ལེན་མཁན།                                                བློ་བཟང་།

              ༡༽

གངས་ཅན་བོད་ཀྱི་རྒྱལ་ལོ། །

རྒྱལ་བ་བསྟན་འཛིན་རྒྱལ་མཚོ། །

གངས་རི་ལྗོངས་ལ་བྱོན་ནས། །

ཞབས་པད་བརྟན་པའི་བཀྲ་ཤིས། །

               ༢༽

གདོང་དམར་བོད་ཀྱི་དེད་དཔོན། །

པཎ་ཆེན་སྣང་བར་མཐའ་ཡས། །

གདོང་དམར་བོད་ལ་བྱོན་ནས། །

དར་ཞིང་རྒྱས་པའི་བཀྲ་ཤིས། །

            ༣༽

འདི་ཕྱིའི་གཏན་གྱི་སྐྱབས་གནས། །

སྐྱབས་རྗེ་ཀརྨ་རིན་ཆེན། །

ཁ་བའི་ལྗོངས་ལ་བྱོན་ནས། །

ཞབས་པད་བརྟན་པའི་བཀྲ་ཤིས། །

                 ༈

བསིལ་ལྡན་ཁ་བའི་ལྗོངས་ལ། །

སྐྱབས་རྗེ་ཉི་ཟླ་སྐར་གསུམ། །

གངས་རི་ལྗོངས་ལ་བྱོན་ནས། །

བོད་མིའི་རླུང་རྟ་དར་སོང་། །

མདོ་དབུས་ཁམས་གསུམ།

ཡུལ་ཁྱད་འཕགས་གངས་ཅན་ཁ་བའི་ལྗོངས། །

སྟོད་དབུས་གཙང་ཆོས་ཀྱི་ཆོལ་ཁ་འདི། །

བྱམས་སྙིང་རྗེ་ཆེ་ཞིང་དགེ་བཅུ་ལྡན། །

གནས་ངོ་མཚར་ལོ་རྒྱུས་འབུམ་གྱིས་ཕྱུག། །

བར་མདོ་ཁམས་མི་ཡི་ཆོལ་ཁ་འདི། །

དཔལ་ཕུན་ཚོགས་སྲིད་པའི་འབྱོར་བ་དང། །

དཔལ་རྩལ་དྲུག་རྫོགས་ཤིང་ལ་རྒྱ་ཆེ། །

བོད་ཁ་བ་ཅན་གྱི་གཟི་བརྗིད་ཡིན། །

སྨད་ཨ་མདོ་རྟ་ཡི་ཆོལ་ཁ་འདི། །

བློ་རྣམ་དཔྱོད་ནམ་མཁའི་འཇའ་ལྟར་གསལ། །

གཞུང་མདུད་བརྒྱ་བཀྲོལ་བའི་ཤེས་རབ་ཆེ། །

ལས་བླང་དོར་གནད་ལ་ནོར་བ་མེད། །

བོད་ཆོལ་གསུམ་གདོང་དམར་གངས་རིའི་བུ། །

རིགས་བཟང་པོ་འོད་གསལ་ལྷ་ནས་ཆད། །

ལྷོ་འཛམ་གླིང་སྲིད་པའི་མཛེས་རྒྱན་དུ། །

ས་གོ་ལའི་གཙུག་ན་མངོན་པར་འཕགས། །

བདེན་གཏམ་སྨྲ་བ།

               སྙིང་སྟོབས་ནི་ཅི་ཡང་མེད་པར་སྨྲ་བའི་རྟོག་པ་མྱུར་པོ་དེ་མ་ཡིན་ལ། གང་ལའང་མི་འཛེམ་པར་སྨྲ་བའི་

བླུན་པོའི་རྒྱགས་གཏམ་ཡང་མ་ཡིན། སྙིང་སྟོབས་ནི་ཤེས་བྱའི་དེ་ཁོ་ན་ཉིད་རྟོགས་པའི་མཐར་ཐུག་གི་ཡེ་ཤེས་དེ་མ་

ཡིན་ལ། འཇིག་རྟེན་ཐུན་མོང་གི་འདོད་ཚུལ་རྩིང་པོ་དེ་ཡང་དེ་བས་མ་ཡིན། སྙིང་སྟོབས་ནི་སྐྱེས་བུ་རེ་རེའི་རྒྱུད་ན་

རང་ཚུཊ་སུ་ཆགས་ཤིང་རྣམ་དཔྱོད་ཀྱི་དཔལ་འབར་བའི་འདུ་ཤེས་རིགས་ཤིག་ཡིན། དེར་བརྟེན། སྙིང་སྟོབས་ནི་མི་

དང་མི། མི་རིགས་དང་མི་རིགས།    ཡང་ན་གོ་ལ་དང་གོ་ལ་ཕན་ཚུན་གྱི་ཁྱད་པར་འབྱེད་པའི་ཆོས་ཉིད་ཅིག་ཀྱང་

ཡིན། ད་ལྟ་ངས་འདིར་འཆད་འདོད་པ་ནི།   ང་ཚོའི་རྩོམ་རིག་དང་ཡང་སྒོས་སྙན་ངག་ལ་མི་རིགས་ཀྱི་རིག་གནས་

སྙིང་སྟོབས་ལྡན་དགོས་པ་དེ་ཡིན།
　　ཕྱི་རྒྱལ་དུ་བཞུགས་པའི་བོད་མི་ཞིག་ལ་མཚོན་ན་བཙན་བྱོལ་བོད་མིའི་སྙིང་སྟོབས་ལྡན་དགོས་པ་ཡིན་ལ།

ཕ་ས་འདིའི་ལྟེ་བར་ཆཊ་པའི་བོད་མི་ལའང་རང་སོའི་རིག་གནས་སྙིང་སྟོབས་མེད་ན་རྩ་བ་ནས་འགྲིག་ཐབས་མེད།

དེ་བས་བོད་མི་ཞིག་ལ་མཚོན་ན་བོད་མིའི་རིག་གནས་ཀྱི་སྙིང་སྟོབས་ཤིག་ལྡན་དགོས་པ་མ་ཟད།     ང་ཚོས་རང་མི་

རིགས་ཀྱི་རིག་གནས་སྙིང་སྟོབས་དེ་སྒྱུ་རྩལ་གྱི་ཐབས་ལམ་མི་འདྲ་བ་བརྒྱུད་ནས་འཛིན་པ་དང་། སྐྱོང་བ།   འཕེལ་བ་

བཅས་ཀྱི་སླད་དུ་འབད་བརྩོན་བྱེད་དགོས་པ་ཡིན།     ད་ལྟའི་དུས་སུ་སྒྱུ་རྩལ་གྱི་བརྩམས་ཆོས་རེ་འགའ་ལས་ལས་ཀ་

འདིའི་ཐད་ཅུང་ཟད་དམ་འཛིན་ཐུབ་ཡོད་པའི་རྣམ་པ་མངོན་ལ། དེ་ནི་ང་རང་ཚོའི་ངོས་ནས་བརྗོད་ན་ཧ་ཅང་དགའ་

འོས་པ་ཞིག་ཏུ་སྙང་། དེ་ཡང་དཔེར་ན། ནག་ཆུའི་གླུ་པ་ཆོས་འཕེལ་གྱིས་བླངས་པའི་གླུ་གཞས་《ཆོས་ཉིད་ལགས་》

ཞེས་པ་ལྟ་བུ་དང་། མདོ་སྨད་ཀྱི་བུད་མེད་གླུ་མ་ (མིང་ནི་མི་ཤེས་）བླངས་པའི་《མ་ཎི་འབུམ་

(玛尼墙）》ལྟ་བུ། དེ་བཞིན་རྒྱལ་ཕྱིའི་བོད་ཀྱི་གླུ་པ་（མིང་ནི་དེ་ལྟར་མི་ཤེས་པར་འདུག）བླངས་

པའི་《རྡ་རམ་ས་ཡི་ཕོ་གཞོན་ཡིན་ན་བསམ་བྱུང་》ཞེས་པ་ལྟ་བུ་ནི་རྒྱ་ཆེའི་འཛད་སྤྱོད་པས་ཧ་ཅང་དགའ་བ་

བྱེད་པའི་གླུ་གཞས་ཤ་སྟག་ཡིན་པ་མ་ཟད། གླུ་གཞས་དེ་དག་ནི་བསམ་བློའི་ནང་དོན་དང་སྒྱུ་རྩལ་གྱི་རྣམ་པ་གཉིས་

ཀའི་ཆ་ནས་ད་ལྟའི་དུས་རབས་ཀྱི་བོད་མིའི་རིག་གནས་དང་དངོས་པོ་གཉིས་ཀྱི་འགལ་རྐྱེན་རྔམས་པོ་ཆེ་ཞིག་ལ་

འཕིགས་པ་ཤ་སྟག་སྟེ། ལོ་རྒྱུས་དང་དོན་དངོས་ཀྱི་འགལ་རྐྱེན་མདུན་དུ་ལྷགས་པའི་དུས་རབས་ཀྱི་བོད་མིའི་དཀྱེལ་

ཆེ་ཞིང་བློ་ཁ་ཡངས་པའི་བསམ་པའི་རང་བཞིན་དང་། ཡང་ན་བོད་མིའི་རང་བཞིན་ལྷན་སྐྱེས་དང་བཅོས་མ་མ་ཡིན་

པའི་བསམ་པའི་འཁྱེར་སོ་དང་རིག་གནས་ཀྱི་སྙིང་སྟོབས་གང་ལེཊ་ཤིག་མཚོན་ཡོད་པ་ཡིན་སྙམ།   འོན་ཏེ་བརྩམས་

ཆོས་དེ་དག་ལས་མཚོན་པའི་རིག་གནས་ཀྱི་སྙིང་སྟོབས་ནི་ད་དུང་གཏིང་ཟབ་པོ་མ་ཡིན་ལ་མཚོན་སྟོབས་ཀྱང་ཤན་

ཆེ་བ་ཞིག་མ་རེད།    ལྷག་པར་དུ་ང་ཚོའི་རྩོམ་རིག་དང་ཡང་སྒོས་སྙན་ངག་གི་བརྩམས་ཆོས་ལ་མཚོན་ན་ཁ་གྲངས་

ཙམ་ལས་སྒྱུ་རྩལ་གྱི་གྲུབ་འབྲས་ཐད་བོད་མིའི་བསམ་བློའི་འཁྱེར་སོ་དང་།   རིག་གནས་ཀྱི་རྨང་གཞི།ཕུགས་བསམ་གྱི་

རེ་འདུན་དག་ཚད་གཞི་ཇི་ལྟ་བུའི་ལམ་དུ་སྙེག་ཡོད་པ་སྨྲ་སྤོབས་བྲལ་བ་ཞིག་ཏུ་ངེས།    དེ་བས་ང་རང་གི་ངོས་ནས་

བལྟས་ན།    ང་ཚོའི་མིག་མདུན་གྱི་ལས་ཀ་རླབས་པོ་ཆེ་ཞིག་ནི་ང་ཚོས་དུས་རབས་དང་མཐུན་པར་སྒྱུ་རྩལ་གྱི་བདེན་

པའི་རང་བཞིན་ལ་བརྟེན་ནས་བོད་མིའི་འཚོ་ཁམས་དང་མཐུན་པའི་རིག་གནས་རྣལ་མ་དག་འཛིན་པ་དང་། སྐྱོང་

བ། སྤེལ་བ་བཅས་ཀྱི་ཐད་བསམ་བློ་ནན་པོ་གཏོང་དགོས་པ་ཡིན།
　　 ད་ལྟའི་དུས་སུ་ང་ཚོའི་བསམ་བློ་གཏོང་སྟངས་ནི་ང་ཚོའི་རིག་གནས་ཀྱི་ངོ་བོའི་ཕྱོགས་ལ་མ་བརྩད་པར་

རང་ཉིད་ཀྱི་འདོད་ཕྱོགས་ཁོ་ནའི་དབང་དུ་འཆོར་བའི་དཀའ་ཉེན་ཆེན་པོ་ཡོད་པ་ཡིན། ལྷག་པར་དུ་སྒྱུ་རྩལ་རང་

ངོས་དང་སྒྱུ་རྩལ་གྱི་ལམ་དུ་ཞུགས་པའི་མི་ཞིག་ལ་མཚོན་ན་དེ་ནི་འཇིཊ་ཉེན་ཧ་ཅང་ཆེ་བ་ཞིག་རེད་།    དེ་ནི་སྒྱུ་

རྩལ་པ་ཞིག་གི་ཕུགས་བསམ་དེ་ཇི་ཙམ་བཟང་པོ་ཡིན་མོད།  ན་ཏེ་ཁོ་པར་རིག་གནས་ཀྱི་ལྟ་བ་ཡང་དག་པ་ཞིག་མི་

དབང་ན་ཕུགས་ལམ་བདེ་མོ་ཞིག་ཏུ་འབྱོར་བ་བརྗོད་ཁག་པོ་རེད་ལ།     ཁོ་པའི་སྒྱུ་རྩལ་གྱི་ཕུགས་བསམ་ནི་དེ་བས་

མངོན་དུ་འགྱུར་དཀའ། དེར་བརྟེན། ང་ཚོས་དུས་རབས་ཀྱི་རྗེས་མ་ཆོད་པའི་རིག་པ་རྟུལ་པོ་དང་། སྔོན་ཐོན་གྱི་གྲལ་

ལ་སྙེག་པའི་འདོད་པ་རྨུགས་པོ་དེ་ལས་སད་ཐབས་ལ་གཞོལ་དགོས་པ་ནི་དོན་དངོས་དང་མཐུན་པའི་སྔོན་འགྲོའི་

ལས་ཀ་གལ་ཆེན་ཞིག་ཏུ་མཐོང་། གལ་ཏེ་ང་ཚོས་མི་རིགས་རིག་གནས་ཀྱི་ལོ་རྒྱུས་དང་།   མི་རིགས་རིག་གནས་ཀྱི་

བསམ་པའི་རྨང་གཞི། མི་རིགས་རིག་གནས་ཀྱི་ཁོར་ཡུག་སྟེ། མདོར་ན་བོད་མིའི་རིག་གནས་ཀྱི་འདུ་ཤེས་དང་བསམ་

བློའི་མཛེས་དཔྱོད་ཀྱི་ཕུགས་བསམ་སོགས་ལ་རྒྱུས་མངའ་ཅི་ཡང་མེད་པའམ། དེར་ཡང་དག་པའི་ངོས་འཛིན་དང་

ཤེས་རྟོགས་བྱེད་པའི་དམིཊ་གཏད་ཅི་ཡང་མེད་པར་སེམས་བྱིང་རྒོད་ཀྱི་དབང་དུ་གོལ་བར་འགྱུར་ཚེ།དུས་རབས་

ཀྱི་རླབས་འགྱུར་དྲག་པོའི་ཁྲོད་ང་ཚོ་ནི་ནམ་ཡང་སྔོན་ཐོན་གྱི་མིང་སྐམ་པོ་ཞིག་གིས་རྨོངས་ཏེ་ལུས་པའམ།ཡང་ན་

དཀའ་ཉེན་འདི་ལས་གྲོལ་བའི་ཐར་ལམ་ཡང་དག་པ་མ་རྙེད་པས་མཐར་བདག་ཉིད་བརྙས་པའི་ལེ་ལོས་ཕྱིར་བཤོལ་

བྱ་བའི་ཅོལ་ཆུང་གི་ངང་ཚུལ་འཛིན་པ་ཙམ་དུ་ཟད་པར་ངེས།
　　ང་ཚོའི་རིག་གནས་ཀྱི་རྩ་བའི་ལྟ་བ་ནི་ཞི་བ་དང་། བརྟན་པ། ཟབ་པ།ཡངས་པ་ཞིག་ཡིན་སྟབས།      དྭངས་

གཙང་དང་། འཚེ་བ་མེད་པ། བདེ་བ།ཡིད་འོང་བཅས་ཀྱི་བོད་ཀྱི་རིག་གནས་ཀྱི་འདུ་ཤེས་འདི་བཞིན་འཛམ་གླིང་སྤྱིའི་

ཕུགས་འདུན་ཆེད་དུ་དར་སྤེལ་གཏོང་བར་འབད་དགོས། ད་ཆ་ང་ཚོའི་རྩོམ་རིག་སྒྱུ་རྩལ་ལ་འཇིཊ་ཉེན་ཆེན་པོ་འཕྲད་

ཡོད་པའང་ང་ཚོའི་རྩོམ་རིག་གི་ལས་འགུལ་ཅི་འདྲ་ཞིག་ཡིན་རུང་དེར་རང་མི་རིགས་ཀྱི་རིག་གནས་སྙིང་སྟོབས་རྒྱུན་

འཛིན་བྱེད་པའི་ཤེས་རབ་རྙེད་མེད་པ་དེ་ཡིན།    ད་ཆ་བོད་ཀྱི་རྩོམ་རིག་གྱི་ལས་ལམ་ལ་གཞོལ་བའི་རྩོམ་པ་པོ་དང་།

རྩོམ་སྒྲིག་པ། དེ་བཞིན་ཀློག་པ་པོའི་ཁྲོད་དུ་ལྟ་བ་ངན་པོ་ཞིག་འབྱམས་ཡོད་པ་ནི་རང་མི་རིགས་ཀྱི་རིག་གནས་ལ་

“སྲོལ་རྒྱུན་རིག་གནས་”ཞེས་བརྙས་པའི་གནས་སུ་འཛིན་པ་དང་།    བོད་མིའི་བསམ་བློའི་འདུ་ཤེས་འཛིན་

སྟངས་ལ་མཐའ་གཅིག་གི་རྗེས་ལུས་སུ་དམོད་ཅིང་ནག་གསོད་གཏོང་བའི་དཀའ་ཉེན་ཆེན་པོ་སྤྲད་ཡོད།འོན་ཏེ་

དོན་དམ་དུ་མི་རིཊ་གང་དང་གང་ཡིན་ཡང་རང་མི་རིཊ་ཀྱི་རིག་གནས་ལ་བརྩི་མཐོང་བྱེད་པ་དེ་ནི་རང་བཀུར་

གྱི་ལ་རྒྱ་འཁྲུལ་མེད་ཅིག་ཡིན་ལ  །རང་བཀུར་གྱི་ལ་རྒྱ་དེ་རང་རྒྱུད་ལ་འཚགས་མིན་དེ་ཡང་རང་མི་རིཊ་ཀྱི་རིག་

གནས་དང་རིག་གནས་ཀྱི་སྙིང་སྟོབས་ཤིག་རང་རྒྱུད་ལ་སིམ་ཡོད་མེད་དེར་ཐུག་ཡོད། གལ་ཏེ་ཤེས་ཡོན་ཅན་ཞིག་

ལ་མི་རིཊ་རིག་གནས་ཀྱི་མ་གཞིའི་སྙིང་སྟོབས་ཙམ་ཞིག་ཀྱང་མ་འཛོམས་ཚེ་དེ་ནི་རང་སྟོབས་ཀྱི་བསམ་པ་མེད་

པའི་མི་རྐྱ་ཕལ་པ་ཞིག་ལ་ངེས་པར་བརྩིས་ཆོག་ཅིང་། དེ་འདྲའི་“མི་བུ་”ནི་སླད་མར་ཡང་དོན་དངོས་དང་

མི་འཚམས་པའི་མི་ཡ་མ་ཟུང་ཞིག་ཏུ་འགྱུར་བར་ཐེ་ཚོམ་ཅི་ཡང་མེད་དོ།   གང་ཡིན་ཟེར་ན།མི་རིགས་གང་ཞིག་

གི་རིག་གནས་ཀྱི་ལོ་རྒྱུས་དེ་ལོ་ངོ་སྟོང་ཕྲག་དུ་མའི་རིང་དར་ཞིང་ད་ལྟའི་བར་བསྲིངས་ཐུབ་པ་ནི་སྟེས་དབང་དང་

ལས་སླ་མོ་ཞིག་གཏན་ནས་མ་ཡིན་ཞིང་།དེ་ལྟ་བུའི་ལོ་རྒྱུས་ཀྱི་དུས་ཡུན་རིང་པོའི་ནང་ཆཊ་པའི་མི་རིགས་གང་གི་

རིག་གནས་སྙིང་སྟོབས་ཀྱང་ལོ་རྒྱུས་ཀྱི་འགལ་རྐྱེན་མང་པོའི་ལག་ལེན་ཁྲོད་བརྡར་གཅོད་ཡང་ནས་བསྐྱར་དུ་བྱས་

པ་ལས་རྙེད་པ་ཞིག་ཡིན་པའི་རྐྱེན་གྱིས་རེད།རང་རེ་བོད་ཀྱི་རིག་གནས་ལ་མཚོན་ནའང་རང་མི་རིཊ་ཀྱི་རང་བཞིན་

ཟབ་མོ་ལྡན་པའི་ཆེས་ཕུལ་བྱུང་གི་རིག་གནས་ཤིག་ཡིན་པ་ནི་གླེན་པ་ཁ་འཆམ་ནས་ཨུ་ཚུགས་བྱེད་དགོས་པ་ཞིག་

མ་ཡིན་པར་འཛམ་གླིང་གི་སྔོན་ཐོན་རྒྱལ་ཁབ་དང་། སྔོན་ཐོན་མི་རིགས།དེ་བཞིན་སྔོན་ཐོན་གྱི་ས་ཁུལ་དག་གིས་མ་

གྲོས་ཞེ་མཐུན་ངང་དོན་གཉེར་དང་ལག་ལེན་དུ་འགེལ་བར་ཕྱོགས་པ་འདིས་དཔོག་ཐུབ། འོན་ཀྱང་ཁ་ཅིག་དེ་ལ་

མཐོང་བ་མངོན་འགྱུར་འཇལ་བའི་མངོན་སུམ་གྱི་རིག་པ་མེད་ཅེ་ན།དེ་ནི་མིག་མདུན་གྱི་ཁེ་ཕན་ཕྲན་ཚེགས་ཀྱི་སླད་

དུ་ཤ་ཐང་དུ་འབད་པའི་མི་ལ་ནི་རང་གི་ཨ་མའི་བྱད་བཞིན་ཙམ་ཡང་མ་ངེས་པའི་ཚོད་དུ་སྣང་ན་དེ་ལྟ་ཅི་སྨྲོས་

ཀྱང་དགོས་ཏེ་མི་དགོས་སོ།  དེས་ན་ལོག་པར་རྟོག་པས་ཀུན་ནས་མནར་བའི་སྐྱེ་བོ་དག་ནི་བདེན་པའི་གཏམ་ལ་རྣ་

དབང་ཡེ་མི་གཏོད་ཅིང་། ཤེས་རབ་དམན་པ་དང་བརྩོན་འགྲུས་ཞན་པའི་སྐྱེ་བོ་ལ་ལ་ནི་རང་ངོས་ནས་བརྡར་ཤ་

གཅོད་པའི་བློ་ཅི་ཡང་མེད་པར་རྟག་ཏུ་གཞན་གྱི་ལོག་བཤད་ཀྱིས་སྦྲིད་སྟབས།བསམ་ཕྱོཊ་ཀུན་ཀྱང་གཞན་དབང་

ཁོ་ནར་གྱུར་པའི་ངང་ཚུལ་ལས་མ་འདས་ཤིང་། ལྷག་པར་ཤེས་རབ་དམན་པའི་མི་དག་ནི་དགོད་སླ་ཞིང་ངུ་ཡང་

སྐྱེན་པས་ན་བླུན་པོ་ཆུ་སྣ་གར་འཁྲིད་ཀྱི་རིག་པ་སྙོམ་པོ་དེར་ངོས་ཟིན་ཡང་དག་པ་ཞིག་བྱེད་དགོས་པ་ནི་ད་ལྟའི་

དུས་སུ་ང་ཚོའི་རིག་རྩལ་སྤྱི་དང་རྩོམ་རིག་གི་ལས་དབང་དང་ཐད་ཀར་འབྲེལ་བ་ཞིག་རེད།
　　མི་ཁ་ཤས་ཀྱི་བསམ་པར།མི་རིགས་རིག་གནས་ཀྱི་སྙིང་སྟོབས་འཛིན་པ་དང་།  སྐྱོང་བ། དར་སྤེལ་གཏོང་

བ་དེ་ཀླད་རྙིང་མཁྲེགས་བཟུང་གི་བྱ་སྤྱོད་ཅིག་ཏུ་རློམས་སྲིད་མོད། འོན་ཀྱང་། རང་ངོས་ཀྱི་རིག་གནས་རྨང་གཞི་ཅི་

ཡང་མེད་པའི་མི་རིགས་ཤིག་དང་མི་རིགས་ཀྱི་རིག་གནས་དེ་ནི་དོན་དམ་དུ་མི་རིགས་གཞན་གྱི་རིག་གནས་ཀྱི་

འཁོལ་པོར་འགྱུར་བ་ལས་འོས་མེད་ལ།དེ་ལྟ་བུའི་མི་སྒེར་རམ་མི་རིགས་དེ་ཡང་མི་གཞན་དང་མི་རིགས་གཞན་གྱི་

བསམ་པ་དང་རིག་གནས་ཀྱི་དབང་དུ་འགྱུར་ཏེ་མཐའ་མ་ཁྱི་ཕག་གི་གྲལ་ལ་ཡང་མི་ཚུད་པ་ངེས་གཏན་རེད།གཞན་

ཡང་།ང་ཚོས་མི་རིགས་རིག་གནས་ཀྱི་སྙིང་སྟོབས་འཛིན་པ་དང་།སྐྱོང་བ།འཕེལ་རྒྱས་གཏོང་དགོས་ཟེར་བ་ནི་རང་མི་

རིགས་ཀྱི་མེས་པོ་གོང་མ་རྣམས་ཀྱི་རྣམ་དཔྱོད་ཀྱི་སྙིང་པོ་སྡུད་དགོས་པ་མ་ཟད།མེས་པོའི་རྣམ་དཔྱོད་ཀྱི་སྙིང་པོ་གཅིག་

ཏུ་བསྡུས་པའི་མི་རིགས་རིག་གནས་ཀྱི་སྙིང་སྟོབས་དེ་བཞིན་ང་ཚོའི་གཤིས་ཉམས་དང་ཁྱད་རྟགས་ཤིག་ཏུ་འཛིན་

དགོས་ཟེར་བ་ཡིན་གྱི།ཁ་ཅིག་ལ་དོན་མེད་ཀྱི་དངངས་སྐྲག་བསླངས་ཏེ་སྔོན་ཐོན་གྱི་མི་རིགས་གཞན་གྱི་ཡར་ཐོར་གྱི་

རིག་གནས་འགོག་དགོས་ཟེར་བ་གཏན་ནས་མ་ཡིན།དེ་ལས་ལྡོག་སྟེ།  ང་ཚོར་རང་མི་རིགས་ཀྱི་རིག་གནས་སྙིང་སྟོབས་

རང་རྐྱ་འཕེར་བ་ཞིག་མངའ་བ་ན། ང་ཚོས་སྔར་བས་ལྷག་པའི་སྒོ་ནས་མི་རིགས་གཞན་གྱི་རིག་གནས་ཀྱི་དོན་སྙིང་ལེན་

པར་ཁག་ཐེག་བྱེད་ཐུབ་པའང་སྨྲོས་མི་དགོས་པ་ཞིག་ཡིན།  དེར་བརྟེན།ང་ཚོས་རིག་པ་གསལ་བ་དང་མྱུར་བ།ཟབ་པ་

བཅས་ཀྱི་སྒོ་ནས་ངེས་དགོས་པ་ཞིག་ནི།ཁོ་བོས་གཞན་རིགས་ཀྱི་ཤེས་རིག་བླང་བར་མི་བྱའོ་ཞེས་རྣམ་པ་ཀུན་ཏུ་གླེང་བ་

ཅི་ཡང་མེད་ལ།དེ་ནི་དོན་གྱིས་བརྩད་ནའང་གླེང་ཐབས་བྲལ་བ་འབའ་ཞིག་ཡིན།
　　གོང་དུ་ངས་སྤམ་བཤད་འདྲ་ཆགས་ཤིག་བྱས་ཐལ།ངོ་མ་ངོ་གནོང་དགོས་པ་ཞིག་ཀྱང་ཡོང་གི་འདུགངས་

རང་མི་རིགས་ཀྱི་རིག་གནས་སྙིང་སྟོབས་སྲ་ཞིང་བརྟན་པ་ཞིག་ལྡན་དགོས་ཚུལ་གླེང་ཡོད་ན་ཡང་།   རང་ངོས་ནས་

མཚོན་ན། ང་ཚོའི་མི་རིགས་འདི་ནི་ལོ་རྒྱུས་ཡུན་རིང་ལྡན་པ་ཙམ་མ་ཟད།ལྷག་དོན་ང་ཚོའི་མེས་པོ་རྣམས་ཀྱི་རྣམ་

དཔྱོད་གསལ་བ་དང་སྙིང་སྟོབས་ཀྱི་གོ་ཆ་བརྟན་པས་ང་ཚོར་མི་རིགས་གཞན་གང་ལའང་ངོ་གནོང་མི་དགོས་པའི་

འོད་སྟོང་འབར་བའི་བརླིང་ཞིང་བརྗིད་པའི་ཡངས་ཤིང་རྒྱ་ཆེ་བའི་མཐོ་ཞིང་བཙན་པའི་རིག་གནས་ཀྱི་བང་མཛོད་

ཁྱད་དུ་འཕགས་པ་ཞིག་བསྐྲུན་ཡོད། དོན་དངོས་འདི་དག་གི་མདུན་དུ།ང་རང་ནི་ཤེས་རྒྱ་ཁབ་མིག་ཇི་བཞིན་ཕྲ་བ་

ཡིན་པས་ན།ང་ཚོའི་མི་རིགས་ཀྱི་རིག་གནས་ཀྱི་འཇིག་ཉེན་དེ་ཡང་ང་རང་གིས་སྙིང་ཆུང་འདིས་དངོས་སུ་ཚོར་ཞིང་

རྟོག་པ་བདེན་གཏམ་རང་ཡིན།

                                                             ལྷ་ས།      གསེར་ནག་གིས། ༢༠༠༩། ༡༠། ༠༩།

དུས་ཚིགས་ཀྱི་མིག་ཆུ།

སྟོན་འཇུག་གི་མདའ་ཁ་བཙན་པོས་

སྡོང་ལོ་སེར་པོ་རིམ་གྱིས་གཏོར་བས་

ཁྲུང་ཁྲུང་དཀར་མོས་བསྟར་འཕྲེང་བསྒྲིགས་ཏེ་

རྒྱང་རིང་རྒྱང་རིང་གི་ལྷོ་ཕྱོགས་ལ་མགྲོན་དུ་བཞུད་

དེ་ནི་གནམ་གྱི་བསྐོར་ཐང་མིན་ལ་

དུས་རབས་ཀྱི་གས་ཀ་ནས་བྱུང་བའི་འཕོ་འགྱུར་རེད་

ཁྱེད་ཕེབས་སྐབས་ངས་མིག་ཆུ་ཞིག་གི་རྫོངས་པ་མེད་ལ་

ཁ་བཏགས་ཞིག་གི་སྐྱེལ་མའང་མེད་

རེད་ཡ་          མི་རིགས་ཤིག་གི་བདེ་སྡུག་ཁྱེར་ནས་

ཧི་མ་ལ་ཡ་རི་རྩེ་ནས་འཕུར་སོང་

འབྱུང་འགྱུར་གྱི་ལོ་ཟླའི་གོ་རིམ་ཁྲོད་ནས་

ངས་ཁ་སང་གི་ལོ་རྒྱུས་ལ་བསམ་གཞིགས་བྱེད་དུས་

ཚོར་སྙང་སྐྱུར་མོ་ཞིག་གི་མིག་ཆུས་སེམས་པ་བརླན་ཞིང་

སྙན་ངག་པའི་ཟུང་ཁྲག་གི་སྙིང་རྩ་འཕར་

རྒྱལ་ཕམ་གྱི་ཡོ་ལང་ཁྲོད་ན་་་

སྨྱུག་རྩེ་ནས་འཛགས་པའི་སྙན་ཚིག་གི་རླུང་རྟ་མོད་པོ་

ཇོ་མོ་གླང་མའི་དབུ་རྩེ་ནས་མཆོད་ཀྱིན་

ཡར་ཀླུང་གཙང་པོ་ཧམ་སེམས་ཀྱི་འཐུང་

འདི་ནི་མི་རབས་ཤིག་གི་ལས་དབང་ལ་བཟོས་པའི་རྨ་ཁ་རེད་

ཡིན་ནའང་ཁྱེད་ལ་འཁང་ར་བྱེད་དོན་ཅི་ཡང་མེད་

དུས་རབས་ཀྱི་ལྟེག་ཁུག་ནས་སྨིན་པའི་

འདས་སོང་གི་ལོ་ཟླ་གང་ལྟར་རིང་ནའང་

ངོ་ཚོའི་རེ་སྒུག་གི་འབོད་སྐུལ་དེ་ལས་རིང་

རི་ཆུ་སྟོང་ཁྲག་གི་ཕ་མཐའ་ན་གནས་པའི་

འཁྲེང་སེམས་ཀྱིས་མནར་བའི་གངས་རི་དང་ནགས་ཀླུང་

ང་དང་སྤུན་ཟླ་ཚོའི་རེ་སྒུག་གི་སྨོན་འདུན་གཙང་མས་

སྙན་ངག་གི་མཆོད་ཚིག་མཁའ་རུ་གཏོར་གྱིན་

གྱེར་འདོན་གྱི་འབོད་སྐུལ་རིང་པོ་

ཡར་ཀླུང་གཙང་པོའི་འགྲམ་ངོགས་ནས་བླངས་

ཕེབས་ཤོག་ཡ་  མེ་ཏོག་དང་ཆོ་བོ་ལ་དུང་བའི་ཁྲུང་ཁྲུང་

འཕུར་ཤོག་ཡ་   མཐོ་སྒང་གི་ལྷ་བྱང་དཀར་པོ།

དཀོན་མཆོག་ནས་སྤྱི་ལོ་༢༠༠༩ སྤྱི་ཟླ་༡༠ ཚེས་༡༥་ཉིན་བྲིས་སོ།།

ཕག་ལོ་བ  ངས་ཁྱོད་ལ་འདྲི།

 ཕག་ལོ་བ   ངས་ཁྱོད་ལ་འདྲི

ཁྱོད་ཀྱིས་གསེར་ཁྲི་སེར་བོའི་ཡང་སྟེང་ནས་འཇིག་རྟེན་ལ་ལྟ་དུས

ཞོགས་པ་དང་ས་སྲོད་ལ་པོ་ཏྰ་ལའི་མཛེས་སྡུག་གི་རྒྱ་ཕིབས་མཐོང་དུས

ཁྱོད་ལ་སྐྱོ་བ་དང་སྡུག་བསྔལ་ཡོད་དམ

ཕག་ལོ་བ  ངས་ཁྱོད་ལ་འདྲི

ཅི་བྱ་གཏོལ་བྲལ་གྱི་ལོ་ཟླ་རླུང་རླབས་ཀྱིས་དེད་ནས

ཁྱོད་ཀྱིས་འགྲོ་འདུག་སྤྱོད་གསུམ་བྱ་སྤུ་ལྟར་སྐྱོད་དུས

ཁྱོད་ནི་ཉམ་ཆུང་གི་བྱེའུ་ཁེར་འཕུར་ཞིག

དེ་དུས་གར་སོང་གི་གཞི་ནས་མཆི་མ་བཏོན་མྱོང་ངམ

ཕག་ལོ་བ  ངས་ཁྱོད་ལ་འདྲི

ཁྱོད་རང་གཞི་ནས་ཕ་ཡུལ་གྱི་གཙང་ཆབ་དང་གྱེས་ནས

ཁྱོད་རང་གཞི་ནས་ཕ་ཡུལ་གྱི་ནམ་མཁའ་དང་བྲལ་ནས

སྐྱོ་ལྷིང་ལྷིང་གི་གཤོག་ཟུང་སྤོབས་པས་བརྐྱངས་ཏེ

རྒྱང་རིང་གི་གནས་མལ་དུ་ཆས་དུས

ཁེར་རྐྱང་གི་སྐྱོ་བ་རི་རབ་བཞིན་ལྕི་ཨང

ཕག་ལོ་བ   ངས་ཁྱོད་ལ་འདྲི

ཁྱོད་ཀྱིས་སྡུག་བསྔལ་ཡོད་ཚད་འཛུམ་མདངས་ཀྱིས་བསུས་ཤིང

རྒྱང་རིང་གི་ས་མཐའ་དེ་ནས་ཕ་ཡུལ་དྲན་དུས

ཕ་ཡུལ་གྱི་གཉེན་ཉེ་དག་གི་སྨོན་ལམ་དང་གསོལ་འདེབས་ཀྱི་ཀློང་ན

ཁྱོད་ཉིད་སྒོམ་པའི་ངང་ཚུལ་དེ་ཡིད་ལ་ཤར་ཐེངས་རེར

ཁྱོད་ཀྱི་གོམ་ཁ་བྲེལ་བྲེལ་ཞིག་ཡིན་ནམ

ཕག་ལོ་བ  ངས་ཁྱོད་ལ་འདྲི

འུ་ཅག་གི་བར་ཐག་འདི་རི་ཀླུང་དང་གཙང་བོས་བཅད་རུང

འུ་ཅག་གི་བར་ཐག་འདི་གཉའ་གནོན་དང་དྲག་སྤྱོད་ཀྱིས་བསྡམས་རུང

བརྩེ་བ་ནི་མཚོ་ལྟར་ཟབ་ཅིང   དྲན་གདུང་ནི་མཁའ་ལྟར་ཡངས་པས

ཤི་ཡང་ཕྱི་མིག་ཅེར་ནས་བལྟ་ས་ཁྱོད་རང་ཡིན་ཞིང

གསོན་ན་མིག་ཟུང་གིས་གཏོད་ས་ཁྱོད་ཉིད་ཡིན་པས

ཁྱོད་རང་གཞི་ནས་ཁེར་རྐྱང་ཡིན་པའི་སྐྱོ་བ་དེ་ཞི་བར་མཛོད

ཕག་ལོ་བ  ངས་ཁྱོད་ལ་འདྲི

ཁྱོད་ཀྱིས་སྐྲ་དཀར་གྱི་ཉག་མ་རེ་རེ་བཏུས་ནས

མིག་ཤེལ་ལ་གད་བརྡར་ཡང་ཡང་བྱས་ནས

ཕྱིར་ཕ་ཡུལ་དུ་འོང་བའི་ཉི་མ་དེ་ནམ་ཞིག་ཡིན་ནམ

ནམ་རྒྱུན་ཁྱོད་ལ་རེ་ཞིང་བསྒུགས་པའི་འདོད་དོན་དེ་ག་དུས་འགྲུབ་བམ

 ནམ་རྒྱུན་ཁྱོད་རང་དྲན་ནས་ཕ་ཡུལ་གྱི་ནམ་མཁའ་ལ་མཆི་མ་འཁོར་ཡོད

ནམ་རྒྱུན་ཁྱོད་རང་དྲན་ནས་ཕ་ཡུལ་གྱི་ཁྱིམ་གཞིས་ལ་ཁ་བ་བབས་ཡོད།

                                    བཙན་གཡར་ཟིན་བྲིས་ནས་འདིར་བཀོད།

མུན་ནག་གི་འཇིག་རྟེན།

འཛིན་མེད་སྟོང་བའི་ཁང་ཁྱིམ་གཞལ་མེད་ཆེན་པོ་འདི།།

ལྷ་འདྲེ་སྟོང་གི་རྐང་བྲོ་རྡུང་སའི་དོ་ར་དང་།།

ཤ་ཟ་སྟོང་གི་འཚོ་བ་བ་རྟེན་སའི་གནས་མལ་དང་།།

བེམ་པོ་སྟོང་གི་མཁར་རྫོང་བརྩེགས་པའི་རོ་ཁང་རེད།།

གཤིན་རྗེའི་ཞགས་པ་སྐེ་ལ་སྐོན་པའི་སེམས་ཅན་རྣམས།།

མ་རིག་དུག་གསུམ་ཟས་སུ་རོལ་མཁན་ཤ་སྟག་རེད།།

མི་རྟག་འཆི་བའི་རྗེས་སུ་སྙེག་གིན་སྙེག་གིན་དུ།།

སྡིག་དང་འདྲེས་པའི་འཚོ་བ་འདི་ལ་བག་ཆགས་ཆེ།།

དུས་ཀྱི་འགྱུར་ལྡོག་མདང་གི་མ་ཉལ་རྨི་ལམ་བཞིན།།

ཤར་གྱི་བུ་མོས་ནུབ་ལ་ཐོད་རྒོལ་ཇུ་ལྟར་མྱུར།།

དུས་རབས་ཉེར་གཅིག་གོ་ལའི་སྒང་ལ་མགྲོན་དུ་བསུས།།

ས་ཆུ་མེ་རླུང་འབྱུང་བ་འཁྲུག་པའི་ཡོ་ལང་ཆེ།།

ཕྱི་གླིང་བ་ཡིས་རིག་པའི་སྒོ་མོ་གསར་དུ་འབྱེད།།

ཚན་རིག་རྩལ་གྱི་འཛམ་གླིང་ཧྲིལ་པོ་དབང་དུ་བསྒྱུར།།

ཕྲག་དོག་ན་བུན་གཅིག་སེམས་གཅིག་ལ་འགྲན་གླེང་མང་།།

གོ་ལ་ཧྲིལ་པོ་རྡུལ་ཕྲན་མཚོན་ཆའི་ཟས་སུ་གྱུར།།

དངོས་ཡོད་རིག་པས་རང་གཞན་མནོ་བསམ་མ་བཏང་པས།།

རང་དོན་ཁོ་ནར་རང་འདོད་བྱེད་པ་ཐལ་དྲག་ནས།།

ལོ་རབས་འདི་ཡི་མནར་གཅོད་དམར་པོ་ཤིན་ཏི་ལྕི།།

ས་ཡི་གོ་ལའི་དབུགས་རྒྱུན་ཕྲ་མོ་ཆད་ལ་ཉེ།།

སྤྱི་ལོ་ཞེས་པ་དེ་འདིར་ཕྱི་ལོ་ཞེས་འབྲི་སྲོལ་འདུག་པ་དེ་ནི་ཕལ་ཆེར་སྔོན་ཆད་དབྱིན་ཇིར་ཕྱི་གླིང་པ་ཞེས་འབོད་པ་དེ་ནས་

རྒྱུ་མཚན་དྲངས་པ་མིན་ནམ་སྙམ། ངས་རྨོངས་ཚོད་ཞུས་ན། སྤྱི་ལོ་དེ་དེང་སྐབས་འཛམ་གླིང་སྤྱི་ཡོངས་ཀྱི་བེད་སྤྱོད་བྱེད་པ་

ཞིག་ཡིན་པས་དེར་སྤྱི་ལོ་ཞེས་ཟེར་བ་དེ་ནི་ཡོངས་ཁྱབ་ཀྱི་ནང་དོན་མཚོན་པ་ཞིག་ཏུ་གསལ་པར་གོ   ཕྱི་ལོ་ཞེས་ཟེར་ན་

དུས་སང་གི་ལོ་དེར་ཕྱི་ལོ་ཞེས་ཟེར་བ་དང་ནོར་ཉེན་ཡོད་པ་དཔེར་ན་ཕྱི་ལོ་༡༩༨༩ ལོ་ཞེས་པ་ལྟ་བུ་བརྗོད་མི་ཡང་ཡོད་

པར་མངོན།

 མི་དམངས་ཞེས་པ་དེ་འདིར་མིང་མང་ཞེས་འབྲི་སྲོལ་འགའ་ཤས་འདུག་པ་དེ་ནི་ཕལ་ཆེར་དམངས་ཞེས་པ་དེ་དཔོན་

འབངས་ཀྱི་དབྱེ་བ་ལྟ་བུ་ཡོད་པར་དགོངས་པ་མིན་ནམ་སྙམ།  ངས་བལྟས་ན། དེ་ནི་སྤྱི་དང་བྱེ་བྲག་གི་ཁྱད་པར་ཙམ་ལས་

དཔོན་འབངས་ཁོ་ནར་གོ་བ་ཨེ་ཡིན་སྙམ།  དམངས་ཞེས་པ་ནི་སྲིད་གཞུང་མ་ཡིན་པའི་རྒྱལ་ཁོང་མི་སྣ་ཡོངས་ལ་ཁྱབ་པ་

ཞིག་ཡིན་པ་ལས་དཔོན་དང་གཡོག་ལྟ་བུར་མི་གོ   ད་དུང་། དམངས་གཙོ་ལ་མང་གཙོ་ཟེར་བ། ཆུ་ཚོད་ལ་དུས་ཚོད་ཟེར་

བ་འདིལྟ་བུའི་མིང་ཚིག་རྣམས་ཚིག་མཛོད་གང་དུའང་རྙེད་རྒྱུ་མེད་པ་རེད་འདུག

འགྲོ་བ་མི་ཞིག་ཡིན་པའི་འདུག་ཤེས་ཀྱི་ངོས་ནས་གླེང་ན།  ང་ཚོ་གང་ལ་སོང་ཡང་ང་ཚོ་རེད་ལ། ང་ཚོ་གང་ནས་བསྡད་

ཀྱང་ང་ཚོ་རང་ཉིན་ཡིན། ང་ཚི་ནི་སུམ་ཉིས་ས་ཡི་དཀྱིལ་འཁོར་བཟུང་བར་གྲགས་པའི་གདོང་དམར་བོད་ཀྱི་རུས་རྒྱུས་

ཡིན་པས། རང་ཉིད་ལྟེ་ཁྲག་འཐོར་སའི་མཛེས་སྡུག་གི་ཕ་ཡུལ་དང་། རང་ཉིན་འཚར་ལོངས་འབྱུང་སའི་ལྷིང་འཇགས་

ཀྱི་རི་གྲོང་། རང་ཉིད་ཀྱི་བསམ་བློ་དང་ལྟ་སྤྱོད་ལ་ཤུགས་རྐྱེན་ཐེབས་སའི་ཞི་བདེའི་ཁོར་ཡུག་དེ་དག་དུས་ནམ་ཡང་

ཡིད་ལ་དྲན་དགོས་ཤིང་། ཅིས་ཀྱང་རང་ཉིད་ཀྱི་སྙིང་ཁར་སྦྱོར་འོས།

འཇིག་རྟེན་འཚོ་སྡོད་པ་ཞིག་གི་མི་ཚེའི་ཐད་ན་གླེང་ན། དམིགས་ཡུལ་དང་ལག་ལེན་གཉིས་ནི་རང་ཉིད་ཀྱི་མི་ཚེ་

རླབས་ཆེན་དུ་བསྒྱུར་བྱེད་ཀྱི་གལ་ཆེའི་མ་ལག་དེ་ཡིན་ལ། རང་ཉིད་ཀྱི་མི་ཚེ་ལ་ཁ་དོག་བསྐྲུན་གྱེད་ཀྱི་ཚོན་རྩི་ངོ་མ་

དེ་ཡིན་པས། དམིགས་ཡུལ་ངེས་ཅན་ཞིག་གི་ཐོག་ལ་ལག་ལེན་གནད་དུ་འཁེལ་བ་ཞིག་བསྟར་རྒྱུ་ཧ་ཅང་གལ་ཆེ་ལ།  ག་དུས་ཡིན་ཡང་དམིགས་ཡུལ་དང་ལག་ལེན་བར་གྱི་ཁ་ཐག་ཉེ་རུ་གཏོང་བར་ངེས་པར་དུ་འབད་བརྩོན་བྱེད་དགོས་

ཡིན།

 ཟང་ཟིང་གི་སྤྱི་ཚོགས་འདིའི་ཁྲོད་དུ་འཚོ་སྡོད་བྱེད་བཞིན་པའི་སྐྱེ་བོ་ཞིག་ལ་འཚོན་ན།    སོ་སོའི་ནམ་རྒྱུན་གྱི་སྐད་ཆ་

བཤད་སྟངས་དང་། རྣམ་འགྱུར་སྟོན་སྟངས། སྤྱོད་པ་འཁེལ་སྟངས་སོགས་ནི་རང་ཉིད་ཀྱི་ངོ་བོའི་རིན་ཐང་གསར་བཞེངས་

བྱེད་པའི་རྒྱུ་ཆ་གལ་ཆེན་དེ་ཡིན་པས། དུས་རྒྱུ་དུ་དོན་དག་དེ་རིགས་ལ་སྣང་ཆུང་མི་བྱེད་པར། མི་གཞན་གྱི་གདེང་འཇོག་

དང་གུས་བཀུར་ཐོབ་ཆེད་སྒོ་གསུམ་ཀྱི་བྱ་སྤྱོད་སྤེལ་སྟངས་ཅི་རིགས་ཕྱོགས་ཡོངས་ནས་བསྒྱུར་བཅོས་དང་གོང་འཕེལ་

གཏོང་དགོས།

 མི་ཚེ་རིན་ཐང་དེ་ངོ་མ་བརྗོད་དཀའ་བ་ཞིག་ཡིན་ཡང་། མི་ཚེའི་དུས་ཡུན་དེ་ཧ་ཆང་ཐུང་ཐུང་རེད། ང་ཚོ་ནི་ཚོང་

འདུས་ཀྱི་མགྲོན་པོ་ཇི་བཞིན་འཇིག་རྟེན་འདིར་དབུ་ཁྱུད་འབྲི་བཞིན་སླར་ཡང་འཇིག་རྟེན་འདིར་བཞི་ཤད་འགོད་

དགོས་པ་ཡིན། དེ་ནི་འཇིག་རྟེན་གྱི་ཆོས་ཉིད་ཡིན་པས་སུ་ལའང་དེ་ཉིད་བཟློག་པའི་བསྐལ་ལ་མ་མཆིས་མོད། འོང་

ཀྱང་ང་ཚོས་སྟངས་འཛིན་ཐུབ་པ་ནི་རང་ཉིད་འཚོ་བཞེས་སྐབས་ཀྱི་དུས་ཡུན་དེ་དག་རེད། དེར་བརྟེན། རང་ཉིད་ལ་

དབང་པའི་ཆུ་ཚོད་ཐུང་ཐུང་དེའི་ནང་དུ་ཅིས་ཀྱང་སོ་སོ་རང་ཉིད་ཀྱི་མི་ཚེ་རིན་ཐང་ཡོད་པ་ཞིག་དང་། དོན་སྙིང་

ལྡན་པ་ཞིག་བཟོ་ཐུབ་པ་བྱེད་དགོས།

 མི་གཞན་གྱི་མདུན་ནས་རང་ཉིད་མཁས་མདོག་མདོག་བྱེད་པའང་རང་ན་ང་རྒྱལ་གྱི་རྣམ་འགྱུར་སྟོན་པ་ནི། རང་

ཉིད་ཀྱི་རིན་ཐང་ལ་རང་ཉིད་ཀྱིས་རྡོག་བརྫིས་གཏོང་བའི་ཅོལ་ཆུང་གི་བྱེད་སྟངས་ཤིག་ལས་ཅང་མིན། གལ་ཏེ་ཁྱོད་

ལ་གཞན་གྱི་དཀུར་བརྩི་དང་ཆེ་མཐོང་དགོས་ཚེ། ངེས་པར་དུ་ང་རྒྱལ་གྱི་གྲིབ་གཟུགས་ནག་པོ་དེ་དག་རྒྱང་དུ་གྱེས་

ཐུབ་པ་བྱེད་དགོས།

 ང་ཚོ་དང་འབྲེལ་འདྲིས་ཟལ་པའི་བརྩེ་དུང་ལ་མཚོན་ན། གང་ཟག་སོ་སོའི་ངེས་དོན་གྱི་མི་ཚེའི་བདེ་སྡུག་དང་ཐད་ཀར་

འབྲེལ་བ་ཆགས་ཡོད་པའི་ཆ་ནས། རང་ཉིད་ཀྱི་རླབས་ཆེ་བའི་མི་ཚེ་དང་།  རང་ཉིད་ཀྱི་རླབས་ཆེ་བའི་བྱ་གཞག་སོགས་ལ་

འདྲེ་ལོག་དང་རྨས་སྐྱོན་མི་འབྱུང་བའི་ཕྱིར་དུ། སོ་སོ་རང་ཉིད་ཀྱི་བརྩེ་དུང་དེ་ཡང་ཡང་དག་པའི་ལམ་ཁ་ཞིག་ཏུ་བསྒྱུར་

རྒྱུ་ནི་གལ་ཆེ་ནང་གི་དོན་ཆེན་རེད།

 བུད་མེད་ནི་གནམ་གྱི་ཕྱེད་ཀ་ཡིན་ཞེས་གསུངས་བ་བཞིན་གལ་ཏེ་ཁྱོད་རང་རླབས་ཆེན་གྱི་བྱ་གཞག་ལ་བརྩོན་མཁན་

ཞིག་ཡིན་ཚེ། བུད་མེད་ནི་ཁྱེད་ཀྱི་གཤོག་ཟུང་ཡ་གཅིག་ཡིན་པ་ནམ་ཡང་བརྗེད་མི་རུང་། ཡིན་ཡང་བུད་མེད་ཀྱི་སྐྱེ་གཟུཌ

ཆ་གཅིག་པའི་ཐད་ལ་ལུས་སེམས་ཤོར་བ་ཡིན་ན་དེ་ལས་ཁྱེད་ལ་ཆགས་སྒོ་ཆེན་པོ་ཞིག་དང་སེམས་སྡུག་ལྕི་མོ་ཞིག་ལས་

གང་ཡང་ཐོབ་མི་སྲིད་པས་རང་ཉིད་ཀྱི་མི་ཚེ་རིན་ཐང་དང་།   རང་ཉིད་འཚོ་སྡོད་ཀྱི་བདེ་སྐྱིད་སླད་དུ་མི་ཚེ་ཧྲིལ་པོར་

རང་ཉིད་ལ་བརྩེ་བ་སྤྲོད་མཁན་ཞིག་དང་ཡང་ན་ཁྱེད་ཕྱོགས་སུ་ལངས་ནས་ཁྱོད་ཀྱི་བྱ་གཞག་ལ་རྒྱབ་བསྐྱོར་དང་གཞོག་

འདེབས་བྱེད་ཐུབ་མཁན་ཞིག་འཚོལ་རྒྱུ་ནི་ནམ་ཡང་ནོིར་འཁྲུལ་འབྱུང་མི་རུང་བའི་ཁྱེད་ཀྱི་མི་ཚེ་ནང་གི་གདམས་བྱ་

དང་པོ་དེ་ཡིན།

 ངོ་ཚོ་ཚང་མ་སྤྱི་མཐུན་གྱིས་བགྲོད་དགོས་པའིོ་བརྩེ་དུང་གི་ལམ་ཁ་དེ་ནི་གཡང་གཟར་ཆེ་ཞིང་ཁོད་སྙོམས་མེད་པས།

བགྲོད་མ་ཤེས་ན་མུན་ནག་གི་ཁ་བ་འབབ་སའི་རི་གྲོང་ཞིག་ལ་སླེབས་ངེས་ཀྱང་། གལ་ཏེ་ལེགས་བགྲོད་ཐུབ་ཚེ་མཛེས་

སྡུག་གི་མེ་ཏོག་འཕུར་བའི་ལྷིང་འཇགས་ཀྱི་མཚོ་ཁུག་ཅིག་ལ་སླེབས་ཐུབ།   འོན་ཀྱང་སྙན་ངག་པའི་སྨྱུག་རྩེར་བཞུར་

བའི་ལྷད་མེད་དྭངས་གཙང་གི་བརྩེ་དུངས་ཤིག་འཇིག་རྟེན་འདིར་གཏན་ནས་མེད་ཅེས་པའི་གནས་ལུགས་ཟབ་མོ་

དེ་ཧ་མ་གོ་བའི་ཐོིག་ནས། སྟོང་བསམ་དང་རྨི་ལམ་རྐྱང་རྐྱང་གྲོགས་སུ་བཀུག་ཏེ། རང་ཉིད་ཀྱི་མི་ཚེ་དོན་མེད་འཕྲོ་

བརླག་ཏུ་གཏོང་མི་རུང་།

དཔལ་འབྱོར་གྱི་འགྲན་རྩོད་ཆེས་ཆེར་དར་བའི་དེང་སང་གི་སྤྱི་ཚོགས་འདིའི་ཁྲོད་དུ། སྐྱེ་ཕོ་མོ་མང་པོ་ཞིག་གིས་མི་

ཚེའི་གལ་ཆེའི་རང་བཞིན་དང་། བརྩེ་དུང་གི་དྭངས་གཙང་རང་བཞིན་ཧ་མ་གོ་བའི་ཐོག་ནས་རང་ཉིད་ཀྱི་མི་ཚེའི་

རིན་ཐང་དང་། རང་ཉིད་ཀྱི་བརྩེ་དུངས་ཀྱི་རིན་ཐང་རྡོག་བརྫིས་གཏོང་བཞིན། ཨུ་ཚུགས་ཀྱིས་ཀློང་ནས་དཔལ་ཀྱི་

རྗེས་སུ་འདར་རྒྱུག་བྱེད་བཞིན་ཡོད་པ་རེད།   གལ་ཏེ་ཁྱེད་རང་མི་ཚེ་དང་བརྩེ་དུང་གི་རིན་ཐང་ལ་གདེང་འཇོག་

བྱེད་མཁན་ཞིག་ཡིན་ཚེ། སྐུགས་པའི་ཨུ་ཚུགས་ཀྱི་སྤྱོད་ཚུལ་འདི་་དང་དུས་ནམ་ཡང་ཁ་ཐག་རིང་གཏོང་དགོས།

གལ་ཏེ་ཁྱེད་རང་ངེས་དོན་གྱི་ཤེས་ཡོན་པ་ཞིག་ཡིན་ཚེ། རང་ཉིད་རང་གི་ངོས་འཛིན་ཟིན་ཐུབ་རྒྱུ་གལ་ཆེ་ལ།

རང་ཉིད་ཀྱི་རིན་ཐང་ལ་རང་ཉིད་ཀྱི་གདེང་འཇོག་བྱེད་རྒྱུ་དེ་བས་ཀྱང་གལ་ཆེ། དེ་བཞིན་གཞན་དབང་གི་བསྒྱུར་

བཅོས་དང་བཀོལ་སྤྱོད་འོག་མ་ཚུད་པའི་ཚུགས་ཐུབ་རང་བཞིན་གྱི་བསམ་བློ་ཞིག་དགོས་རྒྱུ་ནི་རང་ཉིད་ཤེས་ཡོན་

པ་ཞིག་ཡིན་པའི་སྒྲུབ་བྱེད་ངོ་མ་དེ་ཡིན་པ་ངེས་པར་དུ་སེམས་སུ་བཟུང་དགོས།

འདི་ནི་བདག་གི་ཆེས་ཐོག་མའི་མི་ཚེའི་མྱོང་སྣང་གསར་པ་ཡིན་ལ། ཁྱེད་ཚོས་ཕུལ་བའི་ཐ་སྙད་རིན་མེད་ཀྱི་ལག་

རྟགས་ཤིག་ཀྱང་ཡིན།

སྤྱི་ལོ་༢༠༠༩ སྤྱི་ཟླ་༨ ཚེས་༩ ཉིན་བྲིས།།

ཁྱེད་ཉིད་མེད་དུས།  སེམས་པ་འདི་བདེ་མ་མྱོང་།

ཟླ་འོད་མེད་པའི་མཚན་མོ་དེར། གྲང་ཤུར་ཤུར་གྱི་ང་་་་

དྲན་གདུང་གི་ཚོར་སྣང་སྐྱུར་མོ་ཞིག་གིས་སྣེ་དྲངས་ནས།

སེམས་པ་འདི།  སླར་ཡང་ཁེར་རྐྱང་གིས་བཟི་ཞིང་་

སེམས་ངལ་དང་སྟོང་འདང་གིས་བཞེངས་པའི་བློས་བསླང་ཁྲོད།

ངས་མཛུབ་རྩེ་ནས་སྨྱུ་གུ་ཞིག་ལྷོད་ཀྱིས་བཙུར་ཞིང་།

བརྩེ་བ་དྲོན་མོ་ཞིག་ལ་འགྲམ་པ་གླན་ནས།

༼ང་ཁྱོད་ལ་དུངས་༽ཞེས་པའི་ཚིག་འབྲུ་འདི་ཤར་མར་བྲིས་བ་ན།

ཁུར་པོ་ཞིག་ཕོག་པ་བཞིན་ལུས་སེམས་གཉིས་བདེ་ཤིགས་ཤིགས།

བདེ་ཤིོགས་ཤིགས་ཀྱི་ཚོར་ངོགས་ནས། སེམས་པ་འདི་སླར་ཡང་ཁྱོད་ཕྱོགས་སུ་བཞུད།

སྐབས་དེ་དང་དུས་དེ་ལ།  ངའི་དྲན་པའི་སེམས་ངོགས་ན་དམར་ལྷིང་ངེ་ཡོད་པ་ནི།

ཁུ་བྱུག་ལྟར་གྲགས་འོངས་པའི་ཁྱོད་ཉིད་ཀྱི་གསུང་སྐད་དྭངས་མ་་་་་་་་་

ངའི་དབྱར་དུས་ཀྱི་འཇིག་རྟེན་ཁོ་ནར་དབང་ན་འདོད།

སེམས་པ་འདི།  དེ་ལྟར་དྭངས་བའི་ང་་་་་་་་ཞེ་འདང་དེའི་ཆེད་དུ།

སྦྲང་རྩི་བཞིན་མངར་བའི་དགུ་ཚིག་གི་དབྱངས་རྟ།

ངའི་སྙིང་ཆུང་གི་ལྟེབ་ཁུག་ན་མར་ཁུ་བཞིན་འོད་འཁྱུག་འཁྱུག་གི་འཁྱིལ།

འོན་ཀྱང་།  ལྷ་སྲུང་སུ་ཞིག་གི་གཅེས་ཕྲུག་ཏུ་འཁོར་བའི་ཁྱོད་

སྡོང་ལོ་དང་དཔྱིད་རླུང་མེད་པའི་འཁོར་འདས་ན།

ཕྱི་མིག་འཁྲེང་བཞིན།   རྩེད་ར་ཞིག་ལ་བཞི་ཤད་བྲིས་ཟིན་པས།

ངས་་་་་་    ང་ཁོ་ནར་མི་དབང་བའི་ཞེ་མིག་གི་རི་ཆུ་སྔོན་མོ་

སྙིང་ཁུང་གི་རྩ་ལམ་ནས་བསུས་ཏེ།  

ཁྱོད་ཀྱི་དཔྲལ་ཐོད་ལ་དབུ་ཁྱུད་བྲིས་བས་ཅི་ཕན།

མ་གཞིར་་་་སེམས་པ་འདི་ནང་ལ་གཅུ་བྱེད་ཀྱི་ལྷུ་ལག་ཁོལ་མ་ཞིག་མེད་མོད་

བབ་ཆགས་པའི་ཁྱེད་ཉིད་ཀྱི་གྲིབ་གཟུགས་མཇལ་ཐེངས་རེར

ཁྱོད་ལ་གླན་འདོད་པའི་སེམས་པ་

འདྲེ་རྒོད་སུས་བཙོན་དུ་བཀྱིགས་པ་བཞིན་  བལྟས་བལྟས་ལ་རྒས

འདི་ལྟར་ཉི་ནུབ་གྱི་འཕེབ་རིམ་ན་འདྲེགས་པའི་ང་་་་་་

ལས་འབྲས་འདྲ་བའི་དགུན་གཞུང་གི་དུས་ཚིགས་ཅན།

ངའི་མིག་ཟུང་གི་ཟུར་ག་ན།

ཁྱེད་ཉིད་མེད་དུས།       སེམས་པ་འདི་བདེ་མ་མྱོང་།།

དཀོན་མཆོག་ནས་སྤྱི་༢༠༠༩ སྤྱི་ཟླ་༨ ཚེས་༤ ཉིན་ལ།།

གསལ་བཤད།  བོད་རིགས་ན་གཞོན་རྩོམ་པ་པོ་བཀྲ་ཤིས་རབ་བརྟན་ནམ། སྨྱུག་མིང་ལ་ཐེའུ་རང་ཞེས་པ། རྒྱ་གཞང་

གིས་ཟླ་སྔོན་མའི་ཕྱི་ཚེས་ ༢༦ ཉིན་འཛིན་བཟུང་བཙན་ཁྲིད་བྱས་ཡོད་པ་དང༌།   དེ་ནི་ཁོང་གིས་ ༢༠༠༨ ལོའི་ཤར་

དུང་རིའི་དུས་དེབ་ཀྱི་རྩོམ་སྒྲིག་པ་གནང་ཞིང༌། ད་ལོ་ ༼ ཁྲག་ཡིག་ ༽ཅེས་པའི་སྒེར་གྱི་ཆེད་དེབ་བཏོན་པ་གཉིས་ནང༌།

ཆབ་སྲིད་ཀྱི་གནད་དོན་ཆེན་པོ་ཡོད་པར་ཉེས་འཛུགས་འོག་འཛིན་བཟུང་བྱས་པ་ཞིག་རེད།  རྩོམ་པ་པོ་བཀྲ་ཤིས་རབ་

བརྟན་ལགས་ཀྱི་ཕ་ཡུལ་སི་ཁྲོན་རྔ་བ་རྫོང་ཐང་གོར་དང༌།   ད་ལྟ་ནུབ་བྱང་མི་རིགས་སློབ་གྲྭ་ཆེན་མོའི་སློབ་མ་ཡིན་

ཞིང༌།  ཟླ་སྔོན་མའི་

དབྱར་གནང་གི་གུང་གསེང་དང་བསྟུན་ཏེ། ཕ་ཡུལ་ཐང་གོར་ནས་རྒྱ་གཞུང་གིས་འཛིན་བཟུང་གིས་ཁྲིན་ཏུའུ་རུ་ཁྲིད་

ཡོད་པའི་གནས་ཚུལ་ཐོན་ཡོད། དེ་རིང་བོད་ཀྱི་དུས་བབ་ཟིན་བྲིས་པ་དབུས་ཕྲུག་ཚེ་རིང་ལགས་ཀྱིས་ཐེའུ་རང་། ངས་

ཁྱེད་ལ་གླུ་ཞིག་ལེན་ཞེས་པ་རྩོམ་ཡིག་འདི་འདྲ་ཞིག་སྤེལ་འདུག

ཐེའུ་རང༌། ངས་ཁྱེད་ལ་གླུ་ཞིག་ལེན།

ཡར་ཀླུང་སོག་ཁའི་འབྲུ་བཅུད་ཟོས་ཤིང༌།།

པུར་རྒྱལ་བཙན་པོའི་གདུང་བརྒྱུད་འཛིན་པ།།

ལ་ཞེན་མཐུག་པོའི་མེ་རི་སྤར་ཏེ།།

གཡུ་འབྲུག་སྔོན་མོའི་གཉའ་ནས་བཀུག་སོང༌།།

ཁྲག་གི་ལོ་ཟླའི་ཁྲག་ཡིག་བྲིས་ཤིང༌།།

བསླུ་བྲིད་བཙན་པོའི་ལྟོ་བ་བཤགས་ཏེ།།

དམྱལ་ཁམས་ལྟ་བུའི་མི་ཡུལ་གླེང་ནས།།

རྒྱལ་གཅེས་དཔའ་བོའི་རྗེས་ཤུལ་སྙེག་བྱུང༌།།

མི་ལོ་ལྔ་བཅུའི་སེམས་ཀྱི་ན་ཟུག།

སྟོང་ལོ་བརྒྱད་པའི་ཁྲག་གི་མཚོ་མོ།།

ཐིགས་པ་རེ་རེས་དེབ་ཐེར་བཞེངས་ཏེ།།

གངས་ཅན་བོད་མིའི་སྐྱིད་སྡུག་བསྒྲགས་སོང༌།།

ལྕགས་ཐག་ནག་པོས་རྐང་ལག་བཅིངས་ཏེ།།

གདུག་རྩུབ་ཁྲིམས་ཀྱིས་ལུས་ཕུང་བརླགས་ཀྱང༌།།

སྙིང་སྟོབས་བཙན་པོའི་དཔའ་བློ་འདི་ཀོ།

སུ་དང་གང་གིས་སྒུལ་བར་མི་ནུས།།

ཁ་བ་རི་པའི་སྙིང་དམར་དབུས་ན།།

དྲག་ཆར་རླུང་འཚུབ་ནག་ནོག་དྲི་སོགས།།

གང་གིས་མི་འགོག་ཁྱེད་ཀྱི་རྡོ་རིང༌།།

མི་རབས་རྗེས་མའི་སྤྱན་སྔར་བཤམས་བྱུང༌།།

ཐང་དཀར་རྒོད་པོས་གཤོག་རྩལ་ངོམས་ཤིང༌།།

རླུང་ནག་འཚུབ་མོའི་སྤྲིན་རུམ་བརྟོལ་ཏེ།།

རྒྱལ་ཁམས་སྐྱེ་བོ་ཀུན་གྱི་ཁྲོད་ནས།།

བཙན་པོའི་ཞབས་ཟུང་དགུང་ལ་བཏེགས་སོང༌།།

གཟུགས་མེད་ལྷ་ཡི་མཐུ་ནུས་གང་ལྟར།།

བདེན་པའི་འབོད་སྒྲ་དབྱངས་སུ་གྱེར་བའི།།

མི་བུ་ཀུན་གྱིས་བདེན་ཚིག་ཅིག་གིས།།

རྒྱལ་གཅེས་དཔའ་བོ་བླ་རུ་རྒྱས་ཤོག།

༢༠༠༩། ༨། ༤།