འགྲེམས་སྟོན་བཀག་འགོག

བོད་དོན་དང་འབྲེལ་བའི་འགྲེམས་སྟོན་བཀག་འགོག

ཕྱི་ཟླ་༡༡ ཚེས་༡ ཉིན་བྷང་ལ་དྷེ་ཤི་རུ་བོད་རང་བཙན་སློབ་ཕྲུག་ཚོགས་པ་དང། བྷང་ལ་དྷེ་ཤིའི་ཌི་རཱིག་ཞེས་པའི་དྲ་

རྒྱ་ཚོགས་པའི་གོ་སྒྲིག་འོག ཕྱི་ལོ་༡༩༤༩ ནས་༢༠༠༩ བར་བཙན་བྱོལ་དུ་བོད་ཀྱི་འགྲུལ་སྐྱོད་ཅེས་པའི་འདྲ་པར་གྱི་

འགྲེམས་སྟོན་ཞིག་བྱས་ཡོད་པ་དང༌། དེའི་ནང་ྋགོང་ས་མཆོག་དང་བོད་མི་རྣམས་ཐོག་མར་བཙན་བྱོལ་ལ་འབྱོར་

བའི་སྐབས་ཀྱི་འདྲ་པར་རིགས་ཡོད་པར་བརྟེན། བྷང་ལ་དྷེ་ཤིར་ཡོད་པའི་རྒྱ་ནག་གཞུང་ཚབ་ཁང་ནས་གནོན་ཤུགས་

སྤྲད་ནས་འགྲེམས་སྟོན་དེ་ཆུ་ཚོད་གཅིག་རྗེས་མཚམས་འཇོག་བྱེད་དགོས་བྱུང་ཡོད་འདུག

ཌི་རཱིག་དྲ་རྒྱ་ཚོགས་པ་ནི་འཛམ་གླིང་ནང་པར་མཛོད་དང་བརྒྱུད་ལམ་སོགས་ནས་འགྲོ་བ་མིའི་ཐོབ་ཐང་དང།  སྤྱི་

ཚོགས་ལེགས་བཅོས་བྱེད་མཁན་གྱི་ཚོགས་པ་སྙན་གྲགས་ཅན་ཞིག་ཡིན་པ་དང། འདས་པའི་ལོ་བཅུ་ཕྲག་གཉིས་ལྷག་

གི་རིང་འགྲེམས་སྟོན་ཆེ་ཆུང་སྣ་ཚོགས་བྱས་ཡོད་ཅིང༌། ལོ་འདིར་བོད་མི་རྣམས་ཇི་ལྟར་བཙན་བྱོལ་དུ་ཡོང་བའི་སྐོར་

འགྲེམས་སྟོན་སྐབས། དབུ་འབྱེད་མཛད་སྒོར་བྷང་ལ་དྷེ་ཤིའི་དབུ་ཁྲིད་གལ་ཆེན་འགའ་ཤས་ཕེབས་ནས་འགྲོ་བ་མིའི་

ཐོབ་ཐང་དང་འབྲེལ་བའི་གསུང་བཤད་གནང་ཡོད་པ་རེད།

འགྲེམས་སྟོན་འགོ་བཙུགས་ནས་ཡུན་རིང་མ་སོང་བར་ས་གནས་ཉེན་རྟོག་པ་འབྱོར་ནས་འགྲེམས་སྟོན་བྱེད་སའི་རྒྱལ་

སྒོ་བཀག་ནས་འགྲེམས་སྟོན་སྒོ་རྒྱག་བཅུག་ཡོད་པ་རེད། སྤྱིར་འགྲེམས་སྟོན་དེ་བདུན་ཕྲག་གཅིག་རིང་བྱེད་འཆར་ཡོད་

ནའང། མུ་མཐུད་ཐུབ་མིན་ལ་དཀའ་ངལ་འཕྲད་ཡོད་པ་རེད། 

ཌ་རཱིག་ཚོགས་པའི་འགན་འཛིན་ཤ་ཧི་དྷུལ་ཨ་ལཱམ་མཆོག་གིས་གསུང་དོན། སྤྱིར་འགྲེམས་སྟོན་འགོ་མ་ཚུགས་པའི་

ཉིན་གཉིས་སྔོན་ནས་རྒྱ་ནག་གཞུང་ཚབ་ནས་ལས་བྱེད་གཉིས་སླེབས་ནས་ལས་དོན་དེ་མཚམས་འཇོག་དགོས་སྐོར་

བརྗོད་སོང་ཞེས་བརྗོད་ཡོད་པ་རེད། ལས་འགུལ་སྤེལ་མཁན་ཚོགས་པ་མང་པོས་འགྲེམས་སྟོན་དེར་རྒྱབ་སྐྱོར་བྱེད་

བཞིན་ཡོད་པ་རེད། །