྱི་རིང་ལུགས་ལ་བརྟེན་ནས་གྲངས་ཉུང་མི་རིགས་

རྣམས་ལ་མཐོང་ཆུང་དང་བརྙས་བཅོས་ཐུབ་ཚོད་བྱེད་བཞིན་པ་འདི་ནོར་འཁྲུལ་ཡིན་པའི་ངོས་འཛིན་ཡོང་དགོས་པ་ནི་

གནད་དོན་ཆེན་པོ་ཡིན་ལ། ངོས་འཛིན་དེའི་འོག་ནས་བོད་མི་རིགས་སོགས་གྲངས་ཉུང་མི་རིགས་རྣམས་ལ་རང་སྲིད་རང་

སྐྱོང་དང༌།   རང་ཐག་རང་གཅོད་སོགས་ཕྱོགས་གང་ཐད་ནས་གདམ་ག་གང་མང་ཞིག་སྤྲད་རྒྱུའི་སྤོབས་པ་དེ་ཡང་སླེབས་

ཐུབ། ད་ལྟ་བོད་རྒྱའི་འགལ་ཟླ་དེ་རྒྱ་བོད་མི་རིགས་གཉིས་ཀྱི་འགལ་ཟླ་གཏན་ནས་མིན་ཚུལ་ག་ཚོད་བརྗོད་ཀྱང་ཕན་པ་མེད་

ལ། དངོས་ཡོད་གནས་ཚུལ་གྱི་ཐོག་ནས་བཤད་སྟངས་དེ་བདེན་པ་ཡིན་མིན་ཡང་ཤེས་ཐུབ་པ་ཞིག་རེད།

ད་ལྟ་ཚོགས་ཐོག་ཏུ་རྒྱ་མི་རིགས་ཀྱི་རིང་ལུགས་ལ་བཤགས་བསྡོམས་དང༌། བོད་མིའི་རིག་གནས་འཚོ་བ་སྐྱེལ་སྟངས་ལ་

བརྩི་བཀུར་བྱེད་དགོས་པའི་ཐག་གཅོད་དེའི་ཤུགས་ལ་གོ་ཐུབ་པ་ནི། ད་བར་རྒྱ་མི་རིགས་ཀྱི་ངོས་ནས་མི་རིགས་ཆེན་པོའི་

རིང་ལུགས་ཀྱི་ཁེངས་དྲེགས་འོག་ནས། གྲངས་ཉུང་མི་རིགས་ཀྱི་བདེན་དོན་དང་རིག་གནས་འཚོ་བ་ལ་བརྩི་བཀུར་མ་

བྱས་པར་ངོས་འཛིན་བྱས་པ་ཞིག་ཡིན་ལ། དོན་དམ་དུའང་བོད་རྒྱའི་དབར་མི་མཐུན་པའི་འགལ་ཟླ་ནི་གཅིག་ནས་ལོ་

རྒྱུས་ཀྱི་ཐོག་ནས་བོད་རང་བཙན་ཡིན་བཞིན་དུ་རྒྱ་ནག་གིས་བཙན་བཟུང་བྱས་པ་ཞིག་དང༌།       གཉིས་ནས་གོང་དུ་

བརྗོད་པ་བཞིན་མི་རིགས་དང་རིག་གནས་སོགས་ཕྱོགས་གང་ཐད་ནས་འདྲ་མཉམ་མིན་པའི་གནས་སྟངས་ལ་བརྟེན་

ནས་བྱུང་ཡོད། ཚོགས་ཆེན་དེའི་ཐོག་ནས་ངོས་འཛིན་བྱས་པ་དེས་རྒྱ་མི་རིགས་ཀྱི་ངོས་ནས་དུས་རྒྱུན་བོད་མི་རིགས་ལ་

འཛིན་པའི་རྣམ་འགྱུར་དང་བསམ་བློ་ཁུར་སྟངས་ཀྱི་ཐོག་ལ་ཕྱོགས་བསྡོམས་ལྟ་བུར་ཡང་ངོས་འཛིན་བྱེད་ཆོག།

མ་འོངས་པར་འབབ་ས་འདིའི་ཐོག་ཏུ་འབབ་ཐུབ་ནས་རྒྱ་མི་རིགས་ཀྱིས་གྲངས་ཉུང་མི་རིགས་རྣམས་ལ་འཛིན་པའི་ལྟ་

ཚུལ་ལ་འགྱུར་བ་སོང་སྟེ། རྒྱ་དམར་གཞུང་གིས་བོད་དོན་ཐོག་འཛིན་པའི་སྲིད་བྱུས་ལ་འགྱུར་བ་ཞིག་འགྲོ་ཐུབ་ན་གཞི་

ནས་གྲོས་མོལ་དང་ཞི་མཐུན་གྱི་ལམ་ནས་བོད་དོན་ཐག་གཅོད་བྱེད་པའི་འགགས་རྡོ་དེ་སེལ་ཐུབ་པ་ཞིག་ཏུ་གྱུར་པ་ལས།

གཞན་མི་རིགས་ས་གནས་རང་སྐྱོང་སོགས་དགོས་འདུན་ཚད་དམའ་མོ་ཇི་འདྲ་ཞིག་བཏོན་ཡང་རྒྱ་གཞུང་གིས་དོན་དམ་

གྱི་ཡ་ལན་ཞིག་སྟེར་མི་སྲིད་པ་མངོན་གསལ་དུ་གྱུར་ཡོད།།