སྙིང་རྗེའི་རོལ་མཚོ།
༧གོང་ས་མཆོག་གི་མཛད་རྣམ་རྒྱ་ཆེན་སྙིང་རྗེའི་རོལ་མཚོ།
བོད་ཀྱི་དུས་བབ།
ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་མཛད་རྣམ་སྡེ་ཚན་གྱིས་གླེགས་བམ་དྲུག་གི་བདག་ཉིད་ཅན་གྱི་
༧གོང་ས་བཅུ་བཞི་བ་མཆོག་གི་མཛད་རྣམ་ ༼ མཛད་རྣམ་རྒྱ་ཆེན་སྙིང་རྗེའི་རོལ་མཚོ་ ༽ ཞེས་པ་རྩོམ་སྒྲིག་དང་།
དཔར་སྐྲུན་ཡོངས་སུ་ལེགས་འགྲུབ་བྱུང་སྟེ། སང་ཉིན་ཕྱི་ཚེས་ ༢༦ ཉིན་དབུ་འབྱེད་ཀྱི་མཛད་སྒོ་གཟབ་རྒྱས་ཤིག་
བསྡུས་ཏེ། དཔལ་རྒྱལ་བ་༧ཀརྨ་པ་མཆོག་གིས་དཔེ་དེབ་དབུ་འབྱེད་གནང་རྒྱུ་ཡིན་འདུག
ནོར་བུ་གླིང་ཁ་བོད་ཀྱི་རིག་གཞུང་གཅེས་སྐྱོང་ཁང་གི་མཛད་རྣམ་སྡེ་ཚན་གྱིས་༧གོང་ས་མཆོག་གི་མཛད་རྣམ་གླེགས་
བམ་དྲུག་རྩོམ་སྒྲིག་དང་དཔར་སྐྲུན་ལེགས་འགྲུབ་བྱུང་སྟེ། སང་ཉིན་ཕྱི་ཚེས་ ༢༦ ཉིན་དབུ་འབྱེད་མཛད་སྒོ་འཚོགས་
རྒྱུ་ཡིན་པ་དང་། མཛད་སྒོའི་སྐུ་མགྲོན་གཙོ་བོར་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དང་བཀའ་བློན་ཁྲི་པ་
ཟམ་གདོང་རིན་པོ་ཆེ། དཔལ་རྒྱལ་བ་༧ཀརྨ་པ་མཆོག དེ་བཞིན་བཙན་བྱོལ་བོད་གཞུང་གི་དམངས་གཙོའི་ཀ་བ་
གསུམ་གྱི་མཛད་གཙོ་རྣམ་པ་དང་། སྨན་རི་ཁྲི་འཛིན་མཆོག་བཅས་ཕེབས་འཆར་ཡོད་པ་དང་། སང་ཉིན་སྔ་དྲོའི་ཆུ་
ཚོད་ ༡༠ དང་ཕྱེད་ཀའི་ཐོག་དཔལ་རྒྱལ་བ་༧ཀརྨ་པ་མཆོག་གིས་མཛད་རྣམ་དཔེ་དེབ་དབུ་འབྱེད་གནང་རྒྱུ་ཡིན་
འདུག
གསར་དུ་རྩོམ་སྒྲིག་གནང་བའི་༧གོང་ས་མཆོག་གི་མཛད་རྣམ་༼ མཛད་རྣམ་རྒྱ་ཆེན་སྙིང་རྗེའི་རོལ་མཚོ་ ༽ ཞེས་པ་
དེར་རྒྱལ་དབང་སྐུ་ཕྲེང་རིམ་བྱུང་གི་ལོ་རྒྱུས་རགས་ཟིན་དང་། ༧གོང་ས་བཅུ་བཞི་བ་ཆེན་པོ་མཆོག་སྐུ་འཁྲུངས་པ་
ནས་བཟུང་ཕྱི་ལོ་ ༡༩༦༠ ཟླ་ ༨ བར་གྱི་ཆོས་སྲིད་ཀྱི་མཛད་འཕྲིན་ཞིབ་འབྲི་བྱས་ཡོད་འདུག གླེགས་བམ་ཆེན་པོ་
༦ དང་རླབས་འཕྲེང་ ༢༢ ཀྱིས་གྲུབ་པར་བྱས་ཡོད་པ་དང་། ཁྱོན་བསྡོམས་པར་རིས་གྲངས་ ༡༠༡ དང་ཤོག་ངོས་
༣༧༣༨ ཙམ་ཡོད་འདུག ཐེངས་འདིར་མཛད་རྣམ་དཔར་ཐེངས་དང་པོར་དཔེ་དེབ་ལེགས་ཞན་རིགས་གཉིས་ཡོད་
པ་དང་། སྤུས་ལེགས་གྲངས་ ༡༠༠ དང་དཀྱུས་མ་ ༤༠༠ བཅས། ཁྱོན་བསྡོམས་ ༥༠༠ དཔར་སྐྲུན་བྱས་ཡོད་འདུག
གླེགས་བམ་དང་པོ་ནི། མཛད་རྣམ་འདིའི་མཆོད་བརྗོད་དང་སྔོན་གླེང་བཅས། རླབས་འཕྲེང་དང་པོ་ནས་གསུམ་པའི་
བར་ཏེ། ༧གོང་ས་སྐུ་ཕྲེང་ན་རིམ་གྱི་སྐུ་གསུང་ཐུགས་ཀྱི་ཡོན་ཏན་འཕྲིན་ལས་ཀྱིས་འགྲོ་དོན་མཛད་པའི་སྐོར་སྙིང་
བསྡུས་དང་། ལྷག་པར་དུ་༧རྒྱལ་དབང་བཅུ་གསུམ་པའི་མཛད་པ་ཅུང་རྒྱས་པ་བཅས་བཀོད་ཡོད་འདུག སྐབས་འབྲེལ་
དགོས་ངེས་ཀྱི་ཡིག་ཆ་དང་། མི་སྣ་ངོ་སྤྲོད། དཔྱད་གཞི། ཚིག་མཛོད་དུ་གསལ་ཁ་མེད་པའི་མིང་ཚིག་རིགས་ཀྱི་འགྲེལ་
སོགས་ཟུར་འགོད་ཚན་པ་ ༤༢ དང་། པར་རིས་ ༡༨ ཁྱོན་བསྡོམས་ཤོག་ངོས་ ༦༧༢ འདུག
གླེགས་བམ་གཉིས་པ་ནི། ༧རྒྱལ་དབང་བཅུ་གསུམ་པ་ཆེན་པོའི་མཛད་རྣམ་དངོས་གཞི་དབུ་འཛུགས་བྱས་ཏེ། རླབས་
འཕྲེང་བཞི་བ་ནས་བདུན་པའི་བར་ཏེ། ཡང་སྲིད་མཆོག་སྤྲུལ་རིན་པོ་ཆེ་ཚུལ་ཇི་ལྟར་རྩད་དཔྱོད་ཞུས་པ་ནས། མཆོག་
སྤྲུལ་རིན་པོ་ཆེ་རྒྱལ་ས་ལྷ་སར་གདན་འདྲེན་དང་། ཡོངས་འཛིན་བགྲེས་གཞོན་བསྐོ་བཞག དགེ་བསྙེན་གྱི་བསླབ་སྡོམ་
འབུལ་བཞེས། གསེར་ཁྲིར་མངའ་གསོལ། ཡི་གེ་གསན་སྦྱོང་། སྐབས་དེའི་བསྟན་པ་ཆབ་སྲིད་ཀྱི་འགྱུར་འགྲོས་དང་། ཡུལ་
གོམས་རིག་གནས་སོགས་ཞིབ་འབྲི་བྱས་ཡོད་པ་དང་། མི་སྣ་དང་དགོན་སྡེ་ངོ་སྤྲོད་སོགས་སྡེ་ཚན་ ༤༠ དང་། པར་
རིས་ ༡༣ ཁྱོན་བསྡོམས་ཤོག་ངོས་ ༥༤༤ འདུག
གླེགས་བམ་གསུམ་པ་ནི། རླངས་འཕྲེང་བརྒྱད་པ་ནས་བཅུ་གཅིག་བར་ཏེ། ཕྱི་ལོ་ ༡༩༤༢ ནས་༧གོང་ས་མཆོག་གིས་
རབ་བྱུང་སྡོམ་པ་བཞེས་པ་དང་། སྨོན་ལམ་ཆེན་མོའི་ཚོགས་མགོན་དུ་ཐེངས་དང་པོ་ཆིབས་བསྒྱུར་བསྐྱངས་པ་ནས་
བོད་རྒྱའི་བར་གྲོས་མཐུན་དོན་ཚན་བཅུ་བདུན་ལ་མིང་རྟགས་བཀོད་པའི་བར་གྱི་ཆོས་སྲིད་ཀྱི་བྱེད་སྒོ་ཁག་བཀོད་
ཡོད་ལ། བརྡ་ཆད་ཀྱི་ཚིག་འགྲེལ་དང་འདྲེན་རྟགས་སོགས་ཀྱི་འགྲེལ། ཕྱི་རྒྱལ་སྐད་ཡིག་གི་མིང་ཚིག་བོད་ཡིག་ཐོག་
སྒྲ་སྒྱུར་དག་ཆ་འགྲོ་ལུགས་སོགས་ཀྱི་ཟུར་སྣོན་བཅས་ཡོད་ལ། པར་རིས་ ༡༡ དང་ཁྱོན་བསྡོམས་ཤོག་ངོས་ ༦༠༢ ཡོད།
གླེགས་བམ་བཞི་བ་ནི། རླངས་འཕྲེང་བཅུ་གཉིས་ནས་བཅུ་བཞིའི་བར་ཏེ། ཕྱི་ལོ་ ༡༩༥༡ ལོར་༧གོང་ས་མཆོག་གྲོ་མོ་
ནས་རྒྱལ་ས་ལྷ་ལྡན་དུ་དུ་ཕྱིར་ཕེབས་ཏེ། ལེགས་བཅོས་ལས་ཁུངས་གསར་འཛུགས་དང་། རྒྱ་དཀར་ནག་གཉིས་སུ་
ཆིབས་བསྒྱུར། གསེར་ཁྲི་འདེགས་འབུལ་དང་འབྲེལ་དུས་འཁོར་དབང་ཆེན་བསྩལ་བའི་བར་གྱི་མཛད་པ་ཞིབ་བརྗོད་
ཐོག སྐབས་དེའི་བོད་གནས་ཚུལ་དག་ཀྱང་མཚོན་པར་བྱས་ཡོད། དུས་དེར་༧གོང་ས་མཆོག་དངོས་སུ་ཆིབས་བསྒྱུར་
གནང་མྱོང་བའི་དགོན་སྡེ་གྲགས་ཆེན་རིགས་དང་། གལ་ཆེའི་གནད་ཡོད་མི་སྣ་ཁག་གཅིག་བཅས་སྡེ་ཚན་ ༡༨ ཟུར་
སྣོན་དང་། པར་རིས་ ༢༩ ཁྱོན་བསྡོམས་ཤོག་ངོས་ ༦༡༨ ཡོད།
གླེགས་བམ་ལྔ་བ་ནི། རླངས་འཕྲེང་བཅོ་ལྔ་ནས་བཅོ་བརྒྱད་བར་ཏེ། ༧གོང་ས་མཆོག་གིས་གཞུང་ཆེན་བཀའ་པོད་ལྔ་
ལ་གསན་སྦྱོང་དང་། གནད་ས་ཆེན་པོ་གསུམ་དུ་གྲྭ་སྐོར་དམ་འཇོག ལྷ་རམས་དམ་བཞེས་ཀྱི་མཛད་སྒོ། རྒྱ་དམར་གྱི་
བཙན་འཛུལ་ཉེན་ཁའི་འོག ༧གོང་ས་མཆོག་ལྷོ་ཁའི་ཕྱོགས་སུ་ཆིབས་བསྒྱུར་དང་། དེ་ནས་རྒྱ་གར་དུ་རེ་ཞིག་བཙན་
བྱོལ་དུ་ཆིབས་བསྒྱུར་མི་གནང་ཀ་མེད་བྱུང་བ་སོགས་ཀྱིས་གཙོས་པའི་སྐབས་དེའི་བོད་བསྟན་པ་ཆབ་སྲིད་ཀྱི་འཕོ་
འགྱུར་དང་། བོད་མི་དམངས་ནས་རྒྱ་རྒོལ་གསུམ་བཅུ་སྒེར་ལངས་ཐོག་མར་ཇི་ལྟར་བརྩམས་པའི་སྐོར། དེ་བཞིན།
གདན་ས་ཆེན་པོ་གསུམ་དང་བཀྲ་ཤིས་ལྷུན་པོ། དེ་མིན་སྐབས་དེའི་གནད་ཡོད་མི་སྣ་འགའ་ངོ་སྤྲོད་སོགས་ཚན་པ་
༢༦ དང་། པར་རིས་ ༡༩ ཁྱོན་བསྡོམས་ཤོག་ངོས་ ༦༥༢ ཡོད།
གླེགས་བམ་དྲུག་པ་ནི། རླབས་འཕྲེང་བཅུ་དགུ་ནས་ཉེར་གཉིས་པར་ཏེ། ཕྱི་ལོ་ ༡༩༥༩ ཟླ་ ༦ ཚེས་ ༢༠ ཉིན་མ་སུ་རི་
ནས་༧གོང་ས་མཆོག་གིས་བོད་རྒྱ་ཞི་གྲོས་བསྐྱར་མཐུད་ཡོང་ཐབས་སུ་བོད་དོན་སྲིད་བྱུས་གསལ་བསྒྲགས་བསྐྱངས་པ་
ནས། མཉམ་འབྲེལ་རྒྱལ་ཚོགས་སུ་བོད་དོན་ཞུ་སྐུལ། བཙན་བྱོལ་བོད་མི་རྣམས་གཞིས་ཆགས་པ་དང་སློབ་གྲྭ་གསར་
འཛུགས། བོད་ཕྲུག་བུ་གསོ་ཁང་གསར་འཛུགས་བར་གྱི་མཛད་པ་ཞིབ་གསལ་བསྟན་ཡོད་པ་དང་། ཟུར་སྣོན་ཁོངས་
སུ་ ༡༩༥༠ ལོར་རྒྱལ་ཚོགས་སུ་བསྐྱར་སྐུལ་ཞུ་གཏུག་སྙན་ཞུ་སོགས་གལ་ཆེའི་ཡིག་ཆ་ཁག་དང་། ༧གོང་ས་མཆོག་
རྒྱ་གར་དུ་བཙན་བྱོལ་དུ་ཕེབས་རྗེས་ཐེངས་དང་པོར་གནས་གཟིགས་སུ་ཕེབས་པའི་གནས་ཆེན་ཁག་གི་ངོ་སྤྲོད་
བཅས་ཚན་པ་ ༣༧ དང་། སྐུ་པར་ ༡༡ ཁྱོན་བསྡོམས་ཤོག་ངོས་ ༦༥༠ བཅས་ཡོད།
མཛད་རྣམ་རྩོམ་སྒྲིག་ཚོགས་ཆུང་གི་ཞབས་ཞུ་བ་རྣམ་པར་སྔ་ཕྱི་འཕོ་འགྱུར་མང་པོ་ཕྱིན་ཡོད་པ་དང་། ཐོག་མར་ཕྱི་ལོ་
༡༩༨༤ ལོར་སྐུ་སྒེར་ཡུག་ཚང་གི་འོག་གསར་འཛུགས་གནང་བ་ཞིག་ཡིན་པ་དང་། སྐབས་དེར་རྟ་ར་བ་བསྟན་འཛིན་
ཆོས་ཉིད་དང་། རྡོ་འབུམ་སྤྲུལ་སྐུ་བློ་བཟང་བསྟན་འཛིན་འཕེལ་རྒྱས། སྣར་སྐྱིད་ངག་དབང་དོན་གྲུབ། རྒྱ་མཚོ་བཀྲ་
ཤིས་བྱམས་པ་ཚུལ་ཁྲིམས་བཅས་ཀྱི་གཙོ་འགན་བཞེས་ཤིང་། བཀའ་ཤག་གི་འཆར་གསལ་མིན་པའི་ལས་ཁུར་ཞུ་
མཁན་ལྷ་སྡིངས་བློ་བཟང་ཆོས་འཕེལ་དང་། ལྷའུ་རྟ་ར་བ་བསྟན་འཛིན་རྒྱལ་མཚན། ཐོན་ཟུར་བློ་བཟང་བསྟན་འཛིན།
པདྨ་རིག་འཛིན། གཉལ་བློ་བཟང་བསྟན་འཛིན། ཨ་མཆོག་སྤྲུལ་སྐུ་བློ་བཟང་ཐུབ་བསྟན་མཁྱེན་རབ་ཡེ་ཤེས་རྒྱ་མཚོ། དགའ་བྲང་བློ་བཟང་བསྟན་འཛིན་བཅས་ཀྱིས་ཕྱག་ལས་གནང་ཡོད་འདུག
༧གོང་ས་མཆོག་གི་བཀའ་ཕེབས་དོན་ལྟར། ཕྱི་ལོ་ ༢༠༠༠ ཟླ་ ༣ ཚེས་ ༡༥ ཉིན་མཛད་རྣམ་སྡེ་ཚན་དེ་ནོར་གླིང་བོད་
ཀྱི་རིག་གཞུང་གཅེས་སྐྱོང་ཁང་དུ་ཟླ་སྒྲིལ་བཏང་རྗེས། ནོར་གླིང་ངེས་སྟོན་པ་བཀའ་བློན་ཁྲི་ཟུར་སྐལ་བཟང་ཡེ་ཤེས་
དང་། ཞེ་བོ་བློ་བཟང་དར་རྒྱས། སྣར་སྐྱིད་ངག་དབང་དོན་གྲུབ། པདྨ་མ་རིག་འཛིན། གཉལ་བློ་བཟང་བསྟན་འཛིན།
དགའ་བྲང་བློ་བཟང་བསྟན་འཛིན། ཤེལ་གླིང་ཚེ་དབང་རྣམ་རྒྱལ། བཀའ་བློན་ཁྲི་ཟུར་བསོད་ནམས་སྟོབས་རྒྱལ། ཞོ་
ར་བསྟན་པ་དར་རྒྱས། གྲགས་པ་བསྟན་དར། བཀྲས་ཁང་རྣམ་རྒྱལ་རྡོ་རྗེ། རྣམ་སྤེལ་ཚང་བློ་བཟང་སྤྱིན་པ། ཨ་ཚོགས་
བསྟན་འཛིན་འཇམ་དབྱངས། ཁྲི་ཀ་དཀོན་མཆོག་བཀྲ་ཤིས། ཁ་སྒང་ཤེས་རབ་རྒྱ་མཚོ། བྱ་གཞུང་སྐལ་བཟང་ཚུལ་
ཁྲིམས། གསར་དུ་བསྐོས་པའི་འབའ་པ་ཡེ་ཤེས་དགའ་བ་བཅས་ཀྱིས་རྩོམ་སྒྲིག་གི་ཕྱག་ལས་གནང་ཡོད་འདུག
———
Back