སྤྱི་འཐུས་ཀྱི་བློ་ཕམ

བོད་མི་བཞི་བསད་པར་སྤྱི་འཐུས་ཀྱི་བློ་ཕམ།

བོད་མི་ཚོས་༢༠༠༩ ལོར་རྒྱ་ནག་གཞུང་ལ་ཞི་བའི་ངོ་རྒོལ་བྱས་ཡོད་པ་དང། དེའི་སྐབས་འཛིན་བཟུང་བྱས་པའི་ཞི་

རྒོལ་བ་བཞི་ལ་མི་གསོད་བྱས་པའི་ཉེས་འཛུགས་འོག། ཟླ་འདིའི་ཚེས་༢༠ ཉིན་སྲོག་ཐོག་བཏང་ཡོད་པ་དང། བོད་མི་

མང་སྤྱི་འཐུས་ལྷན་ཚོགས་ཀྱིས་རྒྱ་ནག་གཞུང་ལ་ངོ་རྒོལ་གྱི་གསར་འགོད་གསལ་བསྒྲགས་ཤིག་སྤེལ་ཡོད་པ་རེད།

གསལ་བསྒྲགས་དེའི་ནང་འཁོད་དོན། ཕྱི་ལོ་ ༢༠༠༩ ཟླ་ ༡༠ ཚེས་ ༢༠ ཉིན་གྱི་སྔ་དྲོར་བོད་ཀྱི་རྒྱལ་ས་ལྷ་ས་ནས་རྒྱ་

གཞུང་གིས་ན་ནིང་བོད་དོན་ལས་འགུལ་ཁྲོད་ཞུགས་མཁན་བོད་མི་གསུམ་ལ་མི་གསོད་ཁྲག་སྦྱོར་གྱི་ཉེས་འཛུགས་

འོག་སྲོག་ཐོག་བཏང་ཡོད་པའི་གནས་ཚུལ་ཤེས་རྟོགས་བྱུང་བར་བོད་མི་མང་སྤྱི་འཐུས་ལྷན་ཚོགས་ཀྱིས་ཆེས་བློ་ཕམ་

དང་བཅས་ཚེ་འདས་དེ་རྣམས་གྲུ་འཛིན་མགོན་པོས་ཚེ་རབས་ཀུན་ཏུ་རྗེས་སུ་བཟུང་ཞིང༌། མཐར་ཐུག་རྫོགས་བྱང་

གི་གོ་འཕང་མྱུར་དུ་རེག་པའི་སྨོན་འདུན་དང༌། རྒྱ་དམར་ནས་བོད་མི་རྣམས་ལ་ནག་མེད་ཉེས་འཛུགས་ཀྱིས་ཁྲིམས་

ལུགས་ཀྱི་གོ་རིམ་མེད་པའི་བྱ་སྤྱོད་ངན་པ་རིམ་སྤེལ་ཐོག་བོད་མི་དམར་གསོད་དང༌། འཛིན་བཟུང་བཙོན་འཇུག སྡུག་

སྦྱོང་མནར་གཅོད་བཏང་དང་གཏོང་བཞིན་པ་རྣམས་ལ་ངོ་རྒོལ་དང༌། དེ་རིགས་འཕྲལ་དུ་མཚམས་འཇོག་དགོས་པ་

མ་ཟད། མི་ལོ་དྲུག་ཅུ་མ་ཟིན་ཙམ་གྱི་རིང་བོད་མི་རྣམས་ཀྱིས་བདེ་སྡུག་རིམ་ཞུས་ལ་ཁྲིམས་མཐུན་ཉན་འཇོག་དང་

དཀའ་སེལ་ལག་བསྟར་ཐུབ་ཆེད་བོད་དོན་རྒྱབ་སྐྱོར་བ་ཡོངས་ཀྱིས་བདེན་རྒྱབ་དཔུང་རོགས་དང༌། རྒྱ་གཞུང་ནས་ཀྱང་

དེ་ལུགས་ལག་བསྟར་ངེས་པར་དགོས་པའི་དགོས་འདུན་ཤུགས་ཆེར་འདོན་རྒྱུ་ཡིན།
                                                             བོད་མི་མང་སྤྱི་འཐུས་ལྷན་ཚོགས་ནས་ ༢༠༠༩ ཟླ་ ༡༠ ཚེས་ ༢༢ ལ།།