སྨོན་ལམ་ཚིག་མཛོད།
སྨོན་ལམ་བོད་ཡིག་ཚིག་མཛོད།
སྐུ་ཞབས་སྨོན་ལམ་གྱིས་འདས་པའི་ཟླ་རེ་ཟུང་ནས་བཟུང་སྨོན་ལམ་བོད་ཡིག་ཚིག་མཛོད་ཅེས་པ་སྒྲིག་མགོ་བརྩམས་
ཡོད་ལ། འཆར་ལོའི་ལོ་སྨད་ལ་ཡོངས་སུ་འགྲུབ་ཐུབ་པའི་རེ་བ་གནང་གི་འདུག
གྲྭ་སྨོན་ལམ་ལགས་ཀྱིས་གསུངས་པ་ལྟར་ན། སྨོན་ལམ་བོད་ཡིག་ཚིག་མཛོད་འདི་ནི་འདས་པའི་ཟླ་ཤས་རིང་ཁོང་
བཞུགས་སྒར་གངས་སྐྱིད་དུ་སྡོད་པའི་རིང་བཟོ་མགོ་བརྩམས་ཤིང་། ད་ལྟའི་ཆར་བོད་ཡིག་ཚིག་མཛོད་ལ་བོད་རྒྱ་ཚིག་
མཛོད་ཆེན་མོ་དང་དག་ཡིག་གསར་སྒྲིག་གཉིས་མཉམ་སྡེབ་ཀྱིས་གློག་ཀླད་ནང་གི་བོད་ཡིག་ཚིག་མཛོད་ཆེན་མོ་ཞིག་
བཟོ་རྒྱུ་ཡིན་པ་དང་། ཚིག་མཛོད་འདིའི་ནང་དུ་བོད་ཡིག་གི་མིང་དང་ཚིག་འབུམ་གཅིག་མ་ལོངས་ཙམ་ཞིག་ཡོད་ལ། དེ་དག་ནི་ད་ལྟ་དབྱིན་ཡིག་གི་གློག་ཀླད་ནང་གི་ཚིག་མཛོད་ལྟ་བུ་ཞིག་བཟོ་རྒྱུ་ཡིན་འདུག ད་ལྟའི་ཆར་ཚིག་མཛོད་
འདི་གཙོ་བོ་དཀར་ཁུངས་གློག་ཀླད་ Windows ནང་ལ་དམིགས་ནས་བཟོ་གིན་ཡོད་ལ། མི་འགྱངས་པར་ཀུ་ཤུ་
རྟགས་ཅན་གྱི་གློག་ཀླད་ལ་དམིགས་ནས་ཀྱང་བཟོ་རྒྱུ་ཡིན་འདུག
ཚིག་མཛོད་འདི་ལས་གཞི་ཅུང་རྒྱ་ཆེ་དང་འགྲོ་གྲོན་གང་ཙམ་དགོས་པས་གང་མགྱོགས་འདོན་ཐུབ་མིན་མ་ངེས་
ཀྱང་རིམ་བཞིན་རྒྱ་ཆེའི་སྤུན་ཟླ་རྣམས་ལ་རིན་མེད་ཐོག་འབུལ་རྩིས་ཡོད་ཞེས་གསུངས་ཡོད་པ་རེད།
ད་ལྟའི་ཆར་ཁོང་གི་གྲོགས་པོ་རེ་ཟུང་གིས་ཚིག་མཛོད་འདིའི་ནང་འཇུག་རྒྱུའི་བོད་རྒྱ་ཚིག་མཛོད་ཆེན་མོ་དང་དག་
ཡིག་གསར་སྒྲིག་གློག་ཀླད་དུ་བཅུག་པ་རྣམས་ལ་ཞུ་དག་བྱེད་བཞིན་པའི་སྒང་རེད།་གཞན་ཡང་གྲྭ་སྨོན་ལམ་ལགས་
ཀྱིས་ཤེས་རིག་ལས་ཁུངས་ཀྱི་སྐུ་ཞབས་ཀརྨ་སྨོན་ལམ་གྱི་དབྱིན་བོད་ཚིག་མཛོད་དེའང་གློག་ཀླད་ཀྱི་ནང་དུ་བཟོ་རྒྱུའི་
སྐོར་ཁོང་གཉིས་བར་གྲོས་མཐུན་བྱུང་ཡོད་ཅིང་། དབྱིན་བོད་ཤན་སྦྱར་གྱི་ཚིག་མཛོད་འདི་ཡང་སྨོན་ལམ་བོད་ཡིག་
ཚིག་མཛོད་དང་དུས་མཉམ་དུ་འདོན་རྩིས་ཡོད་འདུག
གྲྭ་སྨོན་ལམ་ལགས་ཀྱི་རེ་བ་ཆེ་ཤོས་ནི་འདི་ཙམ་ཡང་མིན་པར། མ་འོངས་པའི་ལོ་ཤས་རིང་སྨོན་ལམ་བོད་ཡིག་ཚིག་
མཛོད་འདི་ལས་ཆེ་བ་ཞིག་བཟོ་རྩིས་ཡོད་ཅིང་། དེའི་ནང་དུ་བོད་ཀྱི་རིག་གནས་སྡེ་ཚན་ཁག་ཕལ་ཆེ་བའི་དག་ཡིག་
དང་ཚིག་མཛོད་ ༡༧ ལྷག་ད་ལྟའི་ཆར་ལག་སོན་བྱུང་ཡོད་པ་དང་། དེའི་ནང་དུ་དུང་དཀར་ཚིག་མཛོད་ཆེན་མོ་
ཡང་ཡོད་འདུག
དེ་རིང་ཕྱི་ཚེས་ ༦ ཉིན་གྲྭ་སྨོན་ལམ་ལགས་བཞུགས་སྒར་ནས་ལྡི་ལིར་ཕྱིན་ཡོད་ལ། ལྡི་ལི་ནས་ཉི་ཧོང་ལ་གློག་ཀླད་
སྐོར་གྱི་བསམ་ཚུལ་བརྗེ་རེས་སོགས་ཀྱི་ཆེད་དུ་ཟླ་གཅིག་རིང་གི་འགྲུལ་སྐྱོད་བྱེད་ཀྱིན་ཡོད་པ་རེད།
———
Back