གངས་ལྗོངས་མིའི་ཁྱད་ཆོས

 གངས་ལྗོངས་མིའི་ཁྱད་ཆོས།

དྭངས་གཙང་མཐོ་སྒང་ཡངས་པའི་ཁ་བའི་ལྗོངས། །

མཛེས་ཤིང་བརྗིད་ཆགས་དཔལ་འབར་ལྷ་ཡི་གནས། །

འཛམ་གླིང་སྐྱེ་བོ་ཡོངས་ཀྱིས་རབ་བསྔགས་པ། །

གངས་ཅན་རྒྱལ་ཁབ་ཆེན་པོའི་ཁྱད་ཆོས་ཡིན། །

མུ་མཐའ་ཐུག་ཐབས་བྲལ་བྲལ་བའི་ཟབ་རྒྱས་ཆོས། །

མཐའ་ཀླས་རྒྱལ་ཁབ་ཀུན་ལ་འཆད་དང་སྤེལ། །

བསམ་བཞིན་བསྟན་འགྲོའི་དཔུང་གཉེན་སྲིད་པ་བཟུང་། །

གངས་ཅན་མཆོག་གི་སྤྲུལ་སྐུའི་ཁྱད་ཆོས་ཡིན། །

གསང་སྔགས་རྡོ་རྗེ་ཐེག་པའི་རྒྱལ་ས་ནས། །

བྱོན་ཞིང་རྩ་དང་རླུངས་སེམས་དབང་དུ་བསྒྱུར། །

གོས་དཀར་གངས་རི་ལྟ་བུའི་རྒྱན་མཛེས་ཀླུབ། །

གངས་ཅན་བསྔགས་འཆང་ཆེན་པོའི་ཁྱད་ཆོས་ཡིན། །

གཞིས་བཞུགས་རང་ཡུལ་གངས་དཀར་འཚོང་པ་མེད། །

ཕྱིས་བསྐྱོད་ཕ་ཡུལ་གངས་ལྗོངས་བརྗེད་ཐབས་མེད། །

གཞིས་བྱེས་ཚང་འཛོམས་སེམས་ཁུར་གཅིག་ཏུ་སྒྲིམ། །

གངས་ཅན་སྟག་ཤར་གཞོན་ནུའི་ཁྱད་ཆོས་ཡིན། །

ལུས་ཕྲ་སྒེག་མོས་མཛའ་བཤེས་གྲོགས་ལ་བྱམས། །

རྒན་ལ་གུས་བཀུར་ཡ་རབས་སྲོལ་བཟང་ཀུན། །

མ་བཅོས་བརྩོན་ཞིང་ངོ་ཚའི་རིགས་ཀུན་འཛིན། །

གངས་ཙན་སྨན་ཤར་གཞོན་ནུའི་ཁྱད་ཆོས་ཡིན། །

གཞན་དོན་ཁབ་རྩེ་ཙམ་ལ་བཟོད་སེམས་བགྱིད། །

ཕྱི་མའི་ལམ་རིང་བསམ་བཞིན་ཆོས་ལ་བརྩོན། །

ཀླ་ཀློའི་སྡུག་རྩུབ་གླེང་དུས་མཆི་མ་ཤོར། །

གངས་ཅན་དབྱུག་འཛིན་རྒན་མོའི་ཁྱད་ཆོས་ཡིན། །

ལམ་སྲོལ་རྙིང་པའི་རིགས་ལ་དབང་མེད་མཆོང་། །

རང་ཡུལ་རང་བཙན་མིག་ལ་ལྷང་ལྷང་སྣང་། །

རྨི་ལམ་ནང་ཡང་བོད་དུ་སླེབས་པ་རྨིས། །

གངས་ཅན་ཕྲེང་འཇུས་རྒན་པོའི་ཁྱད་ཆོས་ཡིན། །

ཕ་ཡུལ་དགྲ་ལག་ཤོར་བའི་ས་མཐའ་ལ། །

ཆང་དང་ཤོ་བག་རྩེད་ལ་མགོ་མི་སྒུར། །

ལུས་སེམས་ཧུར་ཐག་འཚོ་བའི་ཐབས་ལ་བརྩོན། །

གངས་ཅན་ཚོང་དཔོན་པོ་བཟང་པོའི་ཁྱད་ཆོས་ཡིན། །